ಬಿಎಂಟಿಸಿ ಎಸಿ ಬಸ್ಗಳ ದರ ಕಡಿಮೆ ಮಾಡಿದ್ರೂ ಪ್ರಯಾಣಿಕರು ಅಷ್ಟಕ್ಕಷ್ಟೇ
ಬೆಂಗಳೂರು, ಜನವರಿ 25: ಬಿಎಂಟಿಸಿಯು ಎಸಿ ಬಸ್ಗಳ ದರ ಕಡಿಮೆ ಮಾಡಿದರೂ ಪ್ರಯಾಣಿಕರ ಸಂಖ್ಯೆ ಕಡಿಮೆಯೇ ಇದೆ.
ಕೊರೊನಾ ಲಾಕ್ಡೌನ್ ಬಳಿಕ ಬಸ್ಗಳ ಸಂಚಾರ ಆರಂಭವಾದ ಮೇಲೆ ಎಸಿ ಬಸ್ಗಳನ್ನು ಹತ್ತುವವರ ಸಂಖ್ಯೆ ಕಡಿಮೆಯಾಗಿತ್ತು. ಹಾಗಾಗಿ ಬಿಎಂಟಿಸಿಯು ಪ್ರಯಾಣಿಕರನ್ನು ತನ್ನತ್ತ ಸೆಳೆಯುವುದಕ್ಕಾಗಿ ಎಸಿ ಬಸ್ ಟಿಕೆಟ್ ದರವನ್ನು ಕಡಿಮೆ ಮಾಡಿತ್ತು. ಆದರೂ ಪ್ರಯಾಣಿಕರ ಸಂಖ್ಯೆ ಶೇ.20 ರಿಂದ 25ರಷ್ಟಿದೆ ಎಂದು ಬಿಎಂಟಿಸಿ ಹೇಳಿದೆ.
ಕೊರೊನಾ ಲಾಕ್ಡೌನ್ ಮುಗಿದಾಗಿನಿಂದಲೂ ಜನರು ಐಷಾರಾಮಿ ಬಸ್ಗಳಲ್ಲಿ ಸಂಚರಿಸಲು ಹಿಂದೇಟು ಹಾಕುತ್ತಿದ್ದಾರೆ. ಜನರು ಇನ್ನೂ ಮನೆಯಿಂದಲೇ ಕೆಲಸ ಮಾಡುತ್ತಿದ್ದಾರೆ.
ಇದು ಬಿಎಂಟಿಸಿ ಮೇಲೆ ನೇರವಾಗಿ ಪರಿಣಾಮ ಬೀರಿದೆ. ಜನಪ್ರಿಯ ಮಾರ್ಗಗಳಾದ ಔಟರ್ ರಿಂಗ್ ರಸ್ತೆ, ಕಾಡುಗೋಡಿ ಮತ್ತು ಎಲೆಕ್ಟ್ರಾನಿಕ್ಸಿಟಿಗಳಲ್ಲಿ ಕೆಲವು ಬಸ್ಗಳು ಮಾತ್ರ ಓಡುತ್ತಿವೆ.
ಬಿಎಂಟಿಸಿಯು ಎಸಿ ಬಸ್ಗಳಿಗೆ ಪ್ರತಿ ತಿಂಗಳು 50 ಲಕ್ಷ ರೂ. ಖರ್ಚು ಮಾಡುತ್ತಿದೆ. ಬಿಎಂಟಿಸಿಯು 860 ಬಸ್ಗಳ ಪೈಕಿ ಕೇವಲ 150 ಬಸ್ಗಳ ಕಾರ್ಯಾಚರಣೆ ನಡೆಸುತ್ತಿದೆ.
ಸಧ್ಯಕ್ಕೆ ಹೊಸ ಎಸಿ ಬಸ್ಗಳ ಖರೀದಿ ಇಲ್ಲ ಎಂದು ಬಿಎಂಟಿಸಿ ಹಾಗೂ ಕೆಎಸ್ಆರ್ಟಿಸಿ ತಿಳಿಸಿದೆ. ಕೊರೊನಾ ಸೋಂಕಿನಿಂದಾಗಿ ಸುಮಾರು ಏಳೆಂಟು ತಿಂಗಳುಗಳ ಕಾಲ ಬಸ್ ಸಂಚಾರ ಸ್ಥಗಿತಗೊಳಿಸಲಾಗಿತ್ತು. ಅಷ್ಟೇ ಅಲ್ಲದೆ ಪ್ರಯಾಣಿಕರು ಎಸಿ ಬಸ್ಗಳತ್ತ ಮುಖ ಮಾಡದ ಕಾರಣ, ನಷ್ಟ ಅನುಭವಿಸುವಂತಾಗಿದೆ. ಹೀಗಾಗಿ ಸಧ್ಯಕ್ಕೆ ಹೊಸ ಎಸಿ ಬಸ್ಗಳ ಖರೀದಿ ಇಲ್ಲ ಎಂದು ನಿಗಮಗಳು ತಿಳಿಸಿವೆ.
ಬಿಎಂಟಿಸಿಯು ಎಸಿ ಬಸ್ ಟಿಕೆಟ್ ದರವನ್ನು ಶೇ.28ರಷ್ಟು ಕಡಿಮೆ ಮಾಡಿದೆ.ದೈನಂದಿನ ಪಾಸ್ ದರವನ್ನು 147 ರೂ. ಗಳಿಂದ 120 ರೂ.ಗಳಿಗೆ ಕಡಿಮೆ ಮಾಡಲಾಗಿದೆ. ಸಾಮಾನ್ಯ ಮತ್ತು ವಾಯುವಜ್ರ ಸೇವೆಗಳ ದರದಲ್ಲಿ ಯಾವುದೇ ಬದಲಾವಣೆ ಇಲ್ಲ.
ವೋಲ್ವೊ ಬಸ್ಗಳ ಪ್ರಯಾಣ ದರವನ್ನು 5 ರೂ. ನಿಂದ 20 ರೂ.ವರೆಗೆ ಇಳಿಕೆ ಮಾಡಲಾಗಿದೆ. ಸಾಮಾನ್ಯ ಸೇವೆಗಳ ಮಾಸಿಕ (1050 ರೂ.) ಮತ್ತು ಹಿರಿಯ ನಾಗರಿಕರ ಸಾಮಾನ್ಯ ಮಾಸಿಕ (945 ರೂ.) ಪಾಸುದಾರರು ಚಾಲ್ತಿಯಲ್ಲಿರುವ ಪಾಸ್ ತೋರಿಸಿ ಭಾನುವಾರಗಳಂದು ವೋಲ್ವೊ ಬಸ್ಗಳಲ್ಲಿ ಪ್ರಯಾಣಿಸಲು ಅವಕಾಶ ಕಲ್ಪಿಸಲಾಗಿದೆ.
Click it and Unblock the Notifications
Sign in with Google