ಮದ್ಯ ಸೇವನೆಯಿಂದ ಕ್ಯಾನ್ಸರ್ ಬಂದೀತು ಜೋಕೆ
ಅತಿಯಾದ ಮದ್ಯ ಸೇವನೆಯಿಂದ ನಮ್ಮ ದೇಹ ಜರ್ಜರಿತವಾದಾಗ ಬಿಯರ್, ವೈನ್ ಅಥವಾ ಇನ್ನಾವುದೇ ಮದ್ಯದಿಂದ ಅಸಿಟಾಲ್ಡಿಹೈಡ್ ಎಂಬ ರಾಸಾಯನಿಕ ಉತ್ಪತ್ತಿಯಾಗುತ್ತದೆ. ಇದು ಕ್ಯಾನ್ಸರ್ಗೆ ಕಾರಣವಾಗುವ ಫಾರ್ಮಾಲ್ಡಿಹೈಡ್ ರಾಸಾಯನಿಕ ವಸ್ತುವನ್ನು ಹೋಲುತ್ತದೆ ಎಂದು ಮಿನ್ನೇಸೋಟಾ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಕಂಡುಹಿಡಿದಿದ್ದಾರೆ.
"ಅಸಿಟಾಲ್ಡಿಹೈಟ್ ರಾಸಾಯನಿಕ ಕ್ರಮೇಣ ಡಿಎನ್ಎ ಮೇಲೆ ದುಷ್ಪರಿಣಾಮ ಬೀರಲು ಪ್ರಾರಂಭಿಸುತ್ತದೆ. ಇದರಿಂದ ಜೀವಕೋಶಗಳಲ್ಲಿನ ವಂಶವಾಹಿನಿ(ಕ್ರೊಮೊಸೋಮ್)ಗಳು ಅಸ್ವಾಭಾವಿಕವಾಗಿ ವರ್ತಿಸಲು ಪ್ರಾರಂಭಿಸುತ್ತವೆ. ಇದರ ಮುಂದಿನ ಹಂತವೇ ಕ್ಯಾನ್ಸರ್ ಕೋಶಗಳ ಬೆಳೆಯುವಿಕೆ. ನಮ್ಮ ಸಂಶೋಧನೆಯಲ್ಲಿ ಇದಕ್ಕೆ ಮೊದಲ ಪುರಾವೆ ದೊರೆತಿದೆ" ಎಂದು ಸಂಶೋಧನೆಯ ಮುಂದಾಳತ್ವ ವಹಿಸಿದ್ದ ಸಿಲ್ವಿಯಾ ಬಾಲ್ಬೊ ಹೇಳಿದ್ದಾರೆ.
ಅಸಿಟಾಲ್ಡಿಹೈಡ್ ಡಿಎನ್ಎ ಮೇಲೆ ಆಕ್ರಮಣ ಮಾಡಿ ಅದರ ಕಾರ್ಯನಿರ್ವಹಣೆಯನ್ನು ಏರುಪೇರು ಮಾಡುತ್ತದೆ. ಇದರಿಂದ ಕ್ಯಾನ್ಸರ್ ಬರುವ ರಿಸ್ಕ್ ಜಾಸ್ತಿ ಇರುತ್ತದೆ. ಆದರೆ ಇದರ ಜೊತೆಗೆ ಅಲ್ಕೋಹಾಲ್ ಸೇವಿಸುವ ಎಲ್ಲರಲ್ಲೂ ಕ್ಯಾನ್ಸರ್ ಏಕೆ ಬರುವುದಿಲ್ಲ ಎಂಬ ಪ್ರಶ್ನೆ ಉದ್ಭವಿಸುವುದು ಸಹಜ. ಇದಕ್ಕೆ ಉತ್ತರವನ್ನೂ ವಿಜ್ಞಾನಿಗಳು ನೀಡಿದ್ದಾರೆ.
ಡಿಎನ್ಎಗೆ ಘಾಸಿಯಾದರೆ ಅದನ್ನು ಸರಿಪಡಿಸುವ ಸ್ವಾಭಾವಿಕ ವ್ಯವಸ್ಥೆ ನಮ್ಮ ದೇಹದಲ್ಲಿಯೇ ಇರುತ್ತದೆ. ಆದ್ದರಿಂದ, ಅಲ್ಕೋಹಾಲ್ ಸೇವನೆಯಿಂದ ದೇಹದ ಮೇಲೆ ಇತರ ವ್ಯತಿರಿಕ್ತ ಪರಿಣಾಮಗಳಾದರೂ ಕ್ಯಾನ್ಸರ್ ಬರುವ ಸಾಧ್ಯತೆ ಇರುವುದಿಲ್ಲ. ಅಲ್ಲದೆ, ಅಲ್ಕೋಹಾಲ್ ಡಿಹೈಡ್ರೋಜೆನೇಸ್ ಎಂಬ ಎನ್ಜೈಮ್ ಬಹಳಷ್ಟು ಜನರಲ್ಲಿ ಇದ್ದು, ಅಸಿಟಾಲ್ಡಿಹೈಡ್ ರಾಸಾಯನಿಕವನ್ನು ಅಸಿಟೇಟ್ ಆಗಿ ಪರಿವರ್ತಿಸುತ್ತದೆ. ಇದು ಅಷ್ಟು ಅಪಾಯಕಾರಿ ಅಲ್ಲ.
ಆದರೆ, ಏಷ್ಯಾದ ಅಲ್ಕೋಹಾಲ್ ಸೇವಿಸುವ ಶೇ.30ರಷ್ಟು ಜನರಲ್ಲಿ ಈ ಎನ್ಜೈಮ್ ಕೊರತೆಯಿದೆ. ಹಾಗಾಗಿ ಮದ್ಯ ಸೇವನೆಯಿಂದ ಉತ್ಪತ್ತಿಯಾಗುವ ಅಸಿಟಾಲ್ಡಿಹೈಡ್ ರಾಸಾಯನಿಕ ಅಸಿಟೇಟ್ ಆಗಿ ಪರಿವರ್ತನೆಯಾಗುವುದಿಲ್ಲ. ಇದು ಕ್ಯಾನ್ಸರ್ ಆಗುವ ಸಾಧ್ಯತೆಯನ್ನು ಹೆಚ್ಚಿಸುತ್ತದೆ ಎಂದು ವಿಜ್ಞಾನಿಗಳು ವಿಶ್ಲೇಷಿಸಿದ್ದಾರೆ.
ಮದ್ಯಕ್ಕಿಂತ ಚಹಾ ಉತ್ತಮ : ಅಲ್ಕೋಹಾಲ್ ಬದಲಿಗೆ ಭಾರತ ಮತ್ತು ಪಾಕಿಸ್ತಾನದ ಬಂಜರು ಪ್ರದೇಶದಲ್ಲಿ ಕಾಣಸಿಗುವ ಅಪರೂಪದ ಸಸ್ಯದಿಂದ ತಯಾರಿಸಿದ ಹರ್ಬಲ್ ಚಹಾ ಕುಡಿಯಿರಿ. ಇದರಿಂದ ಕ್ಯಾನ್ಸರ್ ಮಾಯವಾಗುತ್ತದೆ ಎಂದು ಲಂಡನ್ ವಿಜ್ಞಾನಿಗಳು ಕಂಡುಹಿಡಿದಿದ್ದಾರೆ.
Click it and Unblock the Notifications
Sign in with Google