ಬೆಂಗಳೂರಿನಲ್ಲಿ 'ನಥಿಂಗ್' ಫ್ಲ್ಯಾಗ್‌ಶಿಪ್ ಸ್ಟೋರ್ ಆರಂಭ: ಮೊದಲ ದಿನವೇ ಮಳಿಗೆಗೆ 2 ಸಾವಿರ ಜನರ ಭೇಟಿ

Updated: Saturday, February 14, 2026, 22:17 [IST]

ಬೆಂಗಳೂರು: ಲಂಡನ್ ಮೂಲದ ಜನಪ್ರಿಯ ಕನ್ಸ್ಯೂಮರ್ ಟೆಕ್ ಕಂಪನಿ 'ನಥಿಂಗ್' (Nothing) ಭಾರತದಲ್ಲಿ ತನ್ನ ಮಾರುಕಟ್ಟೆ ವಿಸ್ತರಣೆಯನ್ನು ಮತ್ತಷ್ಟು ಬಲಪಡಿಸಿದ್ದು, ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ತನ್ನ ಮೊಟ್ಟಮೊದಲ ಪ್ರಮುಖ ಮಳಿಗೆ (Flagship Store) ಯನ್ನು ಅದ್ಧೂರಿಯಾಗಿ ಆರಂಭಿಸಿದೆ. ನಗರದ ಪ್ರತಿಷ್ಠಿತ ಇಂದಿರಾನಗರದ 100 ಫೀಟ್ ರಸ್ತೆಯಲ್ಲಿ ತಲೆಎತ್ತಿರುವ ಈ ಅತ್ಯಾಧುನಿಕ ಮಳಿಗೆಯನ್ನು ನಥಿಂಗ್ ಕಂಪನಿಯ ಸಿಇಒ ಕಾರ್ಲ್ ಪೇಯ್ (Carl Pei) ಹಾಗೂ ಕಂಪನಿಯ ಸಹ-ಸಂಸ್ಥಾಪಕ ಮತ್ತು ಭಾರತದ ವಿಭಾಗದ ಅಧ್ಯಕ್ಷ ಅಕಿಸ್ ಇವಾಂಜೆಲಿಡಿಸ್ (Akis Evangelidis) ಅವರು ಅಧಿಕೃತವಾಗಿ ಉದ್ಘಾಟಿಸಿದರು.

ಲಂಡನ್‌ನಲ್ಲಿ ಈಗಾಗಲೇ ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿರುವ ನಥಿಂಗ್ ಸ್ಟೋರ್‌ನ ನಂತರ, ಜಾಗತಿಕ ರಿಟೇಲ್ ಜಾಲವನ್ನು ವಿಸ್ತರಿಸುವ ನಿಟ್ಟಿನಲ್ಲಿ ಟೋಕಿಯೋ ಮತ್ತು ನ್ಯೂಯಾರ್ಕ್ ನಗರಗಳಿಗೂ ಮುನ್ನವೇ ಬೆಂಗಳೂರಿನಲ್ಲಿ ಈ ಮಳಿಗೆಯನ್ನು ತೆರೆಯಲಾಗಿದೆ. ಈ ಮಳಿಗೆಯು ಪ್ರತಿದಿನ ಬೆಳಗ್ಗೆ 11:00 ಗಂಟೆಯಿಂದ ರಾತ್ರಿ 9:00 ಗಂಟೆಯವರೆಗೆ ಸಾರ್ವಜನಿಕರಿಗೆ ತೆರೆದಿರುತ್ತದೆ.

ಮೊದಲ ದಿನವೇ ಹರಿದುಬಂದ ಜನಸಾಗರ

ಭಾರತದಲ್ಲಿ ನಥಿಂಗ್ ಬ್ರ್ಯಾಂಡ್ ಸ್ಮಾರ್ಟ್‌ಫೋನ್ ಮತ್ತು ಇಯರ್‌ಬಡ್‌ಗಳಿಗೆ ಇರುವ ಭಾರೀ ಕ್ರೇಜ್ ಈ ಮಳಿಗೆಯ ಉದ್ಘಾಟನಾ ದಿನವೇ ಸಾಬೀತಾಗಿದೆ. ಬರೋಬ್ಬರಿ 5,032 ಚದರ ಅಡಿ (Sq.ft) ವಿಸ್ತೀರ್ಣದಲ್ಲಿ ನಿರ್ಮಾಣವಾಗಿರುವ ಈ ಬೃಹತ್ ಸ್ಟೋರ್‌ಗೆ, ಉದ್ಘಾಟನೆಯಾದ ಮೊದಲನೇ ದಿನವೇ 2,000ಕ್ಕೂ ಹೆಚ್ಚು ಟೆಕ್ ಪ್ರಿಯರು ಮತ್ತು ಗ್ರಾಹಕರು ಭೇಟಿ ನೀಡಿ ಅಚ್ಚರಿ ಮೂಡಿಸಿದ್ದಾರೆ. ಕೇವಲ ಮೊಬೈಲ್ ಮಾರಾಟ ಮಾಡುವ ಸಾಂಪ್ರದಾಯಿಕ ಮಳಿಗೆಯಾಗಿರದೆ, ಇದೊಂದು ಸಮುದಾಯವನ್ನು ಒಗ್ಗೂಡಿಸುವ, ಹೊಸ ತಂತ್ರಜ್ಞಾನದ ಪ್ರಯೋಗಗಳಿಗೆ ವೇದಿಕೆಯೊದಗಿಸುವ ಮತ್ತು ಗ್ರಾಹಕರೊಂದಿಗೆ ನೇರ ಸಂಪರ್ಕ ಸಾಧಿಸುವ ವಿಶಿಷ್ಟ ಅನುಭವ ಕೇಂದ್ರವಾಗಿ (Experience Center) ರೂಪುಗೊಂಡಿದೆ. ಮಳಿಗೆಯ ವಿನ್ಯಾಸ ಮತ್ತು ಅಲ್ಲಿನ ವಾತಾವರಣವು ಬ್ರ್ಯಾಂಡ್‌ನ ಮೇಲಿನ ಗ್ರಾಹಕರ ಮೆಚ್ಚುಗೆಯನ್ನು ಇನ್ನಷ್ಟು ಹೆಚ್ಚಿಸುವಂತೆ ರೂಪಿಸಲಾಗಿದೆ.

ವಿಶಿಷ್ಟ ಅನುಭವವೇ ನಮ್ಮ ಗುರಿ

ಮಳಿಗೆಯ ಉದ್ಘಾಟನೆ ಕುರಿತು ಮಾತನಾಡಿದ ಅಕಿಸ್ ಇವಾಂಜೆಲಿಡಿಸ್, "ಭಾರತದಲ್ಲಿ ನಮ್ಮ ಮೊದಲ ಮಳಿಗೆಯನ್ನು ತೆರೆಯುತ್ತಿರುವುದು 'ನಥಿಂಗ್' ಪಾಲಿಗೆ ಒಂದು ಮಹತ್ವದ ಮೈಲಿಗಲ್ಲಾಗಿದೆ. ಇದು ಭಾರತದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಸ್ಮಾರ್ಟ್‌ಫೋನ್ ಬ್ರ್ಯಾಂಡ್‌ಗಳಲ್ಲಿ ನಮ್ಮ ಸ್ಥಾನವನ್ನು ಮತ್ತಷ್ಟು ಭದ್ರಪಡಿಸಿದೆ. ನಾವು ಉದ್ದೇಶಪೂರ್ವಕವಾಗಿಯೇ ಇದೊಂದು ಸಾಮಾನ್ಯ ಮೊಬೈಲ್ ಅಂಗಡಿಯಂತೆ ಕಾಣಬಾರದು ಎಂದು ನಿರ್ಧರಿಸಿದ್ದೆವು. ಬದಲಾಗಿ, ನಮ್ಮ ಗ್ರಾಹಕರಿಗೆ ಒಂದು ವಿಶಿಷ್ಟವಾದ ಅನುಭವವನ್ನು ನೀಡಲು ಈ ಜಾಗವನ್ನು ವಿನ್ಯಾಸಗೊಳಿಸಿದ್ದೇವೆ.

ನಮ್ಮ ಸಮುದಾಯದೊಂದಿಗೆ ವಿಶ್ವಾಸ, ನಂಬಿಕೆ ಮತ್ತು ದೀರ್ಘಕಾಲೀನ ಸಂಬಂಧವನ್ನು ಬೆಳೆಸುವುದು ನಮ್ಮ ಪ್ರಮುಖ ಗುರಿಯಾಗಿದೆ" ಎಂದು ವಿವರಿಸಿದರು. "ಭಾರತೀಯ ಮಾರುಕಟ್ಟೆಯು ವಿನ್ಯಾಸ ಆಧಾರಿತ ಚಿಂತನೆ (Design-led thinking) ಮತ್ತು ನೇರ ಅನುಭವಕ್ಕೆ ಹೆಚ್ಚಿನ ಬೆಲೆ ಕೊಡುತ್ತದೆ. ಹಾಗಾಗಿ ಈ ಮಳಿಗೆಯು ಭವಿಷ್ಯದ ಉತ್ಪನ್ನಗಳ ಬಿಡುಗಡೆ, ಹೊಸ ಒಪ್ಪಂದಗಳು ಮತ್ತು ಸಮುದಾಯ ಕೇಂದ್ರಿತ ಅನುಭವಗಳನ್ನು ಹಂಚಿಕೊಳ್ಳುವ ಪ್ರಮುಖ ಕೇಂದ್ರವಾಗಲಿದೆ" ಎಂದು ಅವರು ಭರವಸೆ ವ್ಯಕ್ತಪಡಿಸಿದರು.

ಗ್ರಾಹಕರಿಗೆ ಉಚಿತ ಪಾನೀಯ, ಗೇಮಿಂಗ್ ವ್ಯವಸ್ಥೆ

ಈ ಸ್ಟೋರ್ ಕೇವಲ ಉತ್ಪನ್ನಗಳ ಪ್ರದರ್ಶನಕ್ಕೆ ಮಾತ್ರ ಸೀಮಿತವಾಗಿಲ್ಲ. ಬದಲಾಗಿ, ಗ್ರಾಹಕರನ್ನು ಮನೋರಂಜಿಸಲು ಮತ್ತು ತೊಡಗಿಸಿಕೊಳ್ಳಲು ಅನೇಕ ಸಂವಾದಾತ್ಮಕ ಅಂಶಗಳನ್ನು ಇಲ್ಲಿ ಅಳವಡಿಸಲಾಗಿದೆ. ಮಳಿಗೆಯ ಒಳಗೆ ಒಂದು ಸುಂದರವಾದ ಕೆಫೆ, ವಿಡಿಯೋ ರೆಕಾರ್ಡಿಂಗ್ ಸ್ಟುಡಿಯೋ, ವೆಂಡಿಂಗ್ ಮಷಿನ್‌ಗಳು ಮತ್ತು ಕನ್ವೇಯರ್ ಬೆಲ್ಟ್ ಡಿಸ್‌ಪ್ಲೇಗಳನ್ನು ಅಳವಡಿಸಲಾಗಿದೆ.

ಭೇಟಿ ನೀಡುವ ಗ್ರಾಹಕರಿಗೆ ಉಚಿತ ಪಾನೀಯಗಳ ವ್ಯವಸ್ಥೆ ಮಾಡಲಾಗಿದ್ದು, ಟೆಕ್ ಆಸಕ್ತರು ಒಟ್ಟಾಗಿ ಸೇರಿ ಚರ್ಚಿಸಲು ಪ್ರತ್ಯೇಕ ಸ್ಥಳವನ್ನು ಒದಗಿಸಲಾಗಿದೆ. ಇದು ಅತ್ಯಂತ ಉತ್ಸಾಹಭರಿತ ವಾತಾವರಣವನ್ನು ಸೃಷ್ಟಿಸಿದೆ. ಪ್ರಮುಖ ಮಾರುಕಟ್ಟೆ ಸಂಶೋಧನಾ ಸಂಸ್ಥೆಯಾದ 'ಕೌಂಟರ್‌ಪಾಯಿಂಟ್ ರಿಸರ್ಚ್' ವರದಿಯ ಪ್ರಕಾರ, ನಥಿಂಗ್ ಕಂಪನಿಯು ಕಳೆದ ಹಲವು ತ್ರೈಮಾಸಿಕಗಳಿಂದ ಭಾರತದಲ್ಲಿ ವರ್ಷದಿಂದ ವರ್ಷಕ್ಕೆ (YoY) ಅತ್ಯುತ್ತಮ ಪ್ರಗತಿಯನ್ನು ಸಾಧಿಸುತ್ತಿದೆ. ಈ ಹೊಸ ಸ್ಟೋರ್‌ನ ಉದ್ಘಾಟನೆಯೊಂದಿಗೆ ಕಂಪನಿಯು ಭಾರತದ ಟೆಕ್ ಮಾರುಕಟ್ಟೆಯಲ್ಲಿ ತನ್ನ ಹೆಜ್ಜೆಗುರುತನ್ನು ಇನ್ನಷ್ಟು ಆಳವಾಗಿ ಮೂಡಿಸಿದೆ.