'ಮಿಸ್ಟ್ ಕೆನಾನ್ ಸ್ಪ್ರೇಯರ್' ಯಂತ್ರಕ್ಕೆ ಚಾಲನೆ ನೀಡಿದ ಬಿಬಿಎಂಪಿ

ಬೆಂಗಳೂರು, ಜೂನ್ 29: ಸಿಲಿಕಾನ್ ಸಿಟಿಯಲ್ಲಿ ಕೊರೊನಾ ವೈರಸ್ ಪ್ರಕರಣಗಳು ದೊಡ್ಡಮಟ್ಟದಲ್ಲಿ ಏರಿಕೆ ಕಂಡಿದೆ. ರಾಜಧಾನಿಯಲ್ಲಿ ಹೇಗಾದರೂ ಮಾಡಿ ಕೊವಿಡ್ ನಿಯಂತ್ರಿಸಬೇಕು ಎಂದು ರಾಜ್ಯಸರ್ಕಾರ ಹಾಗೂ ಬಿಬಿಎಂಪಿ ಎಲ್ಲ ರೀತಿಯ ಪ್ರಯತ್ನ ಮಾಡ್ತಿದೆ.

ಈ ಹಿನ್ನೆಲೆ ಕೊವಿಡ್-19 ಸೋಂಕು ತಡೆಯಲು ಸೋಂಕು ನಿವಾರಕ ಸಿಂಪಡಣೆ ಮಾಡುವ "ಮಿಸ್ಟ್ ಕೆನಾನ್ ಸ್ಪ್ರೇಯರ್" ಯಂತ್ರಕ್ಕೆ ಇಂದು ಬಿಬಿಎಂಪಿ ಚಾಲನೆ ನೀಡಿದೆ.

ಇಂದು ವಿಧಾನಸೌಧ ಪೂರ್ವ ದ್ವಾರದ ಬಳಿ ಮಾನ್ಯ ಕಂದಾಯ ಸಚಿವರು ಹಾಗೂ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರದ ಉಪಾಧ್ಯಕ್ಷರು ಶ್ರೀ ಆರ್.ಅಶೋಕ್, ಮುಖ್ಯಮಂತ್ರಿ ರಾಜಕೀಯ ಕಾರ್ಯದರ್ಶಿ ಎಸ್.ಆರ್.ವಿಶ್ವನಾಥ್ ಹಾಗೂ ಬಿಬಿಎಂಪಿ ಮೇಯರ್ ಗೌತಮ್ ಕುಮಾರ್ ಈ ಯಂತ್ರಕ್ಕೆ ಚಾಲನೆ ನೀಡಿದರು.

ಈ ಕುರಿತು ಬಿಬಿಎಂಪಿ ಮೇಯರ್ ಟ್ವೀಟ್ ಮಾಡಿದ್ದು, ''ಸೋಂಕು ರಹಿತ ಪರಿಸರ ನಿರ್ಮಿಸಲು ತಂತ್ರಜ್ಞಾನದ ಬಳಕೆ. ಉತ್ತಮ, ಸುಸ್ಥಿರ, ಕಡಿಮೆ ವೆಚ್ಚದಲ್ಲಿ ತಯಾರಾದ "ಮಿಸ್ಟ್ ಕೆನಾನ್" ಯಂತ್ರ ಕೊವಿಡ್ ಸೋಂಕು ನಿರ್ವಹಣೆಗೆ ತುಂಬಾ ಸಹಾಯಕಾರಿಯಾಗಲಿದೆ'' ಎಂದು ಮಾಹಿತಿ ನೀಡಿದ್ದಾರೆ.

ಇನ್ನು ಮಿಸ್ಟ್ ಕೆನಾನ್ ಸ್ಪ್ರೇಯರ್ ಬಗ್ಗೆ ಹೇಳುವುದಾದರೆ ''8,000 ಲೀಟರ್ ಸಾಮರ್ಥ್ಯ ಹೊಂದಿದೆ. 50 ಮೀಟರ್ ದೂರ ಸೋಂಕು ನಿರ್ವಹಣೆ ಮಾಡಲಿದೆ. 320 ಡಿಗ್ರಿ ಸುತ್ತಳತೆಯಲ್ಲಿ ಸೋಂಕು ನಿವಾರಕ ಸಿಂಪಡಣೆ ಮಾಡಬಹುದಾಗಿದೆ.'' ಎಂದು ಮಾಹಿತಿ ನೀಡಿದ್ದಾರೆ.

English summary

Coronavirus Update In Bengaluru: BBMP introduces 'mist cannon' machines to disinfect public places.