ತ್ರಿಪುರದಲ್ಲಿ ಅಲ್ಪಸಂಖ್ಯಾತರ ಓಲೈಕೆಗೆ ಮುಂದಾದ ಬಿಜೆಪಿ?!
ಅಗರ್ತಲ, ಜನವರಿ 29: ಈಶಾನ್ಯ ರಾಜ್ಯಗಳಲ್ಲಿ ನಡೆಯಲಿರುವ ವಿಧಾನಸಭೆ ಚುನಾವಣೆಗೆ ಈಗಾಗಲೇ ಪ್ರಚಾರ ಕಾರ್ಯಗಳು ಆರಂಭವಾಗಿದ್ದು, ಫೆ. 18 ರಂದು ತ್ರಿಪುರದಲ್ಲಿ ನಡೆಯಲಿರುವ ಚುನಾವಣೆಗೆ ಬಿಜೆಪಿ ತನ್ನ ಪಕ್ಷದಿಂದ 8 ಅಭ್ಯರ್ಥಿಗಳ ಹೆಸರನ್ನು ಜ.28 ರಂದು ಘೋಷಿಸಿದೆ.
ಈ ಪಟ್ಟಿಯಲ್ಲಿ ಬಾಹರುಲ್ ಇಸ್ಲಾಂ ಮಜುಂದಾರ್ ಅವರ ಹೆಸರೂ ಇದ್ದು, ಬಿಜೆಪಿ ಅಲ್ಪಸಂಖ್ಯಾತರಿಗೆ ಮಣೆಹಾಕಿರುವುದು ಸ್ಪಷ್ಟವಾಗಿದೆ. ಬಕ್ಷನಗರ್ ವಿಧಾನಸಭಾ ಕ್ಷೇತ್ರದಿಂದ ಇಸ್ಲಾಂ ಅವರಿಗೆ ಟಿಕೇಟ್ ನೀಡಲಾಗಿದೆ.
ಈಶಾನ್ಯ ರಾಜ್ಯಗಳ ಚುನಾವಣೆ ದಿನಾಂಕ ಘೋಷಣೆ: ಫೆ.18, 27 ಕ್ಕೆ ಮತದಾನ
ತ್ರಿಪುರದ ಒಟ್ಟು 60 ಕ್ಷೇತ್ರಗಳಲ್ಲಿ ಬಿಜೆಪಿ ತನ್ನ 51 ಅಭ್ಯರ್ಥಿಗಳನ್ನು ಕಣಕ್ಕಿಳಿಸಲಿದೆ. ಇಲ್ಲಿನ ಸ್ಥಳೀಯ ಪಕ್ಷವಾದ ಇಂಡಿಜಿನಿಯಸ್ ಪೀಪಲ್ಸ್ ಫ್ರಂಟ್ ಆಫ್ ತ್ರಿಪುರ(ಐಪಿಎಫ್ ಟಿ)ದೊಂದಿಗೆ ಮೈತ್ರಿ ಮಾಡಿಕೊಳ್ಳಲಿರುವ ಬಿಜೆಪಿ, ಈ ಪಕ್ಷದಿಂದ 9 ಅಭ್ಯರ್ಥಿಗಳಿಗೆ ಟಿಕೇಟ್ ನೀಡಲಿದೆ.
ಫೆಬ್ರವರಿ 18(ಭಾನುವಾರ) ರಂದು ಒಂದೇ ಹಂತದಲ್ಲಿ ಚುನಾವಣೆ ನಡೆಯಲಿದ್ದು, ಫಲಿತಾಂಶ ಮಾರ್ಚ್ 3(ಶನಿವಾರ) ಹೊರಬೀಳಲಿದೆ.