ಬೆಂಗಳೂರು: ಮಳೆಯಿಂದ ಸ್ಲಂ ನಿವಾಸಿಗಳ ಪರದಾಟ, ಬಿಬಿಎಂಪಿಗೆ ಸ್ಥಳಾಂತರವೇ ಸವಾಲು

ಬೆಂಗಳೂರು, ಜೂನ್. 11: ಮುಂಗಾರು ಪೂರ್ವ ತುಂತುರು ಮಳೆಯಿಂದಾಗಿ ನಗರದಲ್ಲಿ ಜನಜೀವನ ಅಸ್ತವ್ಯಸ್ತಗೊಂಡಿದ್ದು, ಭಾರೀ ಮಳೆಯಿಂದಾಗಿ ಹಲವು ಭಾಗಗಳು ಜಲಾವೃತಗೊಂಡಿವೆ. ಪ್ರವಾಹಕ್ಕೆ ಈಡಾದ ರಸ್ತೆಗಳು ಮತ್ತು ನೆಲಮಾಳಿಗೆಯಲ್ಲಿ ನಿಂತು ಜನರು ಕಷ್ಟಪಡುತ್ತಿರುವಾಗಲೇ, ನಗರದಲ್ಲಿನ ಕೊಳೆಗೇರಿ ನಿವಾಸಿಗಳು ಮಳೆಯಿಂದ ಕನಿಷ್ಠ ರಕ್ಷಣೆ ನೀಡುವ ತಾತ್ಕಾಲಿಕ ಕ್ರಮಗಳನ್ನು ಅವಲಂಬಿಸಬೇಕಾಗಿದೆ.

ಪ್ರತಿಬಾರಿ ಮಳೆಗಾಲದ ಮೊದಲು ಬಿಬಿಎಂಪಿ ಅಧಿಕಾರಿಗಳು ನಗರದಲ್ಲಿನ ಈ ಕೊಳಚೆ ಪ್ರದೇಶಗಳಿಗೆ ಭೇಟಿ ನೀಡಿ ನಿವಾಸಿಗಳನ್ನು ಸ್ಥಳಾಂತರವಾಗುವಂತೆ ಕೇಳುತ್ತಿದ್ದರು. ಇಲ್ಲದಿದ್ದರೆ ಅವರಿಗೆ ಯಾವುದೇ ಪರಿಹಾರವನ್ನು ನೀಡಲಾಗುವುದಿಲ್ಲ ಎಂದು ಎಚ್ಚರಿಸಿದ್ದಾರೆ ಎಂದು ಬಿಬಿಎಂಪಿ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಆದರೆ, ಖಾಸಗಿ ಸಂಸ್ಥೆಗಳ ಒಳಗೊಳ್ಳುವಿಕೆಯಿಂದಾಗಿ ಜನರನ್ನು ಸ್ಥಳಾಂತರಿಸುವುದು ಸವಾಲಾಗಿ ಉಳಿದಿದೆ.

"ಖಾಸಗಿ ಸಂಸ್ಥೆಗಳು ರಾಜ್ಯದ ಇತರ ರಾಜ್ಯಗಳು ಅಥವಾ ಇತರ ಜಿಲ್ಲೆಗಳಿಂದ ಬರುವ ಹೆಚ್ಚಿನ ಸಂಖ್ಯೆಯ ಜನರಿಗೆ ಖಾಸಗಿ ಭೂಮಿಯಲ್ಲಿ ಇರಲು ಅವಕಾಶ ಕಲ್ಪಿಸಲಾಗುತ್ತದೆ. ಇದರಿಂದ ಅವು ಹಣವನ್ನು ತೆಗೆದುಕೊಳ್ಳುತ್ತವೆ. ಆದರೆ, ಸ್ಲಂಗಳು ಅವು ಅಲ್ಲಿ ಇರಬಾರದು. ಏಕೆಂದರೆ ವಸತಿ ಭೂಮಿಯಾಗಿ ಪರಿವರ್ತನೆಯಾಗುವ ಕಂದಾಯ ಭೂಮಿಗೆ ಕೆಲವು ಸುರಕ್ಷತೆಗಳಿವೆ. ಆದರೆ ಈ ಸಂದರ್ಭದಲ್ಲಿ ಅವರು (ಖಾಸಗಿಯವರು) ಕಂದಾಯ ಭೂಮಿಯಲ್ಲಿ ಶೆಡ್‌ಗಳನ್ನು ನಿರ್ಮಿಸುತ್ತಿದ್ದಾರೆ. ಇದು ಸವಾಲಾಗಿದೆ" ಎಂದು ಅಧಿಕಾರಿಯೊಬ್ಬರು ಡೆಕ್ಕನ್ ಹೆರಾಲ್ಡ್‌ಗೆ ತಿಳಿಸಿದ್ದಾರೆ.

"ಇದು ಮಾನವೀಯ ಸಮಸ್ಯೆಯಾಗಿರುವುದರಿಂದ, ಖಾಸಗಿ ಭೂಮಿಯಲ್ಲಿ ವಸತಿಗಳನ್ನು ನಿರ್ಮಿಸಲು ಜನರನ್ನು ಹೊಣೆಗಾರರನ್ನಾಗಿ ಮಾಡುವುದು ಕಷ್ಟವಾಗಿದೆ. ಕಾನೂನಿನ ಪ್ರಕಾರ, ಕಂದಾಯ ಭೂಮಿಯಲ್ಲಿ ಜನರು ಏಕೆ ನೆಲೆಸಲು ಅವಕಾಶ ನೀಡಿದರು ಎಂಬುದರ ಕುರಿತು ಭೂ ಮಾಲೀಕರನ್ನು ಪ್ರಶ್ನಿಸಲು ನಮಗೆ ಅವಕಾಶವಿದೆ, ಅದು ಕಂದಾಯ ಇಲಾಖೆಯ ಮೊದಲ ಜವಾಬ್ದಾರಿಯಾಗಿದೆ" ಎಂದು ಮಾಹಿತಿ ನೀಡಿದ್ದಾರೆ.

ನಗರದಲ್ಲಿ ಅಂದಾಜು 80ರಿಂದ 100 ಅಘೋಷಿತ ಕೊಳೆಗೇರಿಗಳಿವೆ. ಘೋಷಿತ ಕೊಳೆಗೇರಿಗಳು ಕೋರ್ ಪ್ರದೇಶಗಳಲ್ಲಿವೆ ಮತ್ತು ಮಳೆಗಾಲದಲ್ಲಿ ಹೆಚ್ಚಿನ ಸಮಸ್ಯೆಗಳನ್ನು ಎದುರಿಸುವುದಿಲ್ಲ. ಏಕೆಂದರೆ ಬಿಬಿಎಂಪಿಯು ನೀರು ತ್ವರಿತವಾಗಿ ಹೊರಹೋಗಲು ಮತ್ತು ಮಳೆಗಾಲದಲ್ಲಿ ಜಲಾವೃತವಾಗುವುದನ್ನು ತಡೆಯಲು ಕಾಲುವೆಗಳನ್ನು ನಿರ್ಮಿಸಿದೆ. ಆದರೆ ಬಿಬಿಎಂಪಿಯ ಪ್ರಮುಖ ಕಾಳಜಿ ಇರುವುದು ತಗ್ಗು ಪ್ರದೇಶಗಳಲ್ಲಿನ ಅನಧಿಕೃತ ಕೊಳೆಗೇರಿಗಳ ಬಗ್ಗೆ. ಇವು ಪ್ರವಾಹಕ್ಕೆ ಒಳಗಾಗುವ ಸಾಧ್ಯತೆಯಿದೆ" ಎಂದು ಬಿಬಿಎಂಪಿ ಅಧಿಕಾರಿ ಹೇಳಿದ್ದಾರೆ.

ಕರ್ನಾಟಕ ಕೊಳೆಗೇರಿ ಅಭಿವೃದ್ಧಿ ಮಂಡಳಿಯು (KSDB) ರಾಜಕಾಲುವೆಗಳ ಸಮೀಪ ವಾಸಿಸುವ ಮತ್ತು ಪ್ರವಾಹಕ್ಕೆ ಒಳಗಾಗುವ ಪ್ರದೇಶಗಳಲ್ಲಿ ವಾಸಿಸುವ ಕೊಳೆಗೇರಿ ನಿವಾಸಿಗಳಿಗೆ ಪುನರ್ವಸತಿ ಕಲ್ಪಿಸಲು ಕ್ರಮಗಳನ್ನು ಕೈಗೊಂಡಿದೆ. ಆದರೆ ಇದು, ನಗರದಲ್ಲಿನ 410 ಘೋಷಿತ ಕೊಳೆಗೇರಿಗಳಲ್ಲಿ ಮಾತ್ರ. ಕಗ್ಗದಾಸಪುರ ಮತ್ತು ಬೆನ್ನಿಗಾನಹಳ್ಳಿಯಲ್ಲಿರುವವುಗಳು ಅಘೋಷಿತ ಕೊಳೆಗೇರಿಗಳಾಗಿವೆ. ಆದ್ದರಿಂದ ಇವು ಅವರ ಅಧಿಕಾರ ವ್ಯಾಪ್ತಿಯಲ್ಲಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನಗರದಲ್ಲಿ ಘೋಷಿತ ಕೊಳೆಗೇರಿಗಳಲ್ಲಿ ಪ್ರವಾಹದ ಬಗ್ಗೆ ನಮಗೆ ಯಾವುದೇ ವರದಿಗಳು ಬಂದಿಲ್ಲವಾದರೂ, ನಾವು ಈಗಾಗಲೇ ಪ್ರವಾಹ ಸಂಭವಿಸಬಹುದಾದ ಪ್ರದೇಶಗಳನ್ನು ಸಮೀಕ್ಷೆ ಮಾಡಿದ್ದೇವೆ ಮತ್ತು ಆ ಪ್ರದೇಶಗಳಿಂದ ಜನರನ್ನು ಸ್ಥಳಾಂತರಿಸಿದ್ದೇವೆ ಎಂದು ಕೆಎಸ್‌ಡಿಬಿ ಆಯುಕ್ತ ಬಿ ವೆಂಕಟೇಶ್ ಹೇಳಿದ್ದಾರೆ. 10 ರಿಂದ 15 ಘೋಷಿತ ಕೊಳೆಗೇರಿಗಳ ನಿವಾಸಿಗಳನ್ನು ಲಗ್ಗೆರೆ ಮತ್ತು ತಾವರೆಕೆರೆಗೆ ಸ್ಥಳಾಂತರಿಸಲಾಗಿದೆ ಎಂದಿದ್ದಾರೆ.

ಕಗ್ಗದಾಸಪುರದ ಸ್ಲಂಗಳ ಜನರನ್ನು ಮಾತಾಡಿಸಿರುವ ಡೆಕ್ಕನ್ ಹೆರಾಲ್ಡ್‌ಗೆ, ಮಳೆಯ ನೀರಿನಿಂದ ತಮ್ಮ ಟೆಂಟ್‌ಗಳಿಗೆ ನೀರು ನುಗ್ಗಿ ರಾತ್ರಿ ಮಲಗಲು ಹೇಗೆ ಸಾಧ್ಯವಾಗುತ್ತಿಲ್ಲ ಎಂದು ನಿವಾಸಿಗಳು ವಿವರಿಸಿದ್ದಾರೆ. ಛಾವಣಿಗಳಲ್ಲಿ ಸೋರಿಕೆಯಾಗಿದೆ ಎಂದು ನಿವಾಸಿಗಳು ಮಾಹಿತಿ ನೀಡಿದ್ದಾರೆ. ಒಂದು ಕೊಳೆಗೇರಿಯಲ್ಲಿ ಸರಿಸುಮಾರು 70 ರಿಂದ 80 ಜನರು ಒಟ್ಟಿಗೆ ವಾಸಿಸುತ್ತಿದ್ದರು, ಅವರಲ್ಲಿ 20 ಮಕ್ಕಳಿದ್ದಾರೆರೆ. ಇಕ್ಕಟ್ಟಾದ ಜಾಗದಲ್ಲಿ ಸಾಮಾನ್ಯ ಮಾನ್ಸೂನ್ ಕಾಯಿಲೆಗಳಿಗೆ ಒಳಗಾಗುವಂತೆ ಮಾಡಿದೆ.

ನಿಂತ ನೀರು ಸೊಳ್ಳೆಗಳ ಹಾವಳಿಯ ಅಪಾಯವನ್ನು ಹೆಚ್ಚಿಸಿದೆ, ಜೊತೆಗೆ ನೈರ್ಮಲ್ಯ ಸೌಲಭ್ಯಗಳ ಕೊರತೆಯು ಈಗಾಗಲೇ ಗಂಭೀರವಾದ ಆರೋಗ್ಯ ಸಮಸ್ಯೆಗಳನ್ನು ತಂದಿದೆ. ಇಲ್ಲಿ ಶೌಚಾಲಯಗಳಿಲ್ಲ, ಹೀಗಾಗಿ ಸಮೀಪದ ಮೈದಾನಕ್ಕೆ ಹೋಗುತ್ತೇವೆ ಎಂದು ನಿವಾಸಿಯೊಬ್ಬರು ತಿಳಿಸಿದ್ದಾರೆ. ಬೆನ್ನಿಗಾನಹಳ್ಳಿಯ ಕೊಳೆಗೇರಿಯಲ್ಲೂ ಇದೇ ಸ್ಥಿತಿ ಮುಂದುವರಿದಿದೆ.

ಬಹುತೇಕ ಕೊಳೆಗೇರಿ ನಿವಾಸಿಗಳು ಕಟ್ಟಡ ನಿರ್ಮಾಣ ಸ್ಥಳಗಳಲ್ಲಿ ಮತ್ತು ಸರ್ಕಾರಿ ಶಾಲೆಗಳಲ್ಲಿ ಕಾರ್ಮಿಕರಾಗಿ ಕೆಲಸ ಮಾಡುತ್ತಿದ್ದರು ಮತ್ತು ಬಿಬಿಎಂಪಿಯಲ್ಲಿಯೂ ಕೆಲಸ ಮಾಡುತ್ತಿದ್ದಾರೆ. ಇವರು ತಮ್ಮ ವೇತನದ ಹೆಚ್ಚಿನ ಭಾಗವನ್ನು ಭೂಮಾಲೀಕರಿಗೆ ಬಾಡಿಗೆ ಪಾವತಿಸಲು ಖರ್ಚು ಮಾಡಿದ್ದಾರೆ. ಇಲ್ಲಿಯವರೆಗೆ ಯಾವೊಬ್ಬ ಅಧಿಕಾರಿಗಳು ಭೇಟಿ ನೀಡಿಲ್ಲ, ಸಮಸ್ಯೆಗೆ ಸ್ಪಂದಿಸಿಲ್ಲ ಎಂದು ಆರೋಪಿಸಿದ್ದಾರೆ.

(ಮಾಹಿತಿ ಕೃಪೆ : ಡೆಕ್ಕನ್ ಹೆರಾಲ್ಡ್‌)

English summary

Struggle of slum dwellers in Bengaluru due to heavy rains. relocation is a challenge for Bruhat Bengaluru Mahanagara Palike (BBMP). know more.