PG: ಬೆಂಗಳೂರು ಅನಧಿಕೃತ ಪಿಜಿಗಳಿಗೆ ವಿರುದ್ಧ ಸಮರ: ಸುರಕ್ಷಾ ಕ್ರಮ ಕೈಗೊಳ್ಳಲು ಜಿಬಿಎ ಸೂಚನೆ

ಬೆಂಗಳೂರು: ರಾಜಧಾನಿಗೆ ಉದ್ಯೋಗ ಅರಸಿ ಬರುವ ಅನೇಕ ಯುವ ಸಮೂಹಕ್ಕೆ ಇಲ್ಲಿನ ಪಿಜಿಗಳೇ (Paying Guest) ಆಸರೆ. ಇಂತಹ ಪಿಜಿಗಳಿಗೆ ಈ ಹಿಂದೆ ಒಂದಷ್ಟು ಮಾರ್ಗಸೂಚಿ ಹೊರಡಿಸಿತ್ತು. ಇದೀಗ ಅನಧೀಕೃತ ಪಿಜಿಗಳನ್ನು ಪರಿಶೀಲಿಸಬೇಕು. ತಪ್ಪುಗಳು, ಲೋಪದೋಷಗಳು ಕಂಡು ಬದಲ್ಲಿ ಅಗತ್ಯ ಕ್ರಮ ವಹಿಸುವಂತೆ ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ (ಜಿಬಿಎ) ಕೇಂದ್ರ ನಗರ ಪಾಲಿಕೆ ಆಯುಕ್ತರು ಅಧಿಕಾರಿಗಳಿಗೆ ಸೂಚಿಸಿದ್ದಾರೆ.

ಇಂದು ಸೋಮವಾರ ಬೆಂಗಳೂರು ಕೇಂದ್ರ ನಗರ ಪಾಲಿಕೆ ವ್ಯಾಪ್ತಿಯ ನಾಗರೀಕರ ಸಮಸ್ಯೆಗಳನ್ನು ನೇರವಾಗಿ ಆಲಿಸಿ, ಸಮಸ್ಯೆಗಳಿಗೆ ತ್ವರಿತ ಪರಿಹಾರ ಒದಗಿಸುವ ಉದ್ದೇಶದಿಂದ ಆಯುಕ್ತ ಪಿ. ರಾಜೇಂದ್ರ ಚೋಳನ್ ಅವರು ನೇರ ಫೋನ್‌ ಇನ್ ಕಾರ್ಯಕ್ರಮ ನಡೆಸಿದರು. ಒಟ್ಟು 29 ನಾಗರಿಕರಿಂದ ದೂರವಾಣಿ ಮೂಲಕ ವಿವಿಧ 35 ಸಮಸ್ಯೆಗಳ ಅಹವಾಲು ಆಲಿಸಿದರು. ಇದೇ ವೇಳೆ ಪಿಜಿಗಳಲ್ಲಿ ವಾಸಿಸುವವರಿಂದ ಒಂದಷ್ಟು ಸಮಸ್ಯೆಗಳು ಆಗುತ್ತಿರುವ ಬಗ್ಗೆ ದೂರುಗಳು ಕೇಳಿ ಬಂದವು.

ಶ್ರೀನಿವಾಸ್ ಆಚಾರ್ ಎಂಬುವವರು ದೊಮ್ಮಲೂರಿನನ ಪಿಜಿ ಗಳಲ್ಲಿನ ಯುವಕ/ ಯುವತಿಯರಿಂದ ಉಂಟಾಗುತ್ತಿರುವ ಸಮಸ್ಯೆ ಬಗ್ಗೆ ದೂರು ನೀಡಿದರು. ಪಿಜಿಗಳಿಗೆ ಸಂಬಂಧಿಸಿ ಅಹವಾಲುಗಳಿಗೆ ಪ್ರತಿಕ್ರಿಯಿಸಿದ ಆಯುಕ್ತರು, ಪಿಜಿ ಗಳಲ್ಲಿ ವಾಸವಿರುವ ಯುವಕ/ಯುವತಿಯರು ರಸ್ತೆಗಳಲ್ಲಿ ತಡರಾತ್ರಿಯವರೆಗೆ ಹರಟೆ ಹೊಡೆಯುವುದು, ಜೋರಾಗಿ ಮಾತನಾಡುವುದು ಮಾಡುವುದರಿಂದ ಅಕ್ಕಪಕ್ಕದ ಮನೆಯವರಿಗೆ ತೊಂದರೆಯಾಗುತ್ತಿದೆ. ಈ ಬಗ್ಗೆ ಪರಿಶೀಲಿಸಿ ಕ್ರಮ ಕೈಗೊಳ್ಳಬೇಕು. ಪಾಲಿಕೆ ವ್ಯಾಪ್ತಿಯ ಅನಧಿಕೃತ ಪಿಜಿ ಗಳನ್ನು ಪರಿಶೀಲಿಸಿ ಸುರಕ್ಷಾ ಕ್ರಮಗಳ ಅಳವಡಿಸಲು ಸೂಚಿಸುವಂತೆ ಅಧಿಕಾರಿಗಳಿಗೆ ಹೇಳಿದರು.

ನಾಗರಿಕರಿಂದ ಪಾದಚಾರಿ ಒತ್ತುವರಿ ಕುರಿತು ಏಳು ದೂರುಗಳು ಸ್ವೀಕೃತಿಯಾದವು. ಈ ಸಂಬಂಧ ಪ್ರತಿಕ್ರಿಯಿಸಿದ ಆಯುಕ್ತರು ಪಾದಚಾರಿ ಮಾರ್ಗಗಳ ಒತ್ತುವರಿಯನ್ನು ಗುರುತಿಸಿ ತೆರವುಗೊಳಿಸುವಂತೆ ತಿಳಿಸಿದರು. ಒಣಗಿದ ಮರಗಳು ಹಾಗೂ ರೆಂಬೆ ಕೊಂಬೆ ತೆರವುಗೊಳಿಸುವ ಬಗ್ಗೆ ದೂರುಗಳು ಬಂದಿವೆ. ಅವುಗಳನ್ನು ತೆರವು ಗೊಳಿಸಬೇಕೆಂದು ಅರಣ್ಯ ವಿಭಾಗದ ಅಧಿಕಾರಿಗಳಿಗೆ ನಿರ್ದೇಶಿಸಿದರು.

ಸ್ವೀಕೃತ ಅಹವಾಲುಗಳಿಗೆ ತ್ವರಿತ ಪರಿಹಾರ

ಫೋನ್ ಇನ್ ಕಾರ್ಯಕ್ರಮದಲ್ಲಿ ದೂರವಾಣಿ ಮೂಲಕ ನಾಗರಿಕರಿಂದ ಸ್ವೀಕೃತವಾಗುವ ವಿವಿಧ ಸಮಸ್ಯೆಗಳ ಬಗ್ಗೆ ಪರಿಶೀಲಿಸಲಾಯಿತು. ಜರೂರಾಗಿ ಪರಿಹರಿಸಲು ಆಯುಕ್ತರು ಸ್ಥಳದಲ್ಲಿಯೇ ಹಾಜರಿದ್ದ ಅಧಿಕಾರಿಗಳಿಗೆ ಆದೇಶ ನೀಡಿದರು. ಇದೇ ವೇಳೆ ಸಿ.ವಿ ರಾಮನ್ ನಗರ ವ್ಯಾಪ್ತಿಯ ವ್ಹಿಲರ್ಸ್ ರಸ್ತೆಯಲ್ಲಿ ರಸ್ತೆ ಗುಂಡಿ, ತ್ಯಾಜ್ಯ ನಿರ್ವಹಣೆ ಹಾಗೂ ಬೀದಿ ದೀಪ ಸಮಸ್ಯೆಗಳಿಂದ ಈ ಭಾಗದ ನಿವಾಸಿಗಳು ಹೈರಾಣಾಗಿದ್ದಾರೆ. ತ್ಯಾಜ್ಯ ಸಮಸ್ಯೆ, ಪಿಜಿಗಳಿಂದಾಗುವ ಸಮಸ್ಯೆ ಸೇರಿ ಹಲವು ತೊಂದರೆಗಳನ್ನು ನಾಗರಿಕರು ಪಾಲಿಕೆ ಗಮನಕ್ಕೆ ತಂದು ಪರಿಹಾರ ಪಡೆದುಕೊಂಡರು.

English summary

Bengaluru Cracks Down on Illegal PGs, GBA Orders Strict Safety Checks