ʼದರ್ಶನ್‌ 2 ಮದ್ವೆ ಆಗಿದ್ದಾರೆ, ನಾನಾದ್ರೆ ತಪ್ಪೇನು?ʼ ಗಂಡನ ಕಿರುಕುಳಕ್ಕೆ ಗೃಹಿಣಿ ಇನ್ನಿಲ್ಲ!

ತೆರೆ ಮೇಲೆ ಬರುವ ನಟ ಜನರಿಗೆ ಮಾದರಿಯಾಗಬೇಕು ಅಂತಾರೆ ತಿಳಿದವರು. ಆದರೆ, ಪತಿರಾಯನೊಬ್ಬ ರೇಣುಕಾಸ್ವಾಮಿ ಕೊಲೆ ಕೇಸ್‌ ಆರೋಪದಲ್ಲಿ ಜೈಲು ಸೇರಿರುವ ನಟ ದರ್ಶನ್ಅವರ ವೈಯಕ್ತಿಕ ಜೀವನವನ್ನು ಫಾಲೋ ಮಾಡಲು ಹೋಗಿ, ಪತ್ನಿಯ ಸಾವಿಗೆ ಕಾರಣವಾಗಿರುವ ಘಟನೆ ಸಿಲಿಕಾನ್‌ ಸಿಟಿ ಬೆಂಗಳೂರಿನಲ್ಲೇ ನಡೆದಿದೆ.

ಹುಳಿಮಾವು ವ್ಯಾಪ್ತಿಯ ಅಕ್ಷಯನಗರದಲ್ಲಿ ನಡೆದಿರುವ ಈ ಘೋರ ದುರಂತಕ್ಕೆ ಇಡೀ ಬೆಂಗಳೂರು ಬೆಚ್ಚಿಬಿದ್ದಿದೆ. ಗೃಹಿಣಿಯೊಬ್ಬರು ತಮ್ಮ ಮನೆಯಲ್ಲೇ ಪೆಟ್ರೋಲ್‌ ಸುರಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾರೆ ಎಂದು ವರದಿಯಾಗಿದೆ.

ಮೂಲಗಳ ಪ್ರಕಾರ, ಮಹಿಳೆಗೆ ತನ್ನ ಪತಿ ಪ್ರತಿದಿನವೂ ಕಿರುಕುಳ ನೀಡುತ್ತಿದ್ದನಂತೆ. ದಿನವೂ ಅಶ್ಲೀಲ ವೀಡಿಯೋ ತೋರಿಸಿ, ನಾವೂ ಈ ರೀತಿ ಮಾಡೋಣ ಎಂದು ಕಿರುಕುಳ ನೀಡುತ್ತಿದ್ದ. ಜೊತೆಗೆ ಈತ ಬೇರೆ ಮಹಿಳೆಯರ ಜೊತೆಗೂ ಅಕ್ರಮ ಸಂಬಂಧ ಇಟ್ಟುಕೊಂಡಿದ್ದ ಎನ್ನಲಾಗಿದೆ.

ಅನುಷಾ ಎಂಬುವವರು ಈ ರೀತಿ ಆತ್ಮಹತ್ಯೆಕೊಂಡಿದ್ದು, ಪತಿ ಶ್ರೀಹರಿ ಎಂಬಾತ ಮೊಬೈಲ್‌ನಲ್ಲಿ ಅಶ್ಲೀಲ ವೀಡಿಯೋ ತೋರಿಸಿ, ಟಾರ್ಚರ್ ಮಾಡುತ್ತಿದ್ದ. ಅಲ್ಲದೇ ಪತ್ನಿಯ ಮುಂದೆಯೇ ಬೇರೆ ಯುವತಿಯ ಜೊತೆ ಸಲುಗೆ ಬೆಳೆಸಿದ್ದ. ಈ ಬಗ್ಗೆ ಪ್ರಶ್ನೆ ಮಾಡಿದ್ದಕ್ಕೆ ಈಕೆಗೆ ಟಾರ್ಚರ್‌ ಮಾಡುತ್ತಿದ್ದ ಎನ್ನಲಾಗಿದೆ.

ಎರಡು ತಿಂಗಳಿಂದ ಡೈವರ್ಸ್ ಕೊಡುವಂತೆ ಪೀಡಿಸುತ್ತಿದ್ದ. ಇದರಿಂದ ಬೇಸತ್ತು ಅನುಷಾ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಮನೆಯ ವಾಶ್‌ರೂಂನಿಂದಲೇ ಗಂಡನಿಗೆ ವಿಡಿಯೋ ಕಾಲ್‌ ಮಾಡಿ, ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಹೇಳಿದ್ದರು. ಆದರೂ ಪತಿ ನಿರ್ಲಕ್ಷಿಸಿದ್ದರಿಂದ ಈ ಅವಾಂತರ ನಡೆದು ಹೋಗಿದೆ ಎಂದು ಅನುಷಾ ಅವರ ಪೋಷಕರು ಆಕ್ರೋಶ ಹೊರಹಾಕಿದ್ದಾರೆ. ಬಳಿಕ ಅವರನ್ನು ವಿಕ್ಟೋರಿಯಾ ಆಸ್ಪತ್ರೆಗೆ ಸೇರಿದರೂ ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದೆ.

ದರ್ಶನ್‌ ಕಥೆ ಹೇಳ್ತಿದ್ದ ಪತಿ: ಈ ಹಿಂದೆ ಪತ್ನಿ ಜೊತೆ ಜಗಳ ಆಡುವಾಗ ಪತಿ ನಟ ದರ್ಶನ್‌ ಅವರನ್ನು ಉದಾಹರಣೆ ನೀಡುತ್ತಿದ್ದನಂತೆ. ನಟ ದರ್ಶನ್‌ ಎರಡು ಮದುವೆ ಆಗಿದ್ದಾರೆ. ಅವರು ಸಂತೋಷವಾಗಿದ್ದಾರೆ. ನಾನು ಎರಡನೇ ಮದುವೆ ಆದರೆ ಏನ್‌ ತಪ್ಪು? ಎಂದು ಕೇಳುತ್ತಿದ್ದ ಎಂದು ಮೃತರ ಪೋಷಕರು ಸಂಕಟ ಹೊರಹಾಕಿದ್ದಾರೆ.

ʼಐದು ವರ್ಷಗಳ ಹಿಂದೆ ಇವರಿಬ್ಬರ ಮದುವೆ ನಡೆದಿತ್ತು. ಒಂದು ಮುದ್ದಾದ ಮಗು ಕೂಡ ಇವರಿಗಿದೆ. ಆದರೆ, ಇತ್ತೀಚೆಗೆ ದಂಪತಿ ನಡುವೆ ಹೆಚ್ಚು ಗಲಾಟೆಗಳು ನಡೆದಿದ್ದವು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಈ ಹಿಂದೆಯೂ ಆತ ಟಾರ್ಚರ್‌ ಮಾಡುತ್ತಿದ್ದ ವಿಷಯ ನಮ್ಮ ಗಮನಕ್ಕೆ ಬಂದಿತ್ತು. ಮರ್ಯಾದೆಗೆ ಹೆದರಿ ಪೊಲೀಸ್‌ ಠಾಣೆ ಮೆಟ್ಟಿಲೇರಲಿಲ್ಲ. ಈತನ ನಡವಳಿಕೆ ಕಂಡು ಕೆಲಸದಿಂದಲೂ ಕಿತ್ತು ಬಿಸಾಡಿದ್ದರು. ಮುದ್ದಾದ ಹೆಂಡತಿ ಇದ್ದರೂ ಆತ ಬೇರೆ ಹುಡುಗಿಯರ ಸಹವಾಸ ಮಾಡಿ ನಮ್ಮ ಮಗಳಿಗೆ ನಿತ್ಯವೂ ಕಿರುಕುಳ ನೀಡುತ್ತಿದ್ದʼ ಎಂದು ಪೋಷಕರು ಕಣ್ಣೀರು ಹಾಕಿದ್ದಾರೆ.

Helplines: COOJ Mental Health Foundation (COOJ)- 0832-2252525, ಪರಿವರ್ತನ್- +91 7676 602 602, Connecting Trust- +91 992 200 1122/+91-992 200 4305 or Sahai- 080-25497777/ [email protected]

ನಿಮ್ಹಾನ್ಸ್, ರೋಟರಿ ಸಂಸ್ಥೆ ಹಾಗೂ ಮೆಡಿಕೊ ಪ್ಯಾಸ್ಟೊರಾಲ್ ಅಸೋಸಿಯೇಷನ್ ನೆರವಿನಿಂದ ಆತ್ಮಹತ್ಯೆ ತಡೆಗಟ್ಟಲು, ಮಾನಸಿಕ ಖಿನ್ನತೆಯಿಂದ ಬಳಲುವವರಿಗಾಗಿ ಸ್ನೇಹಾ ಫೌಂಡೇಷನ್ ಸಹಾಯವಾಣಿ ಇಂತಿದೆ: 04424640050, ಟಾಟಾ ಇನ್ಸ್ಟಿಟ್ಯೂಟ್ ಆಫ್ ಸೋಷಿಯಲ್ ಸೈನ್ಸ್ 02225521111ಗೆ ಕರೆ ಮಾಡಬಹುದು.

English summary

Tired of being harassed by her husband, a wife committed suicide in Bangalore