ಬೆಂಗಳೂರಿನಲ್ಲಿ ಗಗನಕ್ಕೇರಿದ ಮನೆ ಬಾಡಿಗೆ: ಟೆಕ್ಕಿಗಳಿಗೆ ಎದುರಾದ ಸಂಕಷ್ಟ- ಅಂಕಿಅಂಶ, ವರದಿ, ವಿವರ ತಿಳಿಯಿರಿ

Updated: Sunday, April 2, 2023, 21:14 [IST]

ಬೆಂಗಳೂರು, ಮಾರ್ಚ್‌ 10: ವರ್ಕ್‌ ಫ್ರಂ ಹೋಮ್‌ನಲ್ಲಿದ್ದ ಟೆಕ್ಕಿಗಳಿಗೆ ಕಚೇರಿಗೆ ಮರಳಲು ಕಂಪನಿಗಳು ಆದೇಶಿಸಿವೆ. ಸಿಲಿಕಾನ್‌ ವ್ಯಾಲಿ ಬೆಂಗಳೂರಿನಲ್ಲಿ ಕೆಲಸ ಮಾಡುವವರು ತಮ್ಮ ಊರುಗಳಿಂದ ನಗರಕ್ಕೆ ಹಿಂದಿರುಗುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಟೆಕ್ಕಿಗಳು ಈಗ ಹೊಸ ಸಮಸ್ಯೆಯೊಂದನ್ನು ಎದುರಿಸುತ್ತಿದ್ದಾರೆ. ಕಾರಣ ನಗರದಲ್ಲಿನ ಟೆಕ್ ಕಾರಿಡಾರ್‌ಗಳಲ್ಲಿ ಮತ್ತು ಸುತ್ತಮುತ್ತಲಿನ ವಸತಿಗಳ ಬಾಡಿಗೆ ಗಗನಕ್ಕೇರಿದೆ ಎಂದು 'ಟೈಮ್ಸ್‌ ಆಫ್‌ ಇಂಡಿಯಾ' ವರದಿ ಮಾಡಿದೆ. ವರದಿಯೊಂದಿಗೆ ಅಂಕಿಅಂಶ, ವಿವರಗಳನ್ನೂ ನೀಡಿದೆ.

2023 ರಲ್ಲಿ ನಗರದಲ್ಲಿ ವಸತಿ ಬಾಡಿಗೆಗಳು ಶೇಕಡಾ 15-30 ರಷ್ಟು ಹೆಚ್ಚಿವೆ ಎಂದು ರಿಯಲ್ ಎಸ್ಟೇಟ್ ತಜ್ಞರು ಹೇಳಿದರೆ, ಹೆಚ್ಚಿನ ಬೇಡಿಕೆಯ ನಡುವೆ ಕೆಲವು ಭೂಮಾಲೀಕರು ತಾತ್ವಿಕ ಒಪ್ಪಂದಗಳನ್ನು ತ್ಯಜಿಸುತ್ತಿದ್ದಾರೆ ಮತ್ತು ಬಾಡಿಗೆ ಅಪಾಟ್‌ಮೆಂಟ್‌ಗೆ ಹೆಚ್ಚಿನ ಬಿಡ್ಡರ್ ಅನ್ನು ಆಯ್ಕೆ ಮಾಡುತ್ತಿದ್ದಾರೆ.

ಕಳೆದ ಸೆಪ್ಟೆಂಬರ್‌ನಲ್ಲಿ ವಾರದಲ್ಲಿ ಮೂರು ದಿನಗಳ ಕಾಲ ಕಚೇರಿಯಿಂದ ಕೆಲಸ ಮಾಡಲು ನಮಗೆ ತಿಳಿಸಲಾಗಿದೆ. ಅಲ್ಲಿಯವರೆಗೆ, ಅನೇಕ ಉದ್ಯೋಗಿಗಳು ತಮ್ಮ ಊರಿನಿಂದ ಕೆಲಸ ಮಾಡುತ್ತಿದ್ದರು. ಇದೀಗ ಮಾರತ್ತಹಳ್ಳಿಯಿಂದ ದೊಮ್ಮಲೂರಿಗೆ ತನ್ನ ಕಚೇರಿ ಸ್ಥಳಾಂತರಗೊಂಡಿರುವ ಹಿನ್ನೆಲೆಯಲ್ಲಿ ದೊಮ್ಮಲೂರು ಅಥವಾ ಮುರುಗೇಶಪಾಳ್ಯದಲ್ಲಿ 2020ರಲ್ಲಿ 600-900 ಚದರ ಅಡಿ ವಿಸ್ತೀರ್ಣದ 2 ಬಿಎಚ್‌ಕೆ ಅಪಾರ್ಟ್‌ಮೆಂಟ್ ಮಾಸಿಕ 15,000 ರಿಂದ 20,000 ರೂ.ವರೆಗೆ ಬಾಡಿಗೆಗೆ ಇದ್ದ ಮನೆ ಈಗ 30,000 ರೂಪಾಯಿ ಆಗಿದೆ ಎಂದು 34 ವರ್ಷದ ಐಟಿ ವೃತ್ತಿಪರ ಸುಜೋಯ್ ಸೆಟ್ ತಿಳಿಸಿದ್ದಾರೆ.

ಪ್ರತಿದಿನ ತನ್ನ ಕಚೇರಿಯನ್ನು ತಲುಪಲು ಸುಮಾರು ಒಂದು ಗಂಟೆ ಬೇಕಾತ್ತದೆ. ಐಟಿ ವೃತ್ತಿಪರರು 2022ರ ಮಧ್ಯದಿಂದ ಸೂಕ್ತವಾದ ಬಾಡಿಗೆ ವಸತಿ ಪಡೆಯಲು ಪ್ರಯತ್ನಿಸುತ್ತಿದ್ದಾರೆ. ಆದರೆ ಬಾಡಿಗೆಗಳು ಗಗನಕ್ಕೇರಿದೆ. ಅವರ ವರ್ಗಾವಣೆ ಮಾಡಬಹುದಾದ ಉದ್ಯೋಗವನ್ನು ಗಮನಿಸಿದರೆ, ಬೆಂಗಳೂರಿನಲ್ಲಿ ಆಸ್ತಿಯನ್ನು ಖರೀದಿಸುವ ಬಗ್ಗೆ ಯೋಚನೆಯನ್ನೇ ಬಿಡಬೇಕಾಗುತ್ತದೆ ಎಂದು ಅವರು ಹೇಳಿದರು.

ಬಾಡಿಗೆ ಅಪಾರ್ಟ್‌ಮೆಂಟ್ ಈಗ 50,000 ರೂಪಾಯಿ

ಹೂಡಿ ಎಂಬಲ್ಲಿಗೆ ಸ್ಥಳಾಂತರಗೊಳ್ಳಲು ಬಯಸುತ್ತಿರುವ 31 ವರ್ಷದ ಸಾಫ್ಟ್‌ವೇರ್ ಇದೇ ರೀತಿಯ ಪರಿಸ್ಥಿತಿಯನ್ನು ಎದುರಿಸುತ್ತಿದ್ದಾರೆ. ಅಲ್ಲಿ ಅವರು 2020 ರಲ್ಲಿ ತಿಂಗಳಿಗೆ 25,000 ರೂ.ಗೆ ನೀಡಲಾಗುತ್ತಿರುವ ಅಪಾರ್ಟ್‌ಮೆಂಟ್ ಈಗ 50,000 ರೂಪಾಯಿ ಆಗಿದೆ ಎಂದು ತಿಳಿಸಿದ್ದಾರೆ. ಬೆಂಗಳೂರಿನಲ್ಲಿ 1000 ಚದರ ಅಡಿ ವಿಸ್ತೀರ್ಣದ 3 ಬಿಎಚ್‌ಕೆ ಫ್ಲಾಟ್ ಖರೀದಿಸಲು ಸುಮಾರು 1.6 ಕೋಟಿ ವೆಚ್ಚವಾಗುತ್ತದೆ. ಅದು ಮೂರು ವರ್ಷಗಳ ನಂತರ ಮಾತ್ರ ವಿತರಿಸಲಾಗುವುದು. ಆದಾಗಲೂ, ಅಂತಹ ಅಪಾರ್ಟ್‌ಮೆಂಟ್‌ ತನ್ನ ಜೀವಿತಾವಧಿಯಲ್ಲಿ ಇಎಂಐ ಅನ್ನು ತೆರವುಗೊಳಿಸಲು ಅವರಿಗೆ ಸಾಧ್ಯವಾಗುವುದಿಲ್ಲ ಎಂದು ತಿಳಿಸಿದರು.

ಬಾಡಿಗೆಯು ಸರಾಸರಿ ಶೇಕಡಾ 15-30 ರಷ್ಟು ಹೆಚ್ಚಳ

ಬೆಂಗಳೂರಿನ ಟೆಕ್ ಕಾರಿಡಾರ್‌ಗಳ ಬಳಿ ಬಾಡಿಗೆ ವಸತಿಗಾಗಿ ಹುಡುಕುತ್ತಿರುವ ಅನೇಕರು ತಮ್ಮ ನಿವೇಶನಗಳನ್ನು ಬಾಡಿಗೆಗೆ ನೀಡಲು ಹಿಂದೆ ಬದ್ಧರಾಗಿದ್ದ ಭೂಮಾಲೀಕರು ಉತ್ತಮ ಗ್ರಾಹಕರನ್ನು ಕಂಡುಕೊಂಡ ನಂತರ ತಮ್ಮ ಮಾತಿಗೆ ತಪ್ಪುತ್ತಿದ್ದಾರೆ ಎಂದು ಅವರು ತಿಳಿಸಿದ್ದಾರೆ. ರಿಯಲ್ ಎಸ್ಟೇಟ್ ದಲ್ಲಾಳಿಗಳ ಪ್ರಕಾರ, ಬಾಡಿಗೆಯು ಸರಾಸರಿ ಶೇಕಡಾ 15-30 ರಷ್ಟು ಹೆಚ್ಚಾಗಿದೆ. ಪ್ರಸ್ತುತ ಹೆಚ್ಚಿನ ಜನರು ಕಚೇರಿಯಿಂದ ಕೆಲಸ ಮಾಡಲು ಹೋಗುತ್ತಿರುವ ಕಾರಣ ಹೆಚ್ಚಿನ ಬೇಡಿಕೆ ಬಂದಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

2 ಬಿಎಚ್‌ಕೆ ಮನೆಗೆ 40,000 ರೂ ಬಾಡಿಗೆ

ಸೆವೆನ್‌ರಾಜ್ ಎಸ್ಟೇಟ್ ಏಜೆನ್ಸಿಯ ಸಿಎಂಡಿ ಮತ್ತು ಬೆಂಗಳೂರು ರಿಯಲ್ಟರ್ಸ್ ಅಸೋಸಿಯೇಷನ್ ಆಫ್ ಇಂಡಿಯಾದ ಸದಸ್ಯ ಸೆವೆನ್ ರಾಜ್ ಮಾತನಾಡಿ, ಕ್ಲಬ್‌ಹೌಸ್, ಸೆಕ್ಯುರಿಟಿ, ಸ್ವಿಮ್ಮಿಂಗ್ ಪೂಲ್ ಹೊಂದಿರುವ ಎ-ಗ್ರೇಡ್ ಅಪಾರ್ಟ್‌ಮೆಂಟ್‌ಗಳಲ್ಲಿ 2 ಬಿಎಚ್‌ಕೆ ಮನೆಯು ಸುಮಾರು 40,000 ರೂಪಾಯಿ ಮೂಲ ಬಾಡಿಗೆಗೆ ಇದೆ. ಹೆಚ್ಚಿನ ಬಾಡಿಗೆಯನ್ನು ಪಾವತಿಸುವ ಬದಲು ಅನೇಕರು 80 ಲಕ್ಷದಿಂದ ಒಂದು ಕೋಟಿ ರೂ.ವರೆಗಿನ 2 ಬಿಎಚ್‌ಕೆ ಅಪಾರ್ಟ್‌ಮೆಂಟ್‌ಗಳನ್ನು ಖರೀದಿಸಲು ಮುಂದಾಗುತ್ತಿದ್ದಾರೆ ಎಂದು ಅವರು ಹೇಳಿದರು.

ಮನೆಯ ಭದ್ರತಾ ಠೇವಣಿ ಇಳಿಕೆ

ಹೆಚ್ಚಿನ ಬಾಡಿಗೆಗಳ ದೃಷ್ಟಿಯಿಂದ ಮೊದಲು 10 ತಿಂಗಳ ಬಾಡಿಗೆಗೆ ಸಮನಾಗಿರುವ ಭದ್ರತಾ ಠೇವಣಿಯನ್ನು ಈಗ ಆರು ತಿಂಗಳಿಗೆ ಅಥವಾ ಅದಕ್ಕಿಂತ ಕಡಿಮೆಗೆ ಇಳಿಸಲಾಗಿದೆ ಎಂದು ದಲ್ಲಾಳಿಗಳು ಹೇಳಿದ್ದಾರೆ. ಏತನ್ಮಧ್ಯೆ, ರಿಯಲ್ ಎಸ್ಟೇಟ್ ಸಲಹೆಗಾರ ಮೋಹನ್ ಎಂ ಅವರು ಬನ್ನೇರುಘಟ್ಟ ರಸ್ತೆ, ಐಟಿಪಿಎಲ್, ಸರ್ಜಾಪುರ, ಸಿವಿ ರಾಮನ್ ನಗರ, ಮಾರತಹಳ್ಳಿ ಮತ್ತು ಎಚ್‌ಎಸ್‌ಆರ್ ಲೇಔಟ್‌ನ ಟೆಕ್ ಕಾರಿಡಾರ್‌ಗಳಲ್ಲಿ ಬಾಡಿಗೆಯಲ್ಲಿ ಶೇಕಡಾ 15 ರಷ್ಟು ಹೆಚ್ಚಳವಾಗಿದೆ ಎಂದು ತಿಳಿಸಿದ್ದಾರೆ.

ಸರಾಸರಿ ಬಾಡಿಗೆಗಳಲ್ಲಿ ಶೇಕಡಾ 10.8 ರಷ್ಟು ಏರಿಕೆ

ಮ್ಯಾಜಿಕ್‌ಬ್ರಿಕ್ಸ್ ಸಂಶೋಧನೆಯು 2021ಕ್ಕೆ ಹೋಲಿಸಿದರೆ 2022ರಲ್ಲಿ ಸರಾಸರಿ ಬಾಡಿಗೆಗಳಲ್ಲಿ ಶೇಕಡಾ 10.8 ರಷ್ಟು ಏರಿಕೆಯಾಗಿರುವುದನ್ನು ತೋರಿಸುತ್ತದೆ. ಟೆಕ್ ಪಾರ್ಕ್ ಪ್ರದೇಶಗಳಲ್ಲಿನ ಸುಸಜ್ಜಿತ 1ಬಿಎಚ್‌ಕೆ ಅಪಾರ್ಟ್‌ಮೆಂಟ್‌ಗಳು ತಿಂಗಳಿಗೆ 7,500ರಿಂದ 31,000 ರೂಪಾಯಿ 2ಬಿಎಚ್‌ಕೆಗೆ 8,000 ರಿಂದ 58,000 ರೂಪಾಯಿ, 3ಬಿಎಚ್‌ಕೆಗೆ 12,000 ರಿಂದ ಒಂದು ಲಕ್ಷ ರೂಪಾಯಿವರೆಗೂ ಬಾಡಿಗೆ ಇದೆ ಎಂದು ತಿಳಿಸಿದೆ.

2023ರಲ್ಲಿ ಬಾಡಿಗೆ ವಸತಿಗಳು ಮತ್ತಷ್ಟು ಹೆಚ್ಚು

2023ರಲ್ಲಿ ಸ್ಥಳ, ಆಸ್ತಿ ಮತ್ತು ಬಿಲ್ಡರ್ ಪ್ರಕಾರದಂತಹ ಅಂಶಗಳನ್ನು ಅವಲಂಬಿಸಿ ಪ್ರಮುಖ ಮಾರುಕಟ್ಟೆಗಳಲ್ಲಿ ವಿಶೇಷತೆ ಹೊಂದಿರುವ ಬಾಡಿಗೆ ವಸತಿಗಳು ಶೇಕಡಾ 5 ರಿಂದ 10 ರಷ್ಟು ಹೆಚ್ಚಾಗಬಹುದು ಎಂದು ರಿಯಲ್ ಎಸ್ಟೇಟ್ ಸೇವಾ ಕಂಪನಿಯಾದ ಅನರಾಕ್ ಗ್ರೂಪ್‌ನ ನಗರ ಮುಖ್ಯಸ್ಥ ಆಶಿಶ್ ಶರ್ಮಾ ಹೇಳಿದ್ದಾರೆ.