ರಂಜಾನ್ 'ವಸ್ತ್ರ ಸಂಹಿತೆ' ಬಿಸಿ, ಟಿವಿ ನಿರೂಪಕಿ ಅಮಾನತು!
ಕುವೈಟ್, ಜೂನ್ 15: ಮುಸ್ಲಿಮರ ಪವಿತ್ರ ಹಬ್ಬ ಈದ್ ಉತ್ ಫಿತ್ರ್ ಎಲ್ಲೆಡೆ ಆಚರಿಸಲಾಗುತ್ತಿದೆ. ಆದರೆ, ಕುವೈಟ್ ಟೆಲಿವಿಷನ್ ನ ನಿರೂಪಕಿ ಅಮಲ್ ಅಲ್ ಅವಧಿ ಅವರ ಹಬ್ಬದ ಸಂಭ್ರಮಕ್ಕೆ ಮಂಕು ಕವಿದಿದೆ. ಟಿವಿ ಲೈವ್ ಶೋ ನಿರೂಪಣೆ ಮಾಡುತ್ತಿದ್ದ ಸಂದರ್ಭದಲ್ಲೇ ಆಕೆಯನ್ನು ಕೆಲಸದಿಂದ ತೆಗೆದು ಹಾಕಲಾಗಿದೆ. ಇದಕ್ಕೆ ಕಾರಣ, ಇಸ್ಲಾಂ ಮೂಲಭೂತವಾದಿಗಳ ವಸ್ತ್ರ ಸಂಹಿತೆ ನೀತಿ.
ರಂಜಾನ್ ಮಾಸಾಚಾರಣೆ ಸಂದರ್ಭದಲ್ಲಿ ಧರಿಸಬೇಕಿದ್ದ ವಸ್ತ್ರಗಳನ್ನು ಬಿಟ್ಟು, ಪಾಶ್ಚಾತ್ಯ ಶೈಲಿಯ ವಿನ್ಯಾಸ ಉಡುಪನ್ನು ಧರಿಸಿ ನಿರೂಪಣೆ ಮಾಡಲು ಮುಂದಾಗಿದ್ದು ಅಮಲ್ ಅವರ ಕೆಲಸಕ್ಕೆ ಕುತ್ತು ತಂದಿದೆ.
ಸರ್ಕಾರಿ ಸ್ವಾಮ್ಯದ ಕುವೈಟ್ ಟೆಲಿವಿಶನ್ (ಕೆಟಿವಿ1)ನಲ್ಲಿ ನಿರೂಪಕಿಯನ್ನು ಕಂಡ ಅನೇಕರು ಆಕೆಯ ದಿರಿಸಿನ ಬಗ್ಗೆ ದೂರು ನೀಡಿದ್ದಾರೆ. ತಕ್ಷಣವೆ ಆಕೆಯನ್ನು ಅಮಾನತು ಮಾಡಲಾಗಿದೆ.
ಈ ಬಗ್ಗೆ ಬೇಸರ ವ್ಯಕ್ತಪಡಿಸಿರುವ ಅಮಲ್, ಸಾಮಾಜಿಕ ಜಾಲ ತಾಣಗಳಲ್ಲಿ ಈ ಬಗ್ಗೆ ನ್ಯಾಯ ಕೇಳಿದ್ದಾರೆ. ಕುವೈಟ್ ನ ಮಾಹಿತಿ ಸಚಿವಾಲಯಕ್ಕೆ ಈ ಬಗ್ಗ ಪ್ರಶ್ನೆ ಮಾಡಿ, ಸ್ಪಷ್ಟನೆ ಕೋರಿದ್ದಾರೆ.
ದಿ ವಿನ್ನಿಂಗ್ ಟಚ್ ಎಂಬ ಕಾರ್ಯಕ್ರಮದ ಸಹ ನಿರೂಪಣೆ ಮಾಡುತ್ತಿದ್ದ ಅಮಲ್ ಅವರು, ತಮ್ಮ ಹೊಸ ಉಡುಪಿನೊಂದಿಗೆ ಸೆಲ್ಫಿ ತೆಗೆದುಕೊಂಡು ಇನ್ಸ್ಟಾಗ್ರಾಮ್ ಗೆ ಹಾಕಿದ್ದರು. ಇದು ರಂಜಾನ್ ತಿಂಗಳಲ್ಲಿ ಕೆಟ್ಟ ಸಂದೇಶ ನೀಡಿದಂತಾಗುತ್ತದೆ. ಈ ಶೋ ಈಗಲೇ ಬಂದ್ ಮಾಡಿ, ಇಲ್ಲವೇ ಚಾನೆಲ್ ಸಂಪೂರ್ಣ ಬಂದ್ ಆಗಲಿದೆ ಎಂಬ ಬೆದರಿಕೆ ಗಳು ಬಂದ ಮೇಲೆ, ಚಾನೆಲ್ ಮುಖ್ಯಸ್ಥರು ಈ ಕ್ರಮ ಜರುಗಿಸಿದ್ದಾರೆ.
Click it and Unblock the Notifications
Sign in with Google