ನಿಮ್ಮ ಹೆಸರಲ್ಲೂ ನಕಲಿ ಸಿಮ್ ಕಾರ್ಡ್ ತಗೊಂಡಿರಬಹುದು!

Updated: Wednesday, July 15, 2015, 19:15 [IST]

ಬೆಂಗಳೂರು, ಜು. 15: ನಕಲಿ ಸಿಮ್ ಕಾರ್ಡ್ ಜಾಲವನ್ನು ಬೆಂಗಳೂರು ಪೊಲೀಸರು ಬೇಧಿಸಿದ್ದಾರೆ. ಸಿಮ್ ಖರೀದಿಸಿದ ಗ್ರಾಹಕರ ದಾಖಲೆಯನ್ನು ಬಳಸಿಕೊಂಡು ಅದೇ ಹೆಸರಿನಲ್ಲಿ ಮತ್ತೆ ಸಿಮ್ ಕಾರ್ಡ್ ಗಳನ್ನು ಪಡೆದುಕೊಂಡು ಅಕ್ರಮವಾಗಿ ಮಾರಾಟ ಮಾಡುತ್ತಿದ್ದ ಜಾಲವನ್ನು ಪೊಲೀಸರು ಬಂಧಿಸಿದ್ದಾರೆ.

ಬೆಂಗಳೂರಿನ ಹನುಂತನಗರದ ಮೂರು ಅಂಗಡಿಗಳ ಮೇಲೆ ದಾಳಿ ಮಾಡಿ, ಮಾಗಡಿ ತಾಲೂಕಿನ ನಾಗರಾಜು, ಹನುಮಂತನಗರದ ರಮೇಶ್, ಎನ್ ಜಗದೀಶ್ ಮತ್ತು ರವಿಕುಮಾರ್ ಎಂಬುವರನ್ನು ಬಂಧಿಸಿದ್ದಾರೆ.[ಬೆಂಗಳೂರಿಗೂ ಕಾಲಿಟ್ಟಿತೆ ರಕ್ತ ಚಂದನ ಕಳ್ಳ ಸಾಗಣೆ?]

ಆರೋಪಿಗಳಿಂದ 58 ಸಾವಿರ ರೂ. ನಗದು 19 ಮೊಬೈಲ್, ಸ್ಕ್ಯಾನರ್ ಸೇರಿದಂತೆ ವಿವಿಧ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಆರೋಪಿಗಳು ಮೊಬೈಲ್ ಕಂಪನಿ ಏಜೆಂಟರೊಂದಿಗೆ ಸಂಬಂಧ ಇರಿಸಿಕೊಂಡಿದ್ದು ತನಿಖೆ ವೇಳೆ ತಿಳಿದು ಬಂದಿದೆ.

ಬೆಂಗಳೂರಿನಲ್ಲಿ ನಡೆದ ಉಗ್ರ ಚಟುವಟಿಕೆ ಮತ್ತು ಕಾನೂನು ಬಾಹಿರ ವ್ಯವಹಾರಗಳಿಗೆ ದುಷ್ಕರ್ಮಿಗಳು ಇಂಥ ಸಿಮ್ ಬಳಕೆ ಮಾಡಿಕೊಂಡ ಶಂಕೆಯಿದೆ. ಈ ಬಗ್ಗೆ ಮತ್ತಷ್ಟು ತನಿಖೆ ನಡೆಸಲಾಗುವುದು ಎಂದು ಸಿಸಿಬಿ ಪೊಲೀಸರು ತಿಳಿಸಿದ್ದಾರೆ. ಹನುಮಂತನಗರ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.