ಕೆರೆಗಳ ಬಫರ್ ಝೋನ್: ಎನ್‌ಜಿಟಿಗೆ ಮತ್ತೆ ಮೊರೆ ಹೋಗಲು ಚಿಂತನೆ

ಬೆಂಗಳೂರು, ಆಗಸ್ಟ್ 31: ಬೆಂಗಳೂರಿನ ಕೆರೆಗಳ ಸುತ್ತ 75 ಮೀಟರ್ ಬಫರ್ ಝೋನ್ ಅಂತರ ಪಾಲಿಸಬೇಕೆಂಬ ಎನ್ ಜಿಟಿ ಆದೇಶವನ್ನು ಪ್ರಶ್ನಿಸಿ ಮತ್ತೆ ಎನ್‌ಜಿಟಿಗೆ ಮೊರೆ ಹೋಗಲು ಸರ್ಕಾರ ಚಿಂತನೆ ನಡೆಸಿದೆ.

ವಿಧಾನಸೌಧದಲ್ಲಿ ಶುಕ್ರವಾರ ಸಂಜೆ ಅಧಿಕಾರಿಗಳ ಜತೆ ಚರ್ಚೆ ನಡೆಸಿದ ಉಪಮುಖ್ಯಮಂತ್ರಿ ಜಿ ಪರಮೇಶ್ವರ ಈ ವಿಷಯ ತಿಳಿಸಿದರು. ದೇಶದ ಯಾವುದೇ ನಗರ, ಪಟ್ಟಣಗಳಲ್ಲಿ ಜಾರಿಯಲ್ಲಿರದ 75 ಮೀಟರ್ ಅಂತರದ ಬಫರ್ ಝೋನ್ ಬೆಂಗಳೂರಿನಲ್ಲಿ ಮಾತ್ರ ಜಾರಿಯಲ್ಲಿದೆ. ಮಳೆ ನೀರು ಗಾಲುವೆಗಳ ಸುತ್ತ 35 ಮೀಟರ್ ಕಾಯ್ದುಕೊಳ್ಳುವ ನಿಯಮವನ್ನು ಬೆಂಗಳೂರಿಗೆ ಮಾತ್ರ ಹೇರಲಾಗಿದೆ.

ಎನ್‌ಜಿಟಿಯ ಈ ಆದೇಶವನ್ನು ಮೊದಲ ಹಂತದಲ್ಲಿ ಎನ್‌ಜಿಟಿಯಲ್ಲಿಯೇ ಪ್ರಶ್ನಿಸಿ ನಂತರ ಅಗತ್ಯ ಬಿದ್ದರೆ ಸುಪ್ರೀಂಕೋರ್ಟ್ ಗೆ ಮೊರೆ ಹೋಗಲು ಚಿಂತನೆ ನಡೆದಿದೆ. ಈ ಬಗ್ಗೆ ಅಡ್ವೊಕೇಟ್ ಜನರಲ್ ಸೇರಿದಂತೆ ವಿವಿಧ ಇಲಾಖೆಗಳ ಮುಖ್ಯಸ್ಥರ ಸಭೆ ಕರೆದು ಅಂತಿಮ ನಿರ್ಧಾರ ಕೈಗೊಳ್ಳಲಾಗುವುದು ಎಂದು ತಿಳಿಸಿದರು.

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !