Tirumala: ತಿರುಮಲ ಶ್ರೀವಾರಿಯ ಭಕ್ತರಿಗೆ ಪ್ರಮುಖ ಸೂಚನೆ.. ಈ ದಿನ ವಿಐಪಿ ದರ್ಶನ ರದ್ದು!
ಸಾಲು ಸಾಲು ಹಬ್ಬಗಳು ಆಗಮಿಸುತ್ತಿರುವ ಹಿನ್ನಲೆಯಲ್ಲಿ ತಿರುಮಲಕ್ಕೆ ಆಗಮಿಸುವ ಭಕ್ತರಿಗೆ ಟಿಟಿಡಿ ಪ್ರಮುಖ ಸೂಚನೆಯೊಂದನ್ನು ನೀಡಿದೆ. ಅಕ್ಟೋಬರ್ ತಿಂಗಳಿನಲ್ಲಿ ಒಂದು ದಿನ ವಿಐಪಿ ದರ್ಶನವನ್ನು ರದ್ದುಗೊಳಿಸಲಾಗಿದೆ. ಇದನ್ನು ಭಕ್ತರು ಗಮನಿಸಬೇಕು ಎಂದು ಟಿಟಿಡಿ ಮನವಿ ಮಾಡಿಕೊಂಡಿದೆ.
ಅಕ್ಟೋಬರ್ 1 ರಂದು ಶ್ರೀವಾರಿ ದೇವಸ್ಥಾನದಲ್ಲಿ ಕೊಯಿಲ್ ಆಳ್ವಾರ್ ತಿರುಮಂಜನ ನಡೆಯಲಿದೆ. ಅಕ್ಟೋಬರ್ 4 ರಿಂದ 12 ರವರೆಗೆ ನಡೆಯುವ ವಾರ್ಷಿಕ ಬ್ರಹ್ಮೋತ್ಸವದ ದೃಷ್ಟಿಯಿಂದ, ಮಂಗಳವಾರ (ಅಕ್ಟೋಬರ್ 1) ತಿರುಮಲ ದೇವಸ್ಥಾನವನ್ನು ಸ್ವಚ್ಛಗೊಳಿಸಲಾಗುತ್ತಿದೆ.
ಕೊಯಿಲ್ ಆಳ್ವಾರ್ ತಿರುಮಂಜನದ ಕಾರಣ ಅಕ್ಟೋಬರ್ 1 ರಂದು ವಿಐಪಿ ಬ್ರೇಕ್ ದರ್ಶನವನ್ನು (ಪ್ರೋಟೋಕಾಲ್ ವಿಐಪಿಗಳನ್ನು ಹೊರತುಪಡಿಸಿ) ಟಿಟಿಡಿ ರದ್ದುಗೊಳಿಸಿದೆ. ಹಾಗಾಗಿ ಸೆಪ್ಟೆಂಬರ್ 30ರಂದು ಯಾವುದೇ ಶಿಫಾರಸು ಪತ್ರಗಳು ಮಾನ್ಯಗೊಳಿಸಲಾಗುವುದಿಲ್ಲ ಎಂದು ಟಿಟಿಡಿ ತಿಳಿಸಿದೆ. ಭಕ್ತರು ಇದನ್ನು ಗಮನಿಸಿ ಸಂಘಟಕರಿಗೆ ಸಹಕರಿಸುವಂತೆ ಟಿಟಿಡಿ ವಿನಂತಿಸಿದೆ. ಮೇಲಾಗಿ ಅಂದು ದೇವಸ್ಥಾನದಲ್ಲಿ ಅಷ್ಟದಳ ಪಾದ ಪದ್ಮಾರಾಧನೆ ಸೇವೆಯನ್ನು ರದ್ದುಗೊಳಿಸಲಾಗುವುದು ಎಂದು ಟಿಟಿಡಿ ತಿಳಿಸಿದೆ.
ಕೋಯಿಲ್ ಎಂದರೆ ತಮಿಳಿನಲ್ಲಿ 'ಪವಿತ್ರ ದೇಗುಲ', ಆಳ್ವಾರ್ ಎಂದರೆ "ಭಕ್ತ", ತಿರು ಎಂದರೆ "ಆಕಾಶ", ಮಂಜನಂ ಎಂದರೆ "ಪವಿತ್ರ ಸ್ನಾನ". ಕೋಯಿಲ್ ಆಳ್ವಾರ್ ತಿರುಮಂಜನಂ ಅನ್ನು ಭಕ್ತರಿಂದ ಗರ್ಭಗುಡಿ ಮತ್ತು ದೇವಾಲಯದ ಆವರಣವನ್ನು ಶುದ್ಧೀಕರಿಸುವ ಆಚರಣೆ ಎಂದು ಹೇಳಲಾಗುತ್ತದೆ.
ಪ್ರತಿ ವರ್ಷ ನಾಲ್ಕು ಹಬ್ಬಗಳ (ಯುಗಾದಿ, ಅಣಿವಾರ ಆಸ್ಥಾನ, ಬ್ರಹ್ಮೋತ್ಸವ, ವೈಕುಂಠ ಏಕಾದಶಿ) ಹಿಂದಿನ ಮಂಗಳವಾರ ಕೊಯಿಲ್ ಆಳ್ವಾರ್ ತಿರುಮಂಜನವನ್ನು ನಡೆಸುವುದು ವಾಡಿಕೆ. ಕೋಯಿಲ್ ಆಳ್ವಾರ್ ತಿರುಮಂಜಂನಲ್ಲಿ ಆನಂದ ನಿಲಯದಿಂದ ಬಂಗಾರುವಾಕಿಲಿವರೆಗೆ ಶ್ರೀವಾರಿ ದೇವಸ್ಥಾನದ ಒಳಗಿನ ಉಪ ದೇವಾಲಯಗಳು, ದೇವಾಲಯ ಆವರಣ, ಗೋಡೆಗಳು, ಛಾವಣಿ, ಪೂಜಾ ಸಾಮಗ್ರಿಗಳು ಇತ್ಯಾದಿಗಳನ್ನು ನೀರಿನಿಂದ ಸ್ವಚ್ಛಗೊಳಿಸಲಾಗುತ್ತದೆ.
ಈ ಸಮಯದಲ್ಲಿ ತಿರುಮಲ ದೇವಸ್ಥಾನದಲ್ಲಿ ಸ್ವಾಮಿಯ ಮೂಲ ಮೂರ್ತಿಯನ್ನು ಸಂಪೂರ್ಣವಾಗಿ ಬಟ್ಟೆಯಿಂದ ಮುಚ್ಚಲಾಗುತ್ತದೆ. ಈ ದೇವಾಲಯದ ಶುದ್ಧೀಕರಣದ ನಂತರ ನಾಮಕೋಪು, ಶ್ರೀಚೂರ್ಣಂ, ಕರ್ಪೂರ, ಕಸ್ತೂರಿ ಅರಿಶಿನ, ಕುಂಕುಮ, ಶ್ರೀಗಂಧದ ಪುಡಿ ಮತ್ತು ಇತರ ವಸ್ತುಗಳೊಂದಿಗೆ ಬೆರೆಸಿದ ಪವಿತ್ರ ಸುಗಂಧ ದ್ರವ್ಯವನ್ನು ದೇವಾಲಯದಾದ್ಯಂತ ಸಿಂಪಡಿಸಲಾಗುತ್ತದೆ. ಈ ಕೋಯಿಲ್ ಆಳ್ವಾರ್ ತಿರುಮಂಜನಂ ಬೆಳಗ್ಗೆ 6 ರಿಂದ 10 ಗಂಟೆಯವರೆಗೆ ನಡೆಯುತ್ತದೆ. ಬಳಿಕ ಸ್ವಾಮಿಯ ಮೂರ್ತಿಗೆ ಹಾಕಿದ್ದ ಬಟ್ಟೆಯನ್ನು ತೆಗೆದು ವಿಶೇಷ ಪೂಜೆ, ನೈವೇದ್ಯ ಸಲ್ಲಿಸಿದ ಬಳಿಕ ಭಕ್ತರಿಗೆ ಶ್ರೀವಾರಿ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗಿದೆ.
ಪ್ರಸನ್ನ ವೆಂಕಟೇಶ್ವರ ದೇಗುಲದಲ್ಲಿ ಮಹಾಮಸ್ತಕಾಭಿಷೇಕ ಮಹೋತ್ಸವ
ಇನ್ನೂ ಪ್ರಸನ್ನ ವೆಂಕಟೇಶ್ವರ ಸ್ವಾಮಿ ದೇವಸ್ಥಾನದಲ್ಲಿ ಸೆಪ್ಟೆಂಬರ್ 28 ರಿಂದ 30 ರವರೆಗೆ ಮೂರು ದಿನಗಳ ಮಹಾಮಸ್ತಕಾಭಿಷೇಕ ನಡೆಯಲಿದೆ. ಈ ಸಂದರ್ಭದಲ್ಲಿ ಮೃತ್ಸಂಗ್ರಹಣ ಹಾಗೂ ಸೇನಾಧಿಪತಿ ಉತ್ಸವ ನಡೆಯಲಿದೆ. ವೈದಿಕ ಸಂಪ್ರದಾಯದ ಪ್ರಕಾರ, ಈ ಸಮಯದಲ್ಲಿ ದೇವಾಲಯದ ಪ್ರವೇಶವನ್ನು ನಿಷೇಧಿಸಲಾಗುತ್ತದೆ.
ಆದರೆ ಇಂತಹ ಸಮಯದಲ್ಲಿ ಕೆಲ ತಪ್ಪುಗಳು ಯಾತ್ರಾರ್ಥಿಗಳಿಂದ ಅಥವಾ ಸಿಬ್ಬಂದಿಯಿಂದ ತಿಳಿಯದೆ ಸಂಭವಿಸುತ್ತವೆ. ದೇವಾಲಯದ ಪಾವಿತ್ರ್ಯತೆಗೆ ಧಕ್ಕೆಯಾಗದಂತೆ ಪ್ರತಿವರ್ಷ ಪವಿತ್ರ ಉತ್ಸವಗಳನ್ನು ನಡೆಸುವುದು ವಾಡಿಕೆ. ಈ ಪವಿತ್ರ ಉತ್ಸವಗಳಲ್ಲಿ ವೇದಪಾಠ, ದೇವಾಲಯ ಸ್ವಚ್ಛತೆ ಮತ್ತು ಪುಣ್ಯಾಹವಾಚನದಂತಹ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತದೆ.
ಪವಿತ್ರೋತ್ಸವದ ಮೊದಲ ದಿನ ಸೆಪ್ಟೆಂಬರ್ 28 ರಂದು ಪವಿತ್ರ ಪ್ರತಿಷ್ಠೆ, ಸೆಪ್ಟೆಂಬರ್ 29 ರಂದು ಪವಿತ್ರ ಸಮರ್ಪಣ ಮತ್ತು ಪವಿತ್ರ ಹೋಮವನ್ನು ನಡೆಸಲಾಗುತ್ತದೆ. ಕೊನೆಯ ದಿನ ಸೆಪ್ಟೆಂಬರ್ 30 ರಂದು ಪವಿತ್ರ ವಿಸರ್ಜನೆ ನಡೆಯಲಿದೆ. ಪವಿತ್ರೋತ್ಸವದ ಸಂದರ್ಭದಲ್ಲಿ ಪ್ರತಿದಿನ ಬೆಳಗ್ಗೆ ಶ್ರೀದೇವಿ ಮತ್ತು ಭೂದೇವಿ ಸಮೇತ ಶ್ರೀ ಪ್ರಸನ್ನ ವೆಂಕಟೇಶ್ವರ ಸ್ವಾಮಿಗೆ ವಿಶೇಷ ಪೂಜೆ ಮಾಡುತ್ತಾರೆ.
Click it and Unblock the Notifications
Sign in with Google