ಫುಟ್ಬಾಲ್ : ಭಾರತಕ್ಕೆ ಹ್ಯಾಟ್ರಿಕ್ ನೆಹರೂ ಕಪ್
ನವದೆಹಲಿ, ಸೆ.3: ಹಾಲಿ ಚಾಂಪಿಯನ್ ಭಾರತ ಭಾನುವಾರ ನಡೆದ ನೆಹರೂ ಕಪ್ ಫುಟ್ಬಾಲ್ ಟೂರ್ನಮೆಂಟ್ನ ಅಂತಿಮ ಹಣಹಣಿಯಲ್ಲಿ ಬಲಿಷ್ಠ ಕ್ಯಾಮರೂನ್ ತಂಡವನ್ನು ಪೆನಾಲ್ಟಿ ಶೂಟೌಟ್ನಲ್ಲಿ 4-5 ಅಂತರದಿಂದ ಮಣಿಸಿ ಸತತ ಮೂರನೆ ಬಾರಿ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡು ಸಂಭ್ರಮದಿಂದ ಕುಣಿದಾಡಿದೆ.
90 ನಿಮಿಷಗಳ ಆಟದಲ್ಲಿ ಉಭಯ ತಂಡಗಳು ತಲಾ 2 ಗೋಲು ದಾಖಲಿಸಿತ್ತು. ಮತ್ತೆ ನೀಡಲಾದ ಹೆಚ್ಚುವರಿ 31 ನಿಮಿಷಗಳಲ್ಲೂ ಗೋಲು ಬರಲಿಲ್ಲ. ಹೀಗಾಗಿ ಫಲಿತಾಂಶವನ್ನು ಪೆನಾಲ್ಟಿ ಶೂಟೌಟ್ ಮೂಲಕ ನಿರ್ಧರಿಸಲಾಯಿತು.
ಪೆನಾಲ್ಟಿ ಶೂಟೌಟ್ನಲ್ಲಿ ಭಾರತದ ಪರ ರಾಬಿನ್ ಸಿಂಗ್, ಸುನೀಲ್ ಚೆಟ್ರಿ, ಡೆಂಝಿಲ್ ಫ್ರಾಂಕೊ , ಮೆಹ್ತಾಬ್ ಹುಸೈನ್ ಮತ್ತು ಕ್ಲಿಲ್ಫರ್ಡ್ ಮಿರಾಂದ ಚೆಂಡನ್ನು ಗುರಿ ತಲುಪಿಸಿ ಭಾರತಕ್ಕೆ ಮೂರನೆ ಬಾರಿ ಟ್ರೋಫಿ ದೊರಕಿಸಿಕೊಡುವಲ್ಲಿ ಯಶಸ್ವಿಯಾದರು.
ಆದರೆ ಕ್ಯಾಮರೂನ್ ಪರ ಅಶು ತಾಂಬೆ, ಆಸ್ಮಿಲಾ ಬಾಬಾ, ಪೌಲ್ ಬೆಬೈ ಮತ್ತು ಕಿಂಗು ಎಂಪೊಂಡಾ ಯಶಸ್ಸು ಸಾಧಿಸಿದರು. ಭಾರತ ಈ ಹಿಂದೆ 2007 ಮತ್ತು 2009ರಲ್ಲಿ ನೆಹರೂ ಕಪ್ ಚಾಂಪಿಯನ್ಶಿಪ್ನ್ನು ಗೆದ್ದುಕೊಂಡಿತ್ತು.
ಟೂರ್ನಿಯಲ್ಲಿ ಭಾರತ ತಂಡ ತಾನಾಡಿದ 4 ಪಂದ್ಯಗಳಿಂದ 2 ಜಯ, ತಲಾ ಒಂದು ಡ್ರಾ ಮತ್ತು ಸೋಲಿನಿಂದ 7 ಅಂಕ ಸಂಪಾದಿಸಿದರೆ, ಕೆಮರೂನ್ ತಂಡ 4 ಪಂದ್ಯಗಳಿಂದ 3 ಜಯ ಒಂದು ಡ್ರಾ ಸೇರಿದಂತೆ 10 ಅಂಕ ಸಂಪಾದಿಸಿ -ಫೈನಲ್ ಪ್ರವೇಶಿಸಿತ್ತು. ಈಗಾಗಲೇ ಫೀಫಾ ಶ್ರೇಣಿಯಲ್ಲಿ ಇತಿಹಾಸದಲ್ಲೇ ಕನಿಷ್ಠ 168ನೇ ಸ್ಥಾನಕ್ಕೆ ಕುಸಿದಿರುವ ಭಾರತ ತಂಡ ಈ ಗೆಲುವಿನಿಂದ ತನ್ನ ಸ್ಥಾನ ಉತ್ತಮಪಡಿಸಿಕೊಳ್ಳಲಿದೆ.
ವಿಶ್ವಕಪ್ ನಲ್ಲಿ ಆಡಿದ ಅನುಭವ ಹೊಂದಿರುವ ಕೆಮರೂನ್ ತಂಡ ಟೂರ್ನಿಯ ಬಲಿಷ್ಠ ತಂಡಗಳಲ್ಲಿ ಒಂದಾಗಿತ್ತು, ಲೀಗ್ ಹಂತದಲ್ಲಿ ಭಾರತದ ವಿರುದ್ಧ ಸುಲಭ ಜಯ ಕೂಡಾ ದಾಖಲಿಸಿತ್ತು. ಭಾರತಕ್ಕೆ ಜಯ ಅಷ್ಟು ಸುಲಭವಾಗಿರಲಿಲ್ಲ. ಆಟಗಾರರು ಸಂಘಟಿತವಾಗಿ ಹೋರಾಟ ನಡೆಸಿದ್ದು ಕೊನೆಗೂ ಫಲ ನೀಡಿದೆ.
Click it and Unblock the Notifications
Sign in with Google