Sandhya Devanathan : ಮೆಟಾ ಇಂಡಿಯಾದ ಹೊಸ ಮುಖ್ಯಸ್ಥೆ ಸಂಧ್ಯಾ ದೇವನಾಥನ್ ಹಿನ್ನೆಲೆ ಏನು?

Updated: Friday, November 18, 2022, 9:34 [IST]

ದೈತ್ಯ ಟೆಕ್ ಕಂಪನಿಗಳು ಈಗ ದೊಡ್ಡ ಬದಲಾವಣೆಗೆ ಒಳಗಾಗುತ್ತಿವೆ. ಅಮೆಜಾನ್, ಫೇಸ್‌ಬುಕ್, ಟ್ವಿಟ್ಟರ್‌ನಂತಹ ಕಂಪನಿಗಳಲ್ಲಿ ಜನರನ್ನು ವಜಾಗೊಳಿಸಿ ಕೆಲವರನ್ನು ನೇಮಿಸಿಕೊಳ್ಳುವ ಪ್ರಕ್ರಿಯೆ ನಡೆಯುತ್ತಿದೆ. ಈಗ ಫೇಸ್‌ಬುಕ್‌ನ ಮಾತೃ ಸಂಸ್ಥೆಯಾದ ಮೆಟಾದಲ್ಲಿ ನೇಮಕಾತಿಗೆ ಸಂಬಂಧಿಸಿದ ಹೊಸ ಬೆಳವಣಿಗೆಯಾಗಿದೆ. ಮೆಟಾಗೆ ಸಂಧ್ಯಾ ದೇವನಾಥನ್ ಅವರನ್ನು ಭಾರತದ ಹೊಸ ಮುಖ್ಯಸ್ಥೆ ಮತ್ತು ಉಪಾಧ್ಯಕ್ಷರನ್ನಾಗಿ ನೇಮಿಸಿದೆ. ಈ ಮೊದಲು ಅಜಿತ್ ಮೋಹನ್ ಈ ಜವಾಬ್ದಾರಿಯನ್ನು ನಿಭಾಯಿಸುತ್ತಿದ್ದರು. ಅಜಿತ್ ಮೋಹನ್ ಅವರು ಈ ತಿಂಗಳ ಆರಂಭದಲ್ಲಿ ಈ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ.

ಸಂಧ್ಯಾ ದೇವನಾಥನ್ ಮುಂದಿನ ಜನವರಿ 1, 2023ರಿಂದ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಸಂಧ್ಯಾ ಏಷ್ಯಾ ಪೆಸಿಫಿಕ್ ವಲಯದ (APAC) ಮೆಟಾದ ಉಪಾಧ್ಯಕ್ಷ ಡಾನ್ ನಿಯರಿಗೆ ವರದಿ ಮಾಡುತ್ತಾರೆ. ಸಂಧ್ಯಾ ಅವರನ್ನು ಗೇಮಿಂಗ್‌ನಲ್ಲಿ ಪರಿಣಿತಿ ಎಂದು ಪರಿಗಣಿಸಲಾಗುತ್ತದೆ ಮತ್ತು ಅವರು ಗೇಮಿಂಗ್ ಉದ್ಯಮಕ್ಕೆ ಪ್ರವೇಶಿಸಲು ಮಹಿಳೆಯರಿಗೆ ಸ್ಫೂರ್ತಿ ನೀಡುತ್ತಾರೆ. ಮಾಧ್ಯಮ ವರದಿಗಳ ಪ್ರಕಾರ, ಅಜಿತ್ ಮೋಹನ್ ಈಗ ಸ್ನ್ಯಾಪ್‌ಚಾಟ್‌ನೊಂದಿಗೆ ಇನ್ನಿಂಗ್ಸ್ ಪ್ರಾರಂಭಿಸಲಿದ್ದಾರೆ.

ಅಜಿತ್ ಮೋಹನ್ ಅವರು ಜನವರಿ 2019ರಲ್ಲಿ ಫೇಸ್‌ಬುಕ್ ಇಂಡಿಯಾದಲ್ಲಿ ವ್ಯವಸ್ಥಾಪಕ ನಿರ್ದೇಶಕರಾಗಿ ಅಧಿಕಾರ ವಹಿಸಿಕೊಂಡರೆ, ಸಂಧ್ಯಾ ದೇವನಾಥನ್ ಅವರು 2016ರಿಂದ ಫೇಸ್‌ಬುಕ್‌ಗಾಗಿ ಕೆಲಸ ಮಾಡುತ್ತಿದ್ದಾರೆ ಮತ್ತು ಕಂಪನಿಯ ವ್ಯವಹಾರವನ್ನು ಸಿಂಗಾಪುರ ಮತ್ತು ವಿಯೆಟ್ನಾಂಗೆ ವಿಸ್ತರಿಸುವ ಜವಾಬ್ದಾರಿಯನ್ನು ಹೊಸ ಹೊತ್ತಿದ್ದಾರೆ.

ಸಂಧ್ಯಾ ದೇವನಾಥನ್ 2020ರಲ್ಲಿ ಏಷ್ಯಾ ಪೆಸಿಫಿಕ್ ವಲಯದ (APAC) ಪ್ರದೇಶಕ್ಕಾಗಿ ಗೇಮಿಂಗ್ ವಿಂಗ್ ಮುನ್ನಡೆಸಿದ್ದರು. ಅವರು ಮೆಟಾನಲ್ಲಿ ಮಹಿಳಾ ಏಷ್ಯಾ ಪೆಸಿಫಿಕ್ ವಲಯದ ಕಾರ್ಯನಿರ್ವಾಹಕ ಪ್ರಾಯೋಜಕರಾಗಿದ್ದಾರೆ. ದೇವನಾಥನ್ ಅವರು ಗೇಮಿಂಗ್ ಮಾರುಕಟ್ಟೆಯಲ್ಲಿ ಬದಲಾವಣೆಯನ್ನು ಮಾಡಲು ಮೆಟಾದ ಪ್ರಮುಖ ಯೋಜನೆಯಾದ ಪ್ಲೇ ಫಾರ್ವರ್ಡ್‌ಗೆ ಜಾಗತಿಕವಾಗಿ ಈಗ ನಾಯಕರಾಗಿದ್ದಾರೆ.

ಸಂಧ್ಯಾ ದೇವನಾಥನ್ ಶಿಕ್ಷಣ

ಸಂಧ್ಯಾ ದೇವನಾಥನ್ ಅವರ ಲಿಂಕ್ಡ್‌ಇನ್ ಪ್ರೊಫೈಲ್‌ನ ಪ್ರಕಾರ, ಸಂಧ್ಯಾ 1994-1998ರ ಅವಧಿಯಲ್ಲಿ ಆಂಧ್ರ ವಿಶ್ವವಿದ್ಯಾಲಯದಿಂದ ಕೆಮಿಕಲ್ ಎಂಜಿನಿಯರಿಂಗ್‌ನಲ್ಲಿ ಬಿ.ಟೆಕ್ ಮಾಡಿದ್ದಾರೆ. ಇನ್ನು 1998-2000 ಬ್ಯಾಚ್‌ನ ದೆಹಲಿ ವಿಶ್ವವಿದ್ಯಾಲಯದ ಮ್ಯಾನೇಜ್‌ಮೆಂಟ್ ಸ್ಟಡೀಸ್ ಫ್ಯಾಕಲ್ಟಿಯಿಂದ ಎಂಬಿಎ ಸ್ನಾತಕೋತರ ಪದವಿ ಮುಗಿಸಿದ್ದಾರೆ. ಎಂಬಿಎ ಮುಗಿದ ನಂತರ ಸಂಧ್ಯಾ ಅಂದಿನಿಂದ ಮೆಟಾದಲ್ಲಿ ಕೆಲಸ ಮಾಡುತ್ತಿದ್ದಾರೆ.

ಸಿಟಿಬ್ಯಾಂಕ್‌ನಲ್ಲಿಯೂ ಕೆಲಸ ಮಾಡಿರುವ ಸಂಧ್ಯಾ

ಮೇ, 2000ರಲ್ಲಿ ಸಿಟಿಬ್ಯಾಂಕ್‌ನೊಂದಿಗೆ ವೆಬ್‌ಮಾಸ್ಟರ್ ಮತ್ತು ಉತ್ಪನ್ನ ನಿರ್ವಾಹಕರಾಗಿ (ಸಿಟಿಬ್ಯಾಂಕ್ ಆನ್‌ಲೈನ್, ಇ-ಬಿಸಿನೆಸ್ ತಂಡ) ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ಅವರು ಒಂಬತ್ತು ವರ್ಷ ಎಂಟು ತಿಂಗಳ ಕಾಲ ಸಿಟಿಬ್ಯಾಂಕ್‌ನಲ್ಲಿ ಕೆಲಸ ಮಾಡಿದರು. ಇದರ ನಂತರ ಅವಳು ಸ್ಟ್ಯಾಂಡರ್ಡ್ ಚಾರ್ಟರ್ಡ್ ಬ್ಯಾಂಕ್ ಅನ್ನು ಸೇರಿದಳು. ಇಲ್ಲಿ ಅವರು ಆರು ವರ್ಷ ಮತ್ತು ಒಂದು ತಿಂಗಳು ಕೆಲಸ ಮಾಡಿದರು.

ದೇವನಾಥನ್ 2016ರಲ್ಲಿ ಮೆಟಾಗೆ ನೇಮಕ

ಸಂಧ್ಯಾ ದೇವನಾಥನ್ ಅವರು 2020 ರಲ್ಲಿ ಮಹಿಳಾ ಏಷ್ಯಾ ಪೆಸಿಫಿಕ್ ವಲಯದ ಪ್ರದೇಶದಲ್ಲಿ ಗೇಮಿಂಗ್ ವಲಯವನ್ನು ಮುನ್ನಡೆಸಿದ್ದಾರೆ. ದೇವನಾಥನ್ ಅವರು ವುಮೆನ್@ಎಪಿಎಸಿಗೆ ಕಾರ್ಯನಿರ್ವಾಹಕ ಪ್ರಾಯೋಜಕರಾಗಿದ್ದಾರೆ ಮತ್ತು ಗೇಮಿಂಗ್ ಉದ್ಯಮ ಪ್ಲೇ ಫಾರ್ವರ್ಡ್‌ಗೆ ಜಾಗತಿಕ ನಾಯಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಇದರೊಂದಿಗೆ, ಅವರು ಹಣಕಾಸು ಸೇವೆಗಳ ಜಾಗತಿಕ ಮಂಡಳಿಯಲ್ಲಿದ್ದಾರೆ. ಆರ್ಥಿಕ ಹಿಂಜರಿತ ಮತ್ತು ಜಾಗತಿಕ ಸವಾಲುಗಳಿಂದಾಗಿ ಕಂಪನಿಯು ತನ್ನ ಶೇಕಡಾ 13ರಷ್ಟು ಉದ್ಯೋಗಿಗಳನ್ನು ಅಂದರೆ ಸುಮಾರು 11,000 ಉದ್ಯೋಗಿಗಳನ್ನು ವಜಾಗೊಳಿಸಿರುವ ಸಮಯದಲ್ಲಿ ಸಂಧ್ಯಾ ದೇವನಾಥನ್ ಕಂಪನಿಯ ಜವಾಬ್ದಾರಿಯನ್ನು ವಹಿಸಿಕೊಳ್ಳುತ್ತಿದ್ದಾರೆ.

ಸ್ನ್ಯಾಪ್‌ಚಾಟ್ ಕಂಪನಿಗೆ ಹಾರಿದ ಅಜಿತ್ ಮೋಹನ್

ಅಜಿತ್ ಮೋಹನ್ ಮೆಟಾವನ್ನು ತೊರೆದು ಏಷ್ಯಾ ಪೆಸಿಫಿಕ್ ವ್ಯವಹಾರದ ಮುಖ್ಯಸ್ಥರಾಗಿ ಸ್ನ್ಯಾಪ್‌ಚಾಟ್ ಕಂಪನಿಯನ್ನು ಸೇರಿಕೊಂಡರು. ಇದರೊಂದಿಗೆ ಭಾರತದಲ್ಲಿ ವಾಟ್ಸಾಪ್‌ನ್ನು ಮುನ್ನಡೆಸಿದ್ದ ಅಭಿಜಿತ್ ಬೋಸ್ ಮತ್ತು ಕಂಪನಿಯ ಸಾರ್ವಜನಿಕ ನೀತಿ ನಿರ್ದೇಶಕರಾಗಿದ್ದ ರಾಜಿ ಅಗರ್ವಾಲ್ ಕೂಡ ಮೆಟಾವನ್ನು ತೊರೆದಿದ್ದಾರೆ.

ಸದ್ಯ ಹೊಸ ಮುಖ್ಯಸ್ಥೆ ಸಂಧ್ಯಾ ದೇವನಾಥನ್ 22 ವರ್ಷಗಳ ಅನುಭವವನ್ನು ಹೊಂದಿದ್ದಾರೆ ಮತ್ತು ಬ್ಯಾಂಕಿಂಗ್, ಪಾವತಿ ಮತ್ತು ತಂತ್ರಜ್ಞಾನದಲ್ಲಿ ಅಂತರರಾಷ್ಟ್ರೀಯ ವೃತ್ತಿಜೀವನದಲ್ಲಿ ಸಾಕಷ್ಟು ಅನುಭವ ಹೊಂದಿದ್ದಾರೆ.