ಪ್ರವಾಸಿಗರನ್ನು ಸೆಳೆದ ಬಿಂಕದಕಟ್ಟಿ ಮೃಗಾಲಯದ ನೂತನ ಅತಿಥಿಗಳು
ಗದಗ, ಜುಲೈ 10 : ಬಿಂಕದಕಟ್ಟಿ ಮೃಗಾಲಯದ ನೂತನ ಅತಿಥಿಗಳು ಪ್ರವಾಸಿಗರನ್ನು ಸೆಳೆಯುತ್ತಿವೆ. ಪ್ರತಿದಿನ ಸುಮಾರು 500 ಪ್ರವಾಸಿಗರು ಮೃಗಾಲಯಕ್ಕೆ ಭೇಟಿ ನೀಡುತ್ತಿದ್ದಾರೆ.
ಗದಗ ಜಿಲ್ಲೆಯ ಬಿಂಕದಕಟ್ಟಿ ಮೃಗಾಲಯಕ್ಕೆ ಆರು ತಿಂಗಳ ಹಿಂದೆ ಎರಡು ಹುಲಿಗಳನ್ನು ಮೈಸೂರಿನ ಮೃಗಾಲಯದಿಂದ ತರಲಾಗಿತ್ತು. ಹುಲಿಗಳನ್ನು ಪ್ರವಾಸಿಗರ ದರ್ಶನಕ್ಕೆ ಮುಕ್ತಗೊಳಿಸಿ ಆರು ತಿಂಗಳು ಕಳೆದಿದೆ.
ಮೈಸೂರಿನಿಂದ ಅನಸೂಯಾ ಮತ್ತು ಲಕ್ಷಣ ಎಂಬ ಹುಲಿಗಳನ್ನು ತರಲಾಗಿತ್ತು. ಜನವರಿಯಲ್ಲಿ ಅವುಗಳನ್ನು ಪ್ರವಾಸಿಗರ ದರ್ಶನಕ್ಕೆ ಮುಕ್ತಗೊಳಿಸಲಾಗಿದೆ. ಹುಲಿಗಳನ್ನು ನೋಡಲು ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಆಗಮಿಸುತ್ತಿದ್ದಾರೆ.
ಸಾಮಾನ್ಯ ದಿನಗಳಲ್ಲಿ 400 ರಿಂದ 500 ಜನರು, ಶನಿವಾರ ಮತ್ತು ಭಾನುವಾರ ಸುಮಾರು 700 ಜನರು ಮೃಗಾಲಯಕ್ಕೆ ಭೇಟಿ ನೀಡುತ್ತಿದ್ದಾರೆ. ಹುಲಿಗಳನ್ನು ನೋಡಲು ಜನರು ಆಗಮಿಸುತ್ತಿರುವುದರಿಂದ ಮೃಗಾಲಯದ ವರಮಾನವೂ ಹೆಚ್ಚಾಗುತ್ತಿದೆ.
ಅನಸೂಯಾ ಮತ್ತು ಲಕ್ಷಣ ಹುಲಿಗಳನ್ನು ಬೇರೆ ಬೇರೆಯಾಗಿಯೇ ಇಡಲಾಗಿದೆ. ಅವುಗಳು ಹೊಂದಿಕೊಂಡ ಬಳಿಕ ಒಟ್ಟಿಗೆ ಬಿಡಲು ಮೃಗಾಲಯದ ಅಧಿಕಾರಿಗಳು ನಿರ್ಧರಿಸಿದ್ದಾರೆ. ಮೃಗಾಲಯದಲ್ಲಿ ಮೂಲ ಸೌಕರ್ಯಗಳನ್ನು ಅಭಿವೃದ್ಧಿ ಪಡಿಸಲಾಗುತ್ತಿದ್ದು, ಪ್ರವಾಸಿಗರನ್ನು ಸೆಳೆಯಲು ಹಲವು ಯೋಜನೆಗಳನ್ನು ಹಾಕಿಕೊಳ್ಳಲಾಗಿದೆ.
ಬಿಂಕದಕಟ್ಟಿ ಮೃಗಾಲಯ ಸುಮಾರು 40 ಎಕರೆ ವಿಸ್ತೀರ್ಣದಲ್ಲಿದೆ. ಮೊದಲು ಕಿರುಮೃಗಾಲಯವಾಗಿತ್ತು, ಈಗ ಸಣ್ಣ ಮೃಗಾಲಯ ಎಂದು ಬಡ್ತಿ ನೀಡಲಾಗಿದೆ. ಮೃಗಾಲಯದ ಆವರಣದಲ್ಲಿ 2.5 ಕಿ.ಮೀ. ಉದ್ದದ ವಾಕಿಂಗ್ ಪಥ ನಿರ್ಮಾಣ ಮಾಡಲಾಗಿದೆ.
ಕಳೆದ ಆರು ತಿಂಗಳಿನಲ್ಲಿ ಮೃಗಾಲಯಕ್ಕೆ 69,765 ಪ್ರವಾಸಿಗರು ಭೇಟಿ ನೀಡಿದ್ದಾರೆ. 14.76 ಲಕ್ಷ ಆದಾಯ ಬಂದಿದೆ. ಮಳೆಗಾಲದ ಬಳಿಕ ಮತ್ತಷ್ಟು ಪ್ರವಾಸಿಗರು ಭೇಟಿ ನೀಡುವ ನಿರೀಕ್ಷೆ ಇದೆ.
Click it and Unblock the Notifications
Sign in with Google