Tirumala Tirupati: ತಿರುಮಲ ದೇವಸ್ಥಾನ ಒಳ ದರ್ಶನಕ್ಕಾಗಿ ವಿಶೇಷ ಆನ್ಲೈನ್ ಟಿಕೆಟ್ ಬಿಡುಗಡೆ- ದಿನಾಂಕ, ಬೆಲೆ, ಮಾಹಿತಿ, ವಿವರ
ತಿರುಪತಿ, ಮೇ 18: ವೆಂಕಟೇಶ್ವರ ದೇವಸ್ಥಾನದಲ್ಲಿ ಅರ್ಜಿತ ಸೇವೆಗಳು ಮತ್ತು ದರ್ಶನಕ್ಕೆ ಸಂಬಂಧಿಸಿದ ಆನ್ಲೈನ್ ಟಿಕೆಟ್ಗಳು ಪ್ರತಿ ತಿಂಗಳು ನಿರ್ದಿಷ್ಟ ದಿನಾಂಕಗಳಲ್ಲಿ ಭಕ್ತರಿಗೆ ಲಭ್ಯವಿರುತ್ತವೆ ಎಂದು ತಿರುಪತಿ ತಿರುಮಲ ದೇವಸ್ಥಾನ ( ಟಿಟಿಡಿ ) ಟ್ರಸ್ಟ್ ಘೋಷಿಸಿದೆ. ದಿನಾಂಕಗಳ ಬಗ್ಗೆ ಅನಿಶ್ಚಿತತೆ ಮತ್ತು ಗೊಂದಲವನ್ನು ತಪ್ಪಿಸಲು ಪ್ರತಿಯೊಂದು ರೀತಿಯ ದರ್ಶನ ಟಿಕೆಟ್ಗಳ ಬಿಡುಗಡೆಗೆ ನಿರ್ದಿಷ್ಟ ದಿನಾಂಕವನ್ನು ನಿಗದಿಪಡಿಸಲು ಟಿಟಿಡಿ ನಿರ್ಧರಿಸಿದೆ.
ಸುಪ್ರಭಾತಂ, ತೋಮಾಲ ಮತ್ತು ಅರ್ಚನದಂತಹ ಮುಂಜಾನೆ ಆಚರಣೆಗಳ ಬುಕಿಂಗ್ಗಾಗಿ ಆನ್ಲೈನ್ ನೋಂದಣಿಯನ್ನು ಪ್ರತಿ ತಿಂಗಳ 18 ಮತ್ತು 20 ರ ನಡುವೆ ಮಾಡಲಾಗುತ್ತದೆ. ನಿಗದಿಪಡಿಸಿದ ಟಿಕೆಟ್ಗಳ ಪಾವತಿಗಳನ್ನು ಪ್ರತಿ ತಿಂಗಳು 20 ಮತ್ತು 22 ರ ನಡುವೆ ಸ್ವೀಕರಿಸಲಾಗುತ್ತದೆ.
ಸಾಮಾನ್ಯ ಆರ್ಜಿತ ಸೇವೆಗಳಾದ ಕಲ್ಯಾಣೋತ್ಸವ, ಡೋಲೋತ್ಸವ ಮತ್ತು ಇತರ ಹಗಲು ಧಾರ್ಮಿಕ ಕಾರ್ಯಕ್ರಮಗಳಿಗೆ ಸಂಬಂಧಿಸಿದ ಟಿಕೆಟ್ಗಳ ಆನ್ಲೈನ್ ಕೋಟಾವನ್ನು 21 ರಂದು ಕಾಯ್ದಿರಿಸಲಾಗುವುದು. ಹಿರಿಯ ನಾಗರಿಕರು, ವಿಶೇಷ ಮಕ್ಕಳು, ಪುಟ್ಟ ಮಕ್ಕಳೊಂದಿಗೆ ಬರುವ ಪೋಷಕರು, ಶ್ರೀವಾಣಿ ಮತ್ತು ಅಂಗಪ್ರದಕ್ಷಿಣಕ್ಕೆ ಸಂಬಂಧಿಸಿದ ಟಿಕೆಟ್ಗಳನ್ನು ಪ್ರತಿ ತಿಂಗಳು 23 ರಂದು ಬಿಡುಗಡೆ ಮಾಡಲಾಗುವುದು ಎಂದು ಟಿಟಿಡಿ ತಿಳಿಸಿದೆ.
ಆನ್ಲೈನ್ ಕೋಟಾದ ₹300 ವಿಶೇಷ ಪ್ರವೇಶ ದರ್ಶನ (ಎಸ್ಇಡಿ) ಟಿಕೆಟ್ಗಳನ್ನು 24 ರಂದು ಬಿಡುಗಡೆ ಮಾಡಲಾಗುವುದು, ಆದರೆ ವಸತಿ ಬುಕಿಂಗ್ ಪ್ರತಿ ತಿಂಗಳ 25 ರಂದು ಲಭ್ಯವಾಗಲಿದೆ.
ಮಹಾ ಅಂಗ ಪ್ರದಕ್ಷಿಣಂ (ದೇಗುಲವನ್ನು ಸುತ್ತುವರಿದಿರುವ ಮಾದ ಬೀದಿಗಳಲ್ಲಿ ಒದ್ದೆಯಾದ ಬಟ್ಟೆಯೊಂದಿಗೆ ಉರುಳುವುದು) ಮತ್ತು ದೇವಾಲಯದ ಪುಷ್ಕರಿಣಿ (ನೀರಿನ ತೊಟ್ಟಿ) ಯನ್ನು ಹಗಲಿರುಳು ತೆರೆದಿಡಲು ವ್ಯವಸ್ಥೆಗಳನ್ನು ಹೆಚ್ಚಿಸಲು ಟಿಟಿಡಿ ನಿರ್ಧರಿಸಿದೆ.
ಮೇ 17 ರಿಂದ ತಿರುಪತಿ ಕಡೆಗೆ 16 ಬೋಗಿಗಳ ವಂದೇ ಭಾರತ್ ರೈಲು
ಬುಧವಾರದಿಂದ, ಸಿಕಂದರಾಬಾದ್-ತಿರುಪತಿ ವಂದೇ ಭಾರತ್ ಎಕ್ಸ್ಪ್ರೆಸ್ ಪೂರ್ಣ ಪ್ರಮಾಣದ 16 ಕೋಚ್ಗಳನ್ನು ಹೊಂದಿರುತ್ತದೆ ಮತ್ತು ವೇಗವಾಗಿ ಚಲಿಸುತ್ತದೆ. ಎರಡೂ ದಿಕ್ಕಿನಲ್ಲಿ ತಲಾ 15 ನಿಮಿಷಗಳಷ್ಟು ಮುಂಚಿತವಾಗಿ ಗಮ್ಯಸ್ಥಾನವನ್ನು ತಲುಪುತ್ತದೆ.
ಕಳೆದ ತಿಂಗಳು ಪ್ರಧಾನಿ ನರೇಂದ್ರ ಮೋದಿ ಅವರು ಉದ್ಘಾಟಿಸಿದ ರೈಲು ಎಂಟು ಕೋಚ್ಗಳೊಂದಿಗೆ ಪ್ರಾರಂಭವಾಯಿತು. ಆದರೆ ಹಗಲಿನ ರೈಲಿಗೆ ಅಭೂತಪೂರ್ವ ಬೇಡಿಕೆಯಿಂದಾಗಿ ರೈಲ್ವೆಯು 530 ಆಸನಗಳಿಂದ 1,128 ಕ್ಕೆ ಸಾಮರ್ಥ್ಯವನ್ನು ದ್ವಿಗುಣಗೊಳಿಸಿದೆ ಎಂದು ಸೋಮವಾರ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.
ರೈಲು ಈಗಿನ ಎಂಟೂವರೆ ಗಂಟೆಗಳ ಅವಧಿಯ ಬದಲಾಗಿ ಎಂಟು ಗಂಟೆ, 15 ನಿಮಿಷಗಳಲ್ಲಿ ಎರಡೂ ದಿಕ್ಕುಗಳಲ್ಲಿ ತನ್ನ ಪ್ರಯಾಣವನ್ನು ಪೂರ್ಣಗೊಳಿಸುತ್ತದೆ. ಉದ್ಘಾಟನಾ ದಿನದಿಂದ, ಸೇವೆಯು ಶೇ 100 ಕ್ಕಿಂತ ಹೆಚ್ಚು ಆಕ್ಯುಪೆನ್ಸಿಗೆ ಸಾಕ್ಷಿಯಾಗಿದೆ.
ಇಲ್ಲಿಯವರೆಗೆ, 44,992 ಪ್ರಯಾಣಿಕರು ಎರಡೂ ದಿಕ್ಕುಗಳಲ್ಲಿ ವಂದೇ ಭಾರತ್ ಸೇವೆಯನ್ನು ಪಡೆದುಕೊಂಡಿದ್ದಾರೆ. 21,798 ಪ್ರಯಾಣಿಕರು ಸಿಕಂದರಾಬಾದ್ನಿಂದ ತಿರುಪತಿಗೆ ಮತ್ತು 23,194 ಪ್ರಯಾಣಿಕರು ತಿರುಪತಿಯಿಂದ ಸಿಕಂದರಾಬಾದ್ಗೆ ಪ್ರಯಾಣಿಸಿದ್ದಾರೆ.
ಹೊಸ ಸಂಯೋಜನೆಯ ರೈಲಿನಲ್ಲಿ 1,024 ಸಾಮರ್ಥ್ಯದ 14 ಚೇರ್ ಕಾರ್ಗಳು (478 ಸಾಮರ್ಥ್ಯದ ಹಿಂದಿನ ಆರು ಕಾರುಗಳ ಬದಲಿಗೆ) ಮತ್ತು 104 ಸಾಮರ್ಥ್ಯದ ಎರಡು ಎಕ್ಸಿಕ್ಯೂಟಿವ್ ವರ್ಗಗಳ (52 ಸಾಮರ್ಥ್ಯದ ಹಿಂದಿನ ಸಿಂಗಲ್ ಕೋಚ್ನ ಬದಲಾಗಿ) ಸೇವೆಯನ್ನು ನೀಡಲಾಗಿದೆ.
ಪರಿಷ್ಕೃತ ಸಮಯದ ಪ್ರಕಾರ, ಸಿಕಂದರಾಬಾದ್ನಿಂದ ತಿರುಪತಿಗೆ ರೈಲು ಸಂಖ್ಯೆ 20701 ಬೆಳಿಗ್ಗೆ 6.15 ಕ್ಕೆ ಹೊರಟು ಮಧ್ಯಾಹ್ನ 2.15 ಕ್ಕೆ ಗಮ್ಯಸ್ಥಾನವನ್ನು ತಲುಪುತ್ತದೆ. ಹಿಂದಿರುಗುವ ದಿಕ್ಕಿನಲ್ಲಿ, ರೈಲು ನಂ.20702 ತಿರುಪತಿಯಿಂದ ಮಧ್ಯಾಹ್ನ 3.15 ಕ್ಕೆ ಹೊರಡಲಿದೆ. ಮತ್ತು 11.30 ಗಂಟೆಗೆ ಸಿಕಂದರಾಬಾದ್ ತಲುಪುತ್ತದೆ.
Click it and Unblock the Notifications
Sign in with Google