Bournvita: 'ಬೌರ್ನ್ವಿಟಾ' ಆರೋಗ್ಯ ಪಾನೀಯವಲ್ಲ! ಕೇಂದ್ರ ಸರ್ಕಾರ ಕೊಟ್ಟ ಆದೇಶವೇನು?
'ಬೌರ್ನ್ವಿಟಾ'ದಲ್ಲಿ ಮಕ್ಕಳ ಆರೋಗ್ಯದ ಮೇಲೆ ಪರಿಣಾಮ ಉಂಟುಮಾಡುವ ಅಂಶಗಳಿವೆ ಎನ್ನುವ ವಿಡಿಯೋ ವೈರಲ್ ಆಗಿದ್ದು, ಸಾಕಷ್ಟು ವಿವಾದದ ಬಳಿಕ ಕೇಂದ್ರ ಸರ್ಕಾರ ಮಹತ್ವದ ಆದೇಶ ನೀಡಿದೆ.
ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯವು ಇ-ಕಾಮರ್ಸ್ ಕಂಪನಿಗಳಿಗೆ ಸಲಹೆ ನೀಡಿದ್ದು, ಅವರ ಪೋರ್ಟಲ್ ಮತ್ತು ಪ್ಲಾಟ್ಫಾರ್ಮ್ಗಳಲ್ಲಿ ಬೌರ್ನ್ವಿಟಾ ಸೇರಿದಂತೆ ಎಲ್ಲಾ ಪಾನೀಯಗಳನ್ನು 'ಆರೋಗ್ಯಕರ ಪಾನೀಯ' ವರ್ಗದಿಂದ ತೆಗೆದುಹಾಕುವಂತೆ ನಿರ್ದೇಶನ ನೀಡಿದೆ.
ಮಕ್ಕಳ ಹಕ್ಕುಗಳ ರಕ್ಷಣಾ ರಾಷ್ಟ್ರೀಯ ಆಯೋಗ (NCPCR), ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗದ (CPCR) ಕಾಯಿದೆಯ ಸೆಕ್ಷನ್ (3) ಅಡಿಯಲ್ಲಿ ರಚಿತವಾದ ಶಾಸನಬದ್ಧ ಸಂಸ್ಥೆಯಾದ ಸಿಆರ್ ಪಿಸಿ (CRPC) ಕಾಯಿದೆ 2005 ರ ಸೆಕ್ಷನ್ 14 ರ ಅಡಿಯಲ್ಲಿ ವಿಚಾರಣೆಯ ನಂತರ, ಎಫ್ಎಸ್ಎಸ್ ಕಾಯಿದೆ 2006 ರ ಅಡಿಯಲ್ಲಿ ವ್ಯಾಖ್ಯಾನಿಸಲಾದ ಎಫ್ಎಸ್ಎಸ್ಎಐ ಮತ್ತು ಮೊಂಡೆಲೆಜ್ ಇಂಡಿಯಾ ಫುಡ್ ಪ್ರೈವೇಟ್ ಲಿಮಿಟೆಡ್ ಸಲ್ಲಿಸಿದ ನಿಯಮಗಳು ಮತ್ತು ನಿಬಂಧನೆಗಳ ಪ್ರಕಾರ ಬೌರ್ನ್ವಿಟಾ ಆರೋಗ್ಯ ಪಾನೀಯವಲ್ಲ ಎಂದು ಸಚಿವಾಲಯವು ಏಪ್ರಿಲ್ 10 ರ ಅಧಿಸೂಚನೆಯಲ್ಲಿ ತಿಳಿಸಿದೆ.
ಎನ್ಸಿಪಿಸಿಆರ್ನ ತನಿಖೆಯಲ್ಲಿ ಬೌರ್ನ್ವಿಟಾ ಸ್ವೀಕಾರಾರ್ಹ ಮಿತಿಗಳಿಗಿಂತ ಹೆಚ್ಚು ಸಕ್ಕರೆ ಪ್ರಮಾಣವನ್ನು ಹೊಂದಿದೆ ಎಂದು ತಿಳಿದುಕೊಂಡಿದೆ.
ಕ್ರಮ ತೆಗೆದುಕೊಳ್ಳಲು ಸೂಚನೆ
ಮಕ್ಕಳ ಹಕ್ಕುಗಳ ರಕ್ಷಣಾ ರಾಷ್ಟ್ರೀಯ ಆಯೋಗವು (NCPCR) ಸುರಕ್ಷತಾ ಮಾನದಂಡಗಳು ಮತ್ತು ಮಾರ್ಗಸೂಚಿಗಳನ್ನು ಅನುಸರಿಸಲು ವಿಫಲವಾದ, ಪವರ್ ಸಪ್ಲಿಮೆಂಟ್ಗಳನ್ನು 'ಆರೋಗ್ಯ ಪಾನೀಯಗಳು' ಎಂದು ಬಿಂಬಿಸುತ್ತಿರುವ ಕಂಪನಿಗಳ ವಿರುದ್ಧ ಕ್ರಮ ಕೈಗೊಳ್ಳಲು ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಆದೇಶ ನೀಡಿತ್ತು.
ದೇಶದ ಆಹಾರ ಕಾನೂನುಗಳಲ್ಲಿ 'ಆರೋಗ್ಯ ಪಾನೀಯಗಳ' ಬಗ್ಗೆ ವ್ಯಾಖ್ಯಾನ ನೀಡಿಲ್ಲ. ಆರೋಗ್ಯ ಪಾನೀಯಗಳೆಂದು ಏನನ್ನಾದರೂ ಮಾರಾಟ ಮಾಡುವುದು ನಿಯಮಗಳ ಉಲ್ಲಂಘನೆಯಾಗುತ್ತದೆ.
ಏಪ್ರಿಲ್ ಆರಂಭದಲ್ಲಿ ಡೈರಿ ಆಧಾರಿತ ಅಥವಾ ಮಾಲ್ಟ್ ಆಧಾರಿತ ಪಾನೀಯಗಳನ್ನು ಆರೋಗ್ಯ ಪಾನೀಯಗಳು ಎಂದು ಕರೆಯದಂತೆ ಎಫ್ಎಸ್ಎಸ್ಎಐ ಇ-ಕಾಮರ್ಸ್ ಪೋರ್ಟಲ್ಗಳಿಗೆ ಸೂಚನೆ ನೀಡಿತ್ತು.
ಬೌರ್ನ್ವಿಟಾ ಆರೋಗ್ಯ ಪಾನೀಯವಲ್ಲ!
ಯೂಟ್ಯೂಬರ್ ತನ್ನ ವಿಡಿಯೋದಲ್ಲಿ ಬೌರ್ನ್ವಿಟಾದ ಅನಾರೋಗ್ಯಕರ ಸ್ವಭಾವದ ಬಗ್ಗೆ ವಿಡಿಯೋ ಮಾಡಿದಾಗ ವಿವಾದ ಶುರುವಾಗಿತ್ತು. ಅವರು ತನ್ನ ವಿಡಿಯೋದಲ್ಲಿ ಬೌರ್ನ್ವಿಟಾದಲ್ಲಿ ಅತಿಯಾದ ಸಕ್ಕರೆ, ಕೋಕೋ ಘನವಸ್ತುಗಳು ಮತ್ತು ಹಾನಿಕಾರಕ ಬಣ್ಣಗಳು ಕ್ಯಾನ್ಸರ್ ಸೇರಿದಂತೆ ಮಕ್ಕಳಲ್ಲಿ ಗಂಭೀರವಾದ ಆರೋಗ್ಯದ ಅಪಾಯಗಳಿಗೆ ಕಾರಣವಾಗಬಹುದು ಎಂದು ಹೇಳಿದ್ದರು.
Click it and Unblock the Notifications
Sign in with Google