ಇನ್ಫಿ ಷೇರು ಹಿಂತೆಗೆತ, ಪ್ರತಿ ಷೇರಿಗೆ 1,150 ರುಪಾಯಿ ನಿಗದಿ

ಬೆಂಗಳೂರು, ಆಗಸ್ಟ್ 19: ಇನ್ಫೋಸಿಸ್ ಷೇರು ಹಿಂತೆಗೆತಕ್ಕೆ ಸಂಬಂಧಿಸಿದಂತೆ ಶನಿವಾರ ಮಹತ್ವದ ಘೋಷಣೆ ಹೊರಬಿದ್ದಿದೆ. ಕಂಪನಿಯ ಸಿಇಒ ಹಾಗೂ ಎಂ.ಡಿ. ಸ್ಥಾನಕ್ಕೆ ವಿಶಾಲ್ ಸಿಕ್ಕಾ ರಾಜೀನಾಮೆ ನೀಡಿದ ನಂತರ ಹದಿಮೂರು ಸಾವಿರ ಕೋಟಿ ಮೊತ್ತದ ಷೇರು ಹಿಂಪಡೆಯುವ ನಿರ್ಧಾರಕ್ಕೆ ಸಂಬಂಧಿಸಿದಂತೆ ಮಾಹಿತಿ ಹೊರಬಿದ್ದಿದೆ.

11,30,43,478 ಷೇರುಗಳನ್ನು ಹಿಂಪಡೆಯಲಿರುವ ಕಂಪನಿ, ಅದಕ್ಕಾಗಿ ಪ್ರತಿ ಷೇರಿಗೆ 1,150 ರುಪಾಯಿ ನೀಡಲಿದೆ. ಶುಕ್ರವಾರ ಮಾರುಕಟ್ಟೆ ಮುಕ್ತಾಯದ ವೇಳೆಗೆ ಇನ್ಫೋಸಿಸ್ ನ ಷೇರು ದರ ರು. 923.10 ಇದೆ. ಆ ಮೊತ್ತಕ್ಕಿಂತ ಶೇ ಇಪ್ಪತ್ತೈದರಷ್ಟು ಹೆಚ್ಚು ಮೊತ್ತವನ್ನು ಹಿಂತೆಗೆತಕ್ಕೆ ನಿಗದಿ ಮಾಡಲಾಗಿದೆ.

ಕಳೆದ ಏಪ್ರಿಲ್ ನಲ್ಲಿ ಈ ಬಗ್ಗೆ ಇನ್ಫೋಸಿಸ್ ಘೋಷಣೆ ಮಾಡಿತ್ತು. ಡಿವಿಡೆಂಡ್ ಹಾಗೂ ಷೇರು ಹಿಂತೆಗೆತದ ಮೂಲಕ ಹದಿಮೂರು ಸಾವಿರ ಕೋಟಿ ನೀಡುವುದಾಗಿ ತಿಳಿಸಿತ್ತು. ಸದ್ಯಕ್ಕೆ ಕಂಪನಿ ಬಳಿ 6.1 ಬಿಲಿಯನ್ ಅಮೆರಿಕನ್ ಡಾಲರ್ ನಷ್ಟು ಹೆಚ್ಚು ನಗದು ಇದೆ. ತಜ್ಞರು ಅಭಿಪ್ರಾಯ ಪಡುವ ಪ್ರಕಾರ, ಷೇರು ಹಿಂತೆಗೆತದ ನಂತರ ಈ ನಗದ ಪ್ರಮಾಣ ಮೂರನೇ ಒಂದು ಭಾಗದಷ್ಟು ಕಡಿಮೆ ಆಗುತ್ತದೆ.

ಇತ್ತೀಚೆಗೆ ಟಿಸಿಎಸ್ ಕಂಪನಿ 16 ಸಾವಿರ ಕೋಟಿ, ವಿಪ್ರೋ 11 ಸಾವಿರ ಕೋಟಿ ಹಾಗೂ ಎಚ್ ಸಿಎಲ್ ಟೆಕ್ನಾಲಜಿ 3,500 ಕೋಟಿ ಮೌಲ್ಯದ ಷೇರು ಹಿಂಪಡೆಯುವ ನಿರ್ಧಾರ ಪ್ರಕಟಿಸಿದ್ದವು.

English summary

The Infosys company would buy back 11 crore shares aggregating up to 4.92 per cent of the paid-up equity capital at a price of Rs 1,150.