13 ಕಿರು ಅರಣ್ಯ ಉತ್ಪನ್ನಗಳಿಗೆ ಬೆಂಬಲ ಬೆಲೆ

ನವದೆಹಲಿ, ಜೂನ್ 2: ಮುಂದಿನ ವರ್ಷದಿಂದ 13 ಕಿರು ಅರಣ್ಯ ಉತ್ಪನ್ನಗಳಿಗೆ ಕನಿಷ್ಠ ಬೆಂಬಲ ಬೆಲೆ ದಕ್ಕುವ ಭಾಗ್ಯವಿದೆ. ಈಗಾಗಲೇ ಈ ಯೋಜನೆಗೆ ಯೋಜನಾ ಆಯೋಗ ಒಪ್ಪಿಗೆ ಸೂಚಿಸಿದ್ದು, ಇದೇ 7 ರಂದು ಹಣಕಾಸು ಸಚಿವಾಲಯ ಅಂಕಿತ ಹಾಕಬೇಕಿದೆ. 2013ರ ಜನವರಿ ವೇಳೆಗೆ ಕನಿಷ್ಠ ಬೆಂಬಲ ಬೆಲೆ Minimum Support Price (MSP) ಆಯೋಗ ಸ್ಥಾಪನೆಯಾಗಲಿದೆ.

ಅಮೂಲ್ಯ ಕಿರು ಅರಣ್ಯ ಉತ್ಪನ್ನಗಳನ್ನೇ (MFPs) ನಂಬಿ ಜೀವನ ನಡೆಸುತ್ತಿರುವವರು ಹತ್ತಾರು ಕೋಟಿ ಮಂದಿ. ಇವರಲ್ಲಿ ಬಹುತೇಕರು ಬುಡಕಟ್ಟಿನವರು. ಕಿರು ಅರಣ್ಯ ಉತ್ಪನ್ನಗಳೆ ಅವರಿಗೆ ಜೀವನಾಧಾರ. ಆದ್ದರಿಂದ ಪ್ರಮುಖವಾದ 13 ಕಿರು ಅರಣ್ಯ ಉತ್ಪನ್ನಗಳಿಗೆ ಬೆಂಬಲ ಬೆಲೆ ದಕ್ಕಿಸಿಕೊಟ್ಟರೆ ಈ ಗಿರಿಜನರ ಬದುಕು ಹಸನಾದೀತು ಎಂಬುದು ಈ ಯೋಜನೆಯ ಲೆಕ್ಕಾಚಾರ.

ಮತ್ತೊಂದು ಗಮನಾರ್ಹ ಅಂಶವೆಂದರೆ ಕೇಂದ್ರ ಸರಕಾರ ಈ ಯೋಜನೆಯನ್ನು ಮಹಾತ್ಮಾ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯನ್ನಾಗಿ (MGNREGS) ಪರಿವರ್ತಿಸಲು ನಿರ್ಧರಿಸಿದೆ.

ಅನೇಕ ಅಡೆತಡೆ, ಆಡಳಿತ ಯಂತ್ರ ಅದರಲ್ಲೂ ವಿವಿಧ ರಾಜ್ಯಗಳ ಅರಣ್ಯ ಇಲಾಖೆಗಳು ಈ ಯೋಜನೆಗೆ ಅಡ್ಡಗಾಲು ಹಾಕಿದ್ದವು. ಕೊನೆಗೆ ಎರಡು ಪರಿಣತ ಸಮಿತಿಗಳನ್ನು ರಚಿಸಿ, ಅವುಗಳ ಸಲಹೆ, ಸೂಚನೆಗಳನ್ನು ಕೇಳಲಾಯಿತು. ಕೊನೆಗೂ ಈ ಯೋಜನೆ ಸಾಕಾರಗೊಂಡಿರುವುದು ಸ್ವಾಗತಾರ್ಹವಾಗಿದೆ.

ಬುಡಕಟ್ಟು ಜನಾಂಗಕ್ಕೆ ವರ: ಕಿರು ಅರಣ್ಯ ಉತ್ಪನ್ನಗಳಿಗೆ ಕನಿಷ್ಠ ಬೆಂಬಲ ಬೆಲೆ ಯೋಜನೆಯು ಬುಡಕಟ್ಟು ಜನಾಂಗಕ್ಕೆ ವರವಾಗಲಿದೆ. ಅವರ ಸಾಮಾಜಿಕ ಮತ್ತು ಆರ್ಥಿಕ ಶ್ರೇಯೋಭಿವೃದ್ಧಿಯಲ್ಲಿ ಇದು ಪ್ರಧಾನ ಪಾತ್ರ ವಹಿಸಲಿದೆ. ಅಂದಹಾಗೆ, ಈ 13 ಕಿರು ಅರಣ್ಯ ಉತ್ಪನ್ನಗಳ ವಾರ್ಷಿಕ ವಹಿವಾಟು ಆರಂಭದ ಹಂತದಲ್ಲೇ (ಗ್ರಾಹಕ ದರದಲ್ಲಿ ಅಲ್ಲ) 3,600 ಕೋಟಿ ರುಪಾಯಿ ಪ್ರಮಾಣದ್ದಾಗಿದೆ.

ಈ 13 ಕಿರು ಅರಣ್ಯ ಉತ್ಪನ್ನಗಳು ಯಾವುವೆಂದರೆ tendu, bamboo, mahua flower, mahua seeds, sal leaves, sal seeds, lac, chironji, wild honey, myrobalan, tamarind, gums ಮತ್ತು karanj.

ಪ್ರಸ್ತುತ ಈ ಕಿರು ಅರಣ್ಯ ಉತ್ಪನ್ನಗಳ ಸಂಗ್ರಹಕಾರರು ಅಂದರೆ ಬುಡಕಟ್ಟು ಜನರನ್ನು ಸ್ಥಳೀಯ ನಾಯಕರು, ವ್ಯಾಪಾರಸ್ಥರು ಮತ್ತು ಪಟ್ಟಭದ್ರ ಹಿತಾಸಕ್ತಿಗಳು ದುರುಪಯೋಗ ಪಡಿಸಿಕೊಳ್ಳುತ್ತಿವೆ. ಇದಕ್ಕೆ ಕಡಿವಾಣ ಹಾಕುವುದೇ ಯೋಜನೆಯ ಗುರಿಯಾಗಿದೆ. ಜತೆಗೆ, ನಿರಂತರ ಮತ್ತು ಸುಸ್ಥಿರವಾಗಿ ಈ ಉತ್ಪನ್ನಗಳನ್ನು ಕೊಯ್ಲು ಮಾಡುವುದಕ್ಕೆ ಅವಕಾಶ ಕಲ್ಪಿಸಬಹುದಾಗಿದೆ.

English summary

The Ministry of Tribal Affairs (MoTA)'s plan to introduce a Minimum Support Price (MSP) mechanism for 13 items of minor forest produce (MFP) has been approved by the Planning Commission. The scheme would like a MSP Commission to be set up by January 2013, the sources said.