ಹೇಗಿದೆ ನೋಡಿ ಬಿಜೆಪಿಯ ಕರ್ನಾಟಕ ಪರಿವರ್ತನಾ ಯಾತ್ರೆಯ ಐಷಾರಾಮಿ ಬಸ್ಸು!

ಬೆಂಗಳೂರು, ನವೆಂಬರ್ 02: 2018 ರ ಕರ್ನಾಟಕ ವಿಧಾನಸಭೆ ಚುನಾವಣೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಕರ್ನಾಟಕ ಬಿಜೆಪಿ ಆರಂಭಿಸಿರುವ ಪರಿವರ್ತನಾ ಯಾತ್ರೆಗೆ ಬೆಂಗಳೂರಿನಲ್ಲಿ ಇಂದು(ನ.2) ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್ ಶಾ ಅಧಿಕೃತ ಚಾಲನೆ ನೀಡಲಿದ್ದಾರೆ.

ಒಟ್ಟು 75 ದಿನಗಳ ಕಾಲ ನಡೆಯಲಿರುವ ಪರಿವರ್ತನಾ ಯಾತ್ರೆ ಬೆಂಗಳೂರಿನ ತುಮಕೂರು ರಸ್ತೆಯಲ್ಲಿರುವ ಅಂತಾರಾಷ್ಟ್ರೀಯ ವಸ್ತು ಪ್ರದರ್ಶನ ಕೇಂದ್ರದಲ್ಲಿ ನ.2 ರಿಂದ ಆರಂಭವಾಗಿ ಇಡೀ ರಾಜ್ಯ ಸುತ್ತಿ ಜ.28 ರಂದು ಮತ್ತೆ ರಾಜಧಾನಿ ಬೆಂಗಳೂರಿಗೆ ವಾಪಸಾಗಿ ಮುಕ್ತಾಯಗೊಳ್ಳಲಿದೆ.

ಪರಿವರ್ತನಾ ಯಾತ್ರೆಯ ಪ್ರಮುಖ ಆಕರ್ಷಣೆ ಎಂದರೆ ಕೇವಲ 19 ದಿನಗಳಲ್ಲಿ ನಿರ್ಮಿಸಲಾದ ಐಷಾರಾಮಿ ಬಸ್ಸು! ಪರಿವರ್ತನಾ ಯಾತ್ರೆಗಾಗಿಯೇ ನಿರ್ಮಿಸಲಾದ ಈ ಬಸ್ಸು ನವೆಂಬರ್ 1 ರಂದು ಸಂಜೆ 6 ಗಂಟೆಗೆ ಬೆಂಗಳೂರಿನ ಮಲ್ಲೇಶ್ವರಂ ನಲ್ಲಿರುವ ಬಿಜೆಪಿ ಕಚೇರಿಗೆ ಬಂದಿದೆ.

ಕೇಸರಿ ಬಣ್ಣದ ಈ ಐಷಾರಾಮಿ ಬಸ್ಸಿನ ವಿಶೇಷತೆಗಳ ಕುರಿತ ಕೆಲವು ಮಾಹಿತಿ ನಿಮಗಾಗಿ ಇಲ್ಲಿದೆ...

ಐಷಾರಾಮಿ ಬಸ್ಸಿನ ವೆಚ್ಚ ಬರೋಬ್ಬರಿ 90 ಲಕ್ಷ ರೂ.

ಪರಿವರ್ತನಾ ಯಾತ್ರೆಗೆ ಬಳಸುತ್ತಿರುವ ಬಸ್ಸನ್ನು ಕೇವಲ 19 ದಿನಗಳಲ್ಲಿ ತಯಾರಿಸಲಾಗಿದ್ದು, ಬಸ್ ನಿರ್ಮಾಣಕ್ಕೆ ತಗುಲಿದ ವೆಚ್ಚ ಬರೋಬ್ಬರಿ 90 ಲಕ್ಷ ರೂ. 70 ಕ್ಕೂ ಹೆಚ್ಚು ಕೆಲಸಗಾರರು ಹಗಲಿರುಳೂ ಶ್ರಮಿಸಿ ಕೇವಲ 19 ದಿನಗಳಲ್ಲಿ ಬಸ್ ಅನ್ನು ಪರಿವರ್ತನಾ ಯಾತ್ರೆಗಾಗಿ ಸಿದ್ಧಗೊಳಿಸಿದ್ದಾರೆ.

ಅತ್ಯಾಧುನಿಕ ಸೌಲಭ್ಯ

ಪ್ರಯಾಣಿಕರಿಗೆ ಯಾವುದೇ ರೀತಿಯ ಅನಾನುಕೂಲತೆಯಾಗದ ರೀತಿಯಲ್ಲಿ ಸೀಟುಗಳನ್ನು ಸಿದ್ಧಪಡಿಸಲಾಗಿದ್ದು, ಪ್ರಚಾರದ ನಂತರ ವಿಶ್ರಾಂತಿ ಪಡೆಯಲು ಅನುಕೂಲಕರವಾಗಿದೆ. ಹಾಗೆಯೇ ಬಸ್ಸಿನಲ್ಲಿ ಟಾಯ್ಲೆಟ್, ಟಿವಿ, ಮೈಕ್ ಸೇರಿದಂತೆ ಹಲವು ಸೌಲಭ್ಯಗಳಿವೆ.

ಕೇಸರಿ ಬಣ್ಣದ ರಥ

ಬಸ್ಸು ಕೇಸರಿ ಬಣ್ಣದಿಂದ ಕಂಗೊಳಿಸುತ್ತಿದ್ದು, ಪ್ರಧಾನಿ ನರೇಂದ್ರ ಮೋದಿ, ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್ ಶಾ, ರಾಜ್ಯಾಧ್ಯಕ್ಷ ಯಡಿಯೂರಪ್ಪನವರ ಚಿತ್ರಗಳು ಬಸ್ಸಿನಲ್ಲಿ ರಾರಾಜಿಸುತ್ತಿದೆ.

ಕನ್ನಡಿಗರ ಭರವಸೆಯ ಸರ್ಕಾರ

"ಕನ್ನಡಿಗರ ಭರವಸೆಯ ಸರ್ಕಾರಕ್ಕೆ ನಾವು ಬದ್ಧ" ಎಂಬ ಒಕ್ಕಣೆಯ ಜೊತೆಗೆ ಬಿಜೆಪಿ ಸರ್ಕಾರ ಅಧಿಕಾರಕ್ಕೆ ಬಂದರೆ ಯಾವೆಲ್ಲ ಕಲ್ಯಾಣ ಕಾರ್ಯಗಳಿಗೆ ಆದ್ಯತೆ ನೀಡುತ್ತದೆ ಎಂಬ ಬಗ್ಗೆಯೂ ಕೆಲವು ಸಾಲುಗಳನ್ನು ಬಸ್ಸಿನಲ್ಲಿ ಬರೆಯಲಾಗಿದೆ.

ಪರಿವರ್ತನೆಗಾಗಿ ಯಾತ್ರೆ!

2018 ರ ವಿಧಾನಸಭಾ ಚುನಾವಣೆಗಾಗಿ ಭರದ ಸಿದ್ಧತೆ ನಡೆಸುತ್ತಿರುವ ಬಿಜೆಪಿಯ ಈ ರಥಯಾತ್ರೆ ಕರ್ನಾಟಕದ ಹಳ್ಳಿ ಹಳ್ಳಿಗಳನ್ನೂ ಸಂಪರ್ಕಿಸಲಿದೆ. ಇನ್ನು ಎರಡೂವರೆ ತಿಂಗಳು ಕೆಎ 01, ಎಎಚ್ 4545 ನಂಬರಿನ ಐಶಶಾರಾಮಿ ಬಸ್ಸು ರಸ್ತೆ ರಸ್ತೆಗಳಲ್ಲಿ ಕಣ್ಣು ಕುಕ್ಕಿದರೆ ಅಚ್ಚರಿಯೇನಿಲ್ಲ.

English summary

Parivartana Rally of Karnataka BJP, which will be taking place on Nov 2nd from Bengaluru will be continued to 75 days. The rally will cover all major regions of the state. Yatra vehicle will be flagged off on 2nd Nov. by BJP national president Amit shah in BIEC in Bengaluru. The vehicle, work and interiors carried out in just 19 days by about 70 workers.