ಪೆರೋಲ್ ಮೇಲೆ ಹೊರಬಿದ್ದ ಮತ್ತೆ ರೇಪಿಸ್ಟ್ ಆದ

ಪುಣೆ, ಜ.15: ಆತ ಅಪ್ರಾಪ್ತೆ ಮೇಲೆ ಅತ್ಯಾಚಾರ ಎಸಗಿ ಕೊಲೆಗೈದು ಜೈಲು ಸೇರಿದ್ದ. ಸನ್ನಡತೆಯ ಆಧಾರದ ಮೇಲೆ ಅವಧಿಗೂ ಮುನ್ನ ಹೊರಬಿದ್ದಿದ್ದ. ಆದರೆ, ಹುಟ್ಟುಗುಣ ಸುಟ್ಟರೂ ಹೋಗುವುದಿಲ್ಲ ಎಂಬಂತೆ ಮತ್ತೊಮ್ಮೆ ಅದೇ ರೀತಿ ಕುಕೃತ್ಯ ಎಸಗಿ ಸಿಕ್ಕಿಬಿದ್ದಿದ್ದಾನೆ.

32 ವರ್ಷದ ಆರೋಪಿ ಏಳು ತಿಂಗಳ ನಂತರ ಜೈಲಿಗೆ ಮರಳಿದ್ದಾನೆ. 2002ರಲ್ಲಿ ಅತ್ಯಾಚಾರ, ಕೊಲೆ ಸಂಬಂಧಿತ ಎರಡು ಕೇಸುಗಳಲ್ಲಿ ಅಪರಾಧಿಯಾಗಿ ಜೈಲುವಾಸ ಅನುಭವಿಸಿದ್ದ. ಆದರೆ, ಜೈಲಿನಲ್ಲಿ ಉತ್ತಮ ನಡತೆ ತೋರಿದ್ದರಿಂದ ಪೆರೋಲ್ ಮೇಲೆ ಬೇಗ ಹೊರ ಬಿದ್ದಿದ್ದ.

ಸುನಿಲ್ ಸುರೇಶ್ ಅಲಿಯಾಸ್ ಪಪ್ಪು ಸಾಳ್ವೆ ಎಂಬ ಆರೋಪಿ ಜೈಲಿನಿಂದ ಹೊರಬಿದ್ದ ಮೇಲೆ 9 ವರ್ಷ ವಯಸ್ಸಿನ ಹುಡುಗಿಯನ್ನು ಕಿಡ್ನಾಪ್ ಮಾಡಿ ಅತ್ಯಾಚಾರ ಎಸಗಿದ ಆರೋಪ ಎದುರಿಸುತ್ತಿದ್ದಾನೆ. ಅಹ್ಮದ್ ನಗರ ಜಿಲ್ಲೆಯ ಶಿರಡಿ ಪಟ್ಟಣದಲ್ಲಿ ಪಪ್ಪು ಮೇಲೆ ಪ್ರಕರಣ ದಾಖಲಾಗಿತ್ತು.

ನಾಸಿಕ್ ಜಿಲ್ಲೆಯ ಮನ್ಮದ್ ರೈಲ್ವೆ ನಿಲ್ದಾಣದಲ್ಲಿ ಸಾಳ್ವೆಯನ್ನು ಬಂಧಿಸಿದ ಪೊಲೀಸರು ಸ್ಥಳೀಯ ನ್ಯಾಯಲಯಕ್ಕೆ ಹಾಜರುಪಡಿಸಿದ್ದು, ಜ.17ರ ತನಕ ನ್ಯಾಯಾಂಗ ಬಂಧನಕ್ಕೊಳಪಡಿಸಲಾಗಿದೆ.

2003ರಲ್ಲಿ ಸಿನ್ನಾರ್ ಎಂಬಲ್ಲಿ ಅಪ್ರಾಪ್ತ ವಯಸ್ಕ ಹುಡುಗಿಯ ಮೇಲೆ ಅತ್ಯಾಚಾರ ಎಸಗಿ, ಕೊಲೆಗೈದ ಆರೋಪದ ಮೇಲೆ ನಾಸಿಕ್ ನಲ್ಲಿ ಸಾಳ್ವೆಯನ್ನು ಬಂಧಿಸಲಾಗಿತ್ತು. ನಾಸಿಕ್ ಸೆಷನ್ಸ್ ಕೋರ್ಟ್ ನಲ್ಲಿ ಸಾಳ್ವೆಗೆ ಜೀವಾವಧಿ ಶಿಕ್ಷೆ ವಿಧಿಸಲಾಗಿತ್ತು.

ಸೆಷನ್ಸ್ ಕೋರ್ಟ್ ವಿರುದ್ಧ ಸಾಳ್ಮೆ ಬಾಂಬೆ ಹೈಕೋರ್ಟಿಗೆ ಮೇಲ್ಮನವಿ ಸಲ್ಲಿಸಿದ್ದ. ಒಟ್ಟಾರೆ 10 ವರ್ಷ ಹಾಗೂ 7 ವರ್ಷಗಳ ಕಠಿಣ ಶಿಕ್ಷೆ ಪಡೆದಿದ್ದ ಸಾಳ್ವೆ ನಾಸಿಕ್ ರಸ್ತೆ ಜೈಲಿನಿಂದ ಮೇ 28, 2012ರಂದು ಬಿಡುಗಡೆಗೊಂಡಿದ್ದ.

ಆದರೆ, ಪುನಃ ಶಿರಡಿ ಮೂಲದ 9 ವರ್ಷದ ಬಾಲಕಿಯ ಮೇಲೆ ಅತ್ಯಾಚಾರ ಎಸಗಿ, ಕೊಲೆಗೈದು ಶವವನ್ನು ರೈಲ್ವೆ ನಿಲ್ದಾಣದ ಬಳಿ ಹೂತು ಹಾಕಿ ಪರಾರಿಯಾಗಿದ್ದ. ಬಾಲಕಿಯ ಶವ ಹೊರ ತೆಗೆದ ಪೊಲೀಸರಿಗೆ ಕೊನೆಗೂ ಇದು ಸಾಳ್ವೆ ಮಾಡಿರುವ ಕೃತ್ಯ ಎಂದು ತಿಳಿದು ಬಂದಿದೆ. ಶಿರಡಿ ಪಟ್ಟಣವಾಸಿಗಳು ಸಾಳ್ವೆಗೆ ಕಠಿಣ ಶಿಕ್ಷೆ ವಿಧಿಸಬೇಕು ಎಂದು ಒತ್ತಾಯಿಸಿ ಪ್ರತಿಭಟನೆ ನಡೆಸಿದ್ದಾರೆ.

ಕಳೆದ 13 ವರ್ಷಗಳಲ್ಲಿ ಮಹಿಳೆಯ ಮೇಲೆ ದೌರ್ಜನ್ಯ ಎಸಗಿದ ಪ್ರಕರಣಕ್ಕೆ ಸಂಬಂಧಿಸಿದ ಸುಮಾರು 6,000 ದುಷ್ಟರ ಹೆಸರುಗಳನ್ನು ಭಾವ ಚಿತ್ರ ಸಮೇತ 'hall of shame' ಹೆಸರಿನಲ್ಲಿ ಅಧಿಕೃತ ವೆಬ್ ತಾಣ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಕಟಿಸುವುದಾಗಿ ಇತ್ತೀಚೆಗೆ ಹರ್ಯಾಣ ಪೊಲೀಸರು ಹೇಳಿದ್ದನ್ನು ಇಲ್ಲಿ ಸ್ಮರಿಸಬಹುದು.

English summary

A 32-year-old man, who was released from jail for good behaviour on parole rapes, murders minor girl. The accused Sunil Suresh alias Pappu Salve was arrested by Maharashtra police.