ಬೆಂಗಳೂರಿನಲ್ಲಿ ಬ್ಯಾಚುಲರ್ ಜೀವನಕ್ಕೆ ತಿಂಗಳಿಗೆ 51,000 ರೂ. ಬೇಕಾ? ಅಮೆಜಾನ್ ಉದ್ಯೋಗಿಯ ವೈರಲ್ ವಿಡಿಯೋ ಇಲ್ಲಿದೆ

ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಜೀವನ ನಡೆಸುವುದು ಎಷ್ಟು ದುಬಾರಿ ಎನ್ನುವ ಚರ್ಚೆಗಳು ಆಗಾಗ ನಡೆಯುತ್ತಲೇ ಇರುತ್ತವೆ. ಇದೀಗ ಬೆಂಗಳೂರಿನಲ್ಲಿ ಸ್ವತಂತ್ರವಾಗಿ ವಾಸಿಸುತ್ತಿರುವ ಅಮೆಜಾನ್ ಕಂಪನಿಯ ಉದ್ಯೋಗಿಯೊಬ್ಬರು ತಮ್ಮ ತಿಂಗಳ ಖರ್ಚಿನ ಸಂಪೂರ್ಣ ವಿವರವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಈ ವಿಡಿಯೋ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಕಾರ್ತಿಕ್ ಸಿಂಗ್ ಪರಿಹಾರ್ ಎಂಬ 26 ವರ್ಷದ ಯುವಕ ಇನ್‌ಸ್ಟಾಗ್ರಾಮ್‌ನಲ್ಲಿ ವಿಡಿಯೋವೊಂದನ್ನು ಹಂಚಿಕೊಂಡಿದ್ದಾರೆ. ಬೆಂಗಳೂರಿನಲ್ಲಿ ಐಟಿ ಉದ್ಯೋಗಿಯಾಗಿರುವ ಇವರು, ಇಲ್ಲಿ "ಯೋಗ್ಯವಾದ ಜೀವನ" ನಡೆಸಲು ತಿಂಗಳಿಗೆ ಸರಿಸುಮಾರು 51,000 ರೂಪಾಯಿಗಳು ಬೇಕಾಗುತ್ತದೆ ಎಂದು ವಿವರಿಸಿದ್ದಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ತಮ್ಮದೇ ಆದ ರೀತಿಯಲ್ಲಿ ಲೆಕ್ಕಾಚಾರಗಳನ್ನು ಹಾಕುತ್ತಿದ್ದಾರೆ. ಬೆಂಗಳೂರಿನಂತಹ ಮಹಾನಗರಗಳಲ್ಲಿ ದಿನೇ ದಿನೇ ಏರಿಕೆಯಾಗುತ್ತಿರುವ ಜೀವನ ವೆಚ್ಚವು ಯುವ ಉದ್ಯೋಗಿಗಳಿಗೆ ದೊಡ್ಡ ಸವಾಲಾಗಿ ಪರಿಣಮಿಸುತ್ತಿದೆ ಎನ್ನುವುದು ಇದರಿಂದ ಸ್ಪಷ್ಟವಾಗುತ್ತದೆ.

ಎಚ್‌ಎಸ್‌ಆರ್ ಲೇಔಟ್‌ನಲ್ಲಿ ವಾಸ ಮತ್ತು ಬಾಡಿಗೆ

ಕಾರ್ತಿಕ್ ಅವರು ಬೆಂಗಳೂರಿನ ಪ್ರಮುಖ ಐಟಿ ಹಬ್ ಆಗಿರುವ ಎಚ್‌ಎಸ್‌ಆರ್ ಲೇಔಟ್‌ನಲ್ಲಿ 1BHK ಫ್ಲಾಟ್‌ನಲ್ಲಿ ಬಾಡಿಗೆಗೆ ಇದ್ದಾರೆ. ಇದಕ್ಕಾಗಿ ಅವರು ತಿಂಗಳಿಗೆ 20,000 ರೂ. ಬಾಡಿಗೆ ಕಟ್ಟುತ್ತಿದ್ದಾರೆ. "ಬೆಂಗಳೂರಿನ ಇತರ ಪ್ರದೇಶಗಳಿಗೆ ಭೇಟಿ ನೀಡಿದ ನಂತರ, ಎಚ್‌ಎಸ್‌ಆರ್ ಲೇಔಟ್‌ನಲ್ಲಿ ನೀಡುವ ಪ್ರತಿಯೊಂದು ರೂಪಾಯಿಗೂ ಬೆಲೆಯಿದೆ ಎಂದು ನನಗನಿಸುತ್ತಿದೆ" ಎಂದು ಅವರು ಹೇಳಿದ್ದಾರೆ. ಇದರ ಜೊತೆಗೆ, ಸೋಫಾ, ಫ್ರಿಡ್ಜ್ ಮತ್ತು ಹಾಸಿಗೆಯಂತಹ ಪೀಠೋಪಕರಣಗಳು ಹಾಗೂ ಗೃಹೋಪಯೋಗಿ ವಸ್ತುಗಳನ್ನು ಬಾಡಿಗೆಗೆ ಪಡೆದಿದ್ದು, ಅದಕ್ಕಾಗಿ ತಿಂಗಳಿಗೆ 4,000 ರೂ. ಖರ್ಚು ಮಾಡುತ್ತಿದ್ದಾರೆ.

ಆಹಾರದ ವೆಚ್ಚದ ಬಗ್ಗೆ ವಿವರಿಸಿರುವ ಅವರು, ಪ್ರತಿದಿನ ಒಂದು ಹೊತ್ತಿನ ಊಟವನ್ನು ತಾವೇ ಬೇಯಿಸಿಕೊಳ್ಳುತ್ತಾರೆ. ದಿನಸಿಗಾಗಿ ವಾರಕ್ಕೆ 1,000 ರೂ. ಅಂದರೆ ತಿಂಗಳಿಗೆ 4,000 ರೂ. ಖರ್ಚಾಗುತ್ತದೆ. ಕಚೇರಿಯ ದಿನಗಳಲ್ಲಿ ಮಧ್ಯಾಹ್ನದ ಊಟ ಮತ್ತು ಸ್ನ್ಯಾಕ್ಸ್‌ಗಾಗಿ ದಿನಕ್ಕೆ 250 ರೂ.ನಂತೆ ತಿಂಗಳಿಗೆ 5,000 ರೂ. ವ್ಯಯಿಸುತ್ತಾರೆ. ಇನ್ನು ವಾರಾಂತ್ಯದಲ್ಲಿ ಒಮ್ಮೆ ಅಥವಾ ಎರಡು ಬಾರಿ ಹೊರಗಡೆ ಊಟ ಮಾಡುವುದರಿಂದ ತಿಂಗಳಿಗೆ 4,000 ರೂ. ಹೆಚ್ಚುವರಿ ವೆಚ್ಚವಾಗುತ್ತದೆ.

ಕಾರ್ತಿಕ್ ಬಳಿ ಹೋಂಡಾ CB350 ಬೈಕ್ ಇದ್ದು, ಪ್ರತಿದಿನ 4-5 ಕಿ.ಮೀ ಪ್ರಯಾಣಿಸುತ್ತಾರೆ. ಇದಕ್ಕೆ ತಿಂಗಳಿಗೆ 1,500 ರೂ. ಪೆಟ್ರೋಲ್ ಖರ್ಚಿದೆ. ಜಿಮ್ ಸದಸ್ಯತ್ವಕ್ಕಾಗಿ ವಾರ್ಷಿಕ 16,000 ರೂ. ಪಾವತಿಸಿದ್ದು, ತಿಂಗಳ ಲೆಕ್ಕದಲ್ಲಿ ಇದು 1,300 ರೂ. ಆಗುತ್ತದೆ. ತಿಂಗಳಿಗೆ 10,000 ರೂ. ಮೌಲ್ಯದ ಪ್ರೋಟೀನ್ ಸಪ್ಲಿಮೆಂಟ್ ಬಳಸಿದರೂ, ಪ್ರಾಯೋಜಕತ್ವ ಇರುವ ಕಾರಣ ಅದು ಅವರಿಗೆ ಉಚಿತವಾಗಿ ಸಿಗುತ್ತಿದೆ ಎಂದು ತಿಳಿಸಿದ್ದಾರೆ.

ನೆಟ್ಟಿಗರ ಪ್ರತಿಕ್ರಿಯೆ

ಬಟ್ಟೆಗಾಗಿ ತಿಂಗಳಿಗೆ 2,000 ರೂ. ಮೀಸಲಿಡುವ ಇವರು, ಪ್ರವಾಸಕ್ಕಾಗಿ ಪ್ರತಿ ತಿಂಗಳು 10,000 ರೂ. ಎತ್ತಿಡುತ್ತಾರೆ. ದಕ್ಷಿಣ ಭಾರತದ ಬಹುತೇಕ ಸ್ಥಳಗಳನ್ನು ಸುತ್ತಿದ್ದಾರೆ. ಇನ್ನು ವಿದ್ಯುತ್ ಬಿಲ್ ತಿಂಗಳಿಗೆ 500 ರೂ. ಬರುತ್ತದೆ. "ಒಟ್ಟಾರೆಯಾಗಿ, 26 ವರ್ಷದ ಯುವಕನೊಬ್ಬ 9 ಗಂಟೆಯಿಂದ 5ರ ವರೆಗೆ ಕೆಲಸ ಮಾಡುತ್ತಾ, ಬೆಂಗಳೂರಿನಲ್ಲಿ ಉತ್ತಮ ಜೀವನ ನಡೆಸಲು ತಿಂಗಳಿಗೆ 51,000 ರೂ. ಖರ್ಚಾಗುತ್ತದೆ" ಎಂದು ಅವರು ಲೆಕ್ಕ ನೀಡಿದ್ದಾರೆ.

ಈ ವಿಡಿಯೋಗೆ ನೆಟ್ಟಿಗರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಹಲವರು "ನೀವು ಒಬ್ಬಂಟಿಯಾಗಿ ವಾಸಿಸುತ್ತಿದ್ದರೆ ಬೆಂಗಳೂರಿನಲ್ಲಿ 51,000 ರೂ. ಖರ್ಚಾಗುವುದು ವಾಸ್ತವ" ಎಂದು ಒಪ್ಪಿಕೊಂಡಿದ್ದಾರೆ. ಮತ್ತೊಬ್ಬರು, "ಎಚ್‌ಎಸ್‌ಆರ್ ಲೇಔಟ್ ಬಾಡಿಗೆ ದುಬಾರಿಯಾದರೂ ಅಲ್ಲಿನ ವಾತಾವರಣಕ್ಕೆ ಅದು ಯೋಗ್ಯವಾಗಿದೆ" ಎಂದಿದ್ದಾರೆ.

ಇನ್ನು ಕೆಲವರು, "ಮೆಟ್ರೋ ನಗರಗಳಲ್ಲಿ ಹಣ ಉಳಿತಾಯ ಮಾಡುವುದು ಎಷ್ಟು ಕಷ್ಟ ಎಂಬುದು ಇದರಿಂದ ತಿಳಿಯುತ್ತದೆ. ಜೀವನಶೈಲಿ ಮತ್ತು ಪ್ರವಾಸದ ಖರ್ಚುಗಳು ವೈಯಕ್ತಿಕ ಆಯ್ಕೆಯಷ್ಟೇ, ಮೂಲಭೂತ ಅಗತ್ಯಗಳಲ್ಲ" ಎಂದು ಕಮೆಂಟ್ ಮಾಡಿದ್ದಾರೆ. ಒಟ್ಟಿನಲ್ಲಿ ಬೆಂಗಳೂರು ಬಜೆಟ್ ಮಾಡುವುದನ್ನು ಕಷ್ಟಕರ ರೀತಿಯಲ್ಲಿ ಕಲಿಸುತ್ತದೆ ಎಂದು ಮತ್ತೊಬ್ಬ ಬಳಕೆದಾರರು ಅಭಿಪ್ರಾಯಪಟ್ಟಿದ್ದಾರೆ.

English summary

An Amazon employee living in Bengaluru's HSR Layout recently shared a detailed monthly expense breakdown of ₹51,000, sparking a huge debate online about the city's cost of living.