ಬ್ರಿಕ್ಸ್ ಸಮ್ಮೇಳನ: ಇಂದು ನರೇಂದ್ರ ಮೋದಿ-ಜಿನ್ಪಿಂಗ್ ಭೇಟಿ
ಗ್ಸಯಾಮೆನ್(ಚೀನಾ), ಸೆಪ್ಟೆಂಬರ್ 5: ಬ್ರಿಕ್ಸ್ ಸಮ್ಮೇಳನಕ್ಕಾಗಿ ಚೀನಾಕ್ಕೆ ತೆರಳಿರುವ ಭಾರತದ ಪ್ರಧಾನಿ ನರೇಂದ್ರ ಮೋದಿ ಇಂದು(ಸೆ.5) ಚೀನಾ ಅಧ್ಯಕ್ಷ ಗ್ಸಿ ಜಿನ್ಪಿಂಗ್ ಅವರನ್ನು ಭೇಟಿಯಾಗಲಿದ್ದಾರೆ.
ಚೀನಾದಲ್ಲಿ ಬ್ರಿಕ್ಸ್ ಸಮ್ಮೇಳನ: ಮೋದಿ- ಜಿನ್ಪಿಂಗ್ ಮುಖಾಮುಖಿ
ಉಭಯ ನಾಯಕರೂ, ಭಾರತ -ಚೀನಾ ನಡುವಿನ ಸಾಮರಸ್ಯಕ್ಕೆ ಧಕ್ಕೆಯಾಗಿರುವ "ದೋಕ್ಲಾಂ" ಕುರಿತು ಚರ್ಚಿಸುವ ನಿರೀಕ್ಷೆ ಇದೆ.
ಕಳೆದ ವಾರವಷ್ಟೆ ದೋಕ್ಲಾಂ ನಲ್ಲಿ ಬೀಡುಬಿಟ್ಟಿದ್ದ ಸೇನೆಯನ್ನು ಭಾರತ ಮತ್ತು ಚೀನಾ ಎರಡೂ ದೇಶಗಳೂ ಹಿಂಪಡೆದಿದ್ದವು. ಈ ಮೂಲಕ ಗಡಿಯಲ್ಲಿ ಶಾಂತಿ ನೆಲೆಸಿತ್ತು.
ಇಂದು 12:30 ಕ್ಕೆ ಭೇಟಿಯಾಗಲಿರುವ ಉಭಯ ನಾಯಕರು ಪರಸ್ಪರ ವಿಶ್ವಾಸ ಹೆಚ್ಚಿಸಿಕೊಳ್ಳುವ ಕುರಿತು ಚರ್ಚಿಸಲಿದ್ದಾರೆ.
ಭಾರತದ ಭಯೋತ್ಪಾದನೆಯ ವಿರುದ್ಧ ಹೋರಾಟವನ್ನು ಸೆ.4 ರಂದು ಬ್ರಿಕ್ಸ್ ನ ಸದಸ್ಯ ರಾಷ್ಟ್ರಗಳು ಬೆಂಬಲಿಸುವ ಮೂಲಕ ಚೀನಾಕ್ಕೂ ಮುಖಭಂಗವನ್ನುಂಟುಮಾಡಿವೆ. ಈ ಸಂದರ್ಭದಲ್ಲಿ ಪಾಕಿಸ್ತಾನ ಪ್ರೋತ್ಸಾಹಿತ ಭಯೋತ್ಪಾದಕ ಸಂಘಟನೆಗಳ ಬಗ್ಗೆಯೂ ಚೀನಾ ಹೊರತುಪಡಿಸಿ ಇತರೆ ಬ್ರಿಕ್ಸ್(ಬ್ರೆಜಿಲ್, ರಷ್ಯಾ, ಭಾರತ, ದಕ್ಷಿಣ ಆಫ್ರಿಕ) ರಾಷ್ಟ್ರಗಳು ದನಿ ಎತ್ತಿ, ಭಾರತಕ್ಕೆ ಬೆಂಬಲ ನೀಡಿದವು.