ದಿ ಹಿಂದೂ ಪತ್ರಿಕೆಯ ಪಿತಾಮಹ ಜಿ ಕಸ್ತೂರಿ ವಿಧಿವಶ

By Prasad

Updated: Friday, September 21, 2012, 13:01 [IST]

ಚೆನ್ನೈ, ಸೆ. 21 : ದಿ ಹಿಂದೂ ಆಂಗ್ಲ ದಿನಪತ್ರಿಕೆಯ ಸಂಪಾದಕರಾಗಿ 25 ವರ್ಷಗಳ ಕಾಲ ದೀರ್ಘಕಾಲ ಸೇವೆ ಸಲ್ಲಿಸಿದ ಹೆಗ್ಗಳಿಗೆ ಹೊಂದಿದ್ದ, ಪತ್ರಿಕಾರಂಗದ ಭೀಷ್ಮ, ಖ್ಯಾತ ಪತ್ರಕರ್ತ ಗೋಪಾಲನ್ ಕಸ್ತೂರಿ (87) ಅವರು ಶುಕ್ರವಾರ, ಸೆ.21ರ ಬೆಳಗಿನ ಜಾವ 2 ಗಂಟೆ ಸುಮಾರಿಗೆ ಚೆನ್ನೈನ ಕಸ್ತೂರಿ ರಂಗ ರಸ್ತೆಯಲ್ಲಿರುವ ತಮ್ಮ ಸ್ವಗೃಹದಲ್ಲಿ ವಿಧಿವಶರಾದರು.

ಪತ್ರಿಕೆಯನ್ನು ಬೆಳೆಸುವಲ್ಲಿ ಮತ್ತು ಆಧುನೀಕರಣಗೊಳಿಸುವಲ್ಲಿ ಅಪಾರವಾಗಿ ಶ್ರಮಿಸಿದ ಕಸ್ತೂರಿ ಅವರು ಹೆಂಡತಿ ಕಮಲಾ ಕಸ್ತೂರಿ, ಮಕ್ಕಳಾದ ಕೆ. ಬಾಲಾಜಿ, ಕೆ. ವೇಣುಗೋಪಾಲ್, ಮಗಳು ಲಕ್ಷ್ಮೀ ಶ್ರೀನಾಥ್, ಐವರು ಮೊಮ್ಮಕ್ಕಳು ಮತ್ತುತ ಇಬ್ಬರು ಮರಿಮೊಮ್ಮಕ್ಕಳನ್ನು ಜಿ ಕಸ್ತೂರಿ ಅವರು ಅಗಲಿದ್ದಾರೆ.

134 ವರ್ಷಗಳ ಇತಿಹಾಸ ಹೊಂದಿರುವ ದಿ ಹಿಂದೂ ಪತ್ರಿಕೆಯನ್ನು 1965ರಿಂದ 1991ರವರೆಗೆ 25 ವರ್ಷಗಳ ಕಾಲ ಅವರು ಸಂಪಾದಕರಾಗಿ ಪತ್ರಿಕೆಯಲ್ಲಿ ಜೀವ ತುಂಬಿದ್ದರು. ಪತ್ರಿಕೆ ಸೆ.20ರಂದು ತನ್ನ 134ನೇ ಹುಟ್ಟುಹಬ್ಬ ಆಚರಿಸಿದ ಮರುದಿನವೇ ಪತ್ರಿಕೆಯನ್ನು ಆಗಾಧ ಪ್ರಮಾಣದಲ್ಲಿ ಬೆಳೆಸಿದ ಕಸ್ತೂರಿ ಅವರು ಅಸುನೀಗಿದ್ದಾರೆ. ಕಸ್ತೂರಿ ಅವರು ಕಸ್ತೂರಿ ಅಂಡ್ ಸನ್ಸ್‌ನ ಕಾರ್ಯನಿರ್ವಾಹಕ ನಿರ್ದೇಶಕರಾಗಿ ಮತ್ತು ದಿ ಹಿಂದೂ ಗ್ರೂಪ್ ಆಫ್ ಪಬ್ಲಿಕೇಷನ್ಸ್‌ನ ಮಾಲೀಕರಾಗಿಯೂ ಸೇವೆ ಸಲ್ಲಿಸಿದ್ದರು.

ಸಂಪಾದಕರಾಗಿ ನಿವೃತ್ತಿ ಹೊಂದಿದ ನಂತರವೂ ಕಸ್ತೂರಿ ಅವರು ತಮ್ಮ ಕೊನೆಯ ಗಳಿಗೆಯವರೆಗೆ ಅತ್ಯಂತ ಕ್ರಿಯಾಶೀಲರಾಗಿದ್ದರು. 1924ರ ಡಿಸೆಂಬರ್ 17ರಂದು ಚೆನ್ನೈನಲ್ಲಿ ಜನಿಸಿದ ಕಸ್ತೂರಿ ಅವರು, ಚೆನ್ನೈನಲ್ಲಿಯೇ ಶಾಲೆ ಮತ್ತು ಕಾಲೇಜು ವಿದ್ಯಾಭ್ಯಾಸ ಮುಗಿಸಿದರು. ಮದ್ರಾಸ್ ವಿಶ್ವವಿದ್ಯಾಲಯದಲ್ಲಿ ಎಂಎ ಪಡೆದಬಳಿಕ 1944ರಲ್ಲಿ ಪತ್ರಿಕೆಯನ್ನು ಸೇರಿದ್ದರು. ಅವರ ತಂದೆ ಕಸ್ತೂರಿ ಶ್ರೀನಿವಾಸನ್ ಅವರು ಕೂಡ ದಿ ಹಿಂದೂ ಪತ್ರಿಯಲ್ಲಿ 1934ರಿಂದ 1959ರವರೆಗೆ ಸಂಪಾದಕರಾಗಿ ಸೇವೆ ಸಲ್ಲಿಸಿದ್ದರು. (Photo courtesy : V. Ganesan)

ಜಗದೀಶ್ ಶೆಟ್ಟರ್ ಸಂತಾಪ : ಚೆನ್ನೈ ಮೂಲದ ಆಂಗ್ಲ ದಿನಪತ್ರಿಕೆ ದಿ ಹಿಂದೂನ ಮಾಜಿ ಸಂಪಾದಕ ಜಿ. ಕಸ್ತೂರಿ ಅವರ ಅಗಲಿಕೆಗೆ ಕರ್ನಾಟಕದ ಮುಖ್ಯಮಂತ್ರಿ ಜಗದೀಶ್ ಶೆಟ್ಟರ್ ಅವರು ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ. ಯಾವುದೇ ಇಸಂಗಳಿಗೆ ಕಸ್ತೂರಿಯವರು ಬಲಿಯಾಗದೆ, ಅತ್ಯಂತ ಪ್ರಾಮಾಣಿಕತೆಯಿಂದ ಮತ್ತು ಅತ್ಯಂತ ನಿಷ್ಪಕ್ಷಪಾತದಿಂದ ಅವರು ಪತ್ರಿಕೆಯನ್ನು ನಡೆಸಿ ಇಂದಿನ ಪತ್ರಕರ್ತರಿಗೆ ಮಾದರಿಯಾಗಿದ್ದರು. ಪತ್ರಿಕಾಧರ್ಮ ಮೇಲೆತ್ತಿ ಹಿಡಿದಿರುವವರಲ್ಲಿ ಕಸ್ತೂರಿ ಅವರು ಅಗ್ರಗಣ್ಯರು ಎಂದು ಶೆಟ್ಟರ್ ಅವರು ಕಸ್ತೂರಿಯವರ ಕೊಡುಗೆಯನ್ನು ಶ್ಲಾಘಿಸಿದ್ದಾರೆ.