ಮಾರ್ಕೆಟ್ ಧ್ವಂಸ; ಪುರಾತನ ಮರಗಳನ್ನೂ ಕಡಿದು ಹಾಕಿ

ಬೆಂಗಳೂರು, ಜ.24: ಬಸವನಗುಡಿಯ ಪುರಾತನ ಲ್ಯಾಂಡ್ ಮಾರ್ಕ್ ಗಳಲ್ಲಿ ಒಂದಾಗಿದ್ದ ಗಾಂಧಿಬಜಾರ್ ಮಾರುಕಟ್ಟೆಗಳೆಲ್ಲ ಇಂದು ಧ್ವಂಸವಾಗಿವೆ. ಮಾರುಕಟ್ಟೆಯ ಅಂಗಡಿಗಳೊಂದಿಗೆ ಅವಿನಾಭಾವ ಸಂಬಂಧ ಹೊಂದಿದ್ದ ಟ್ರಾಫಿಕ್ ಪೊಲೀಸರು ಏನನ್ನುತ್ತಾರೆ?

ಪೊಲೀಸರ 'ಮಾಮೂಲು' ವಿಷ್ಯಾ ಏನೇ ಇರಬಹುದು. ಆದರೆ ನಿಜಕ್ಕೂ ಅವರೂ ನಿಟ್ಟುಸಿರುಬಿಟ್ಟಿದ್ದಾರೆ. 'ಯಾವಾಗ್ಲೋ ಈ ಕೆಲಸ ಆಗಬೇಕಿತ್ತು. ತುಂಬಾ ರಫ್ಫು ಇಲ್ಲಿನ ಅಂಗಡಿಗವರು. ನಮಗೂ ಸಾಕಾಗಿ ಹೋಗಿತ್ತು. ಏನ್ಮಾಡೋಣ, ಸದ್ಯ ಈಗ್ಲಾದರೂ ನೆಲಸಮವಾಯಿತಲ್ಲಾ. ಪಾಲಿಕೆಯವರು ಸರಿಯಾದ ಕೆಲಸವನ್ನೇ ಮಾಡಿದ್ದಾರೆ' ಎನ್ನುತ್ತಾರೆ ಬಸವನಗುಡಿ ಟ್ರಾಫಿಕ್ ಪೊಲೀಸ್ ಅಧಿಕಾರಿಯೊಬ್ಬರು. ಅವರ ಮಾತುಗಳಲ್ಲೇ ಕೇಳಿ:

ಮುಂದೆ ಏನ್ಮಾಡಬೇಕು ಅಂದರೆ ಈ ಅಂಗಡಿಗಳನ್ನು ನೆಲಸಮ ಮಾಡಿದಂತೆ ಅವುಗಳಿಗೆ ಆಸರೆಯಾಗಿರುವ ನಾಲ್ಕಾರು ಬೃಹತ್ ಮರಗಳನ್ನೂ ಕಡಿದು ಹಾಕಬೇಕು. ಇವು ಟ್ರಾಫಿಕ್ ಗೆ ಅಡ್ಡಲಾಗಿ ಅಂಗಡಿಗಳಿಗೆ ಆಸರೆಯಾಗಿ ಬೇರುಬಿಟ್ಟಿವೆ. ನೂರಾರು ವರ್ಷಗಳ ಈ ಮರಗಳನ್ನು ಕಡಿದುಹಾಕಿದರೆ ಅರ್ಧ ಕೆಲಸ ಸಲೀಸಾದೀತು.

ಟ್ರಾಫಿಕ್ ಸಂಚಾರಕ್ಕೆ ಮತ್ತಷ್ಟು ಜಾಗ ಸಿಗುತ್ತದೆ. ಯಾವಾಗ ಟ್ರಾಫಿಕ್ ಜಾಸ್ತಿ ಆಗುತ್ತೋ ಆಗ ಅಂಗಡಿಗಳವರು ರೋಡಿಗೆ ಬರುವುದಕ್ಕೆ ಹಿಂಜರಿಯುತ್ತಾರೆ. ಅಂಗಡಿಗಳವರು ಆ ಮರಗಳಿಗೆ ಮೊಳೆ ಹೊಡೆದು ತಮ್ಮ ಹಕ್ಕು ಸ್ಥಾಪಿಸುವುದೂ ತಪ್ಪುತ್ತದೆ.

ಹೌದು, ನಮ್ಮ ಪೊಲೀಸ್ ಸಾಹೇಬರು ಹೇಳಿದ್ದೂ ಸರಿ ಅನ್ನಿಸುತ್ತಿದೆ. ಮೊದಲು ಆ ಕಾರ್ಯವಾಗಲಿ. ಆದರೆ ಈ ಪರಿಸರವಾದಿಗಳು ರಗಳೆ ತೆಗೆಯದಿರಲಿ ಎಂದು ಆಶಿಸೋಣ. ಸುವಿಶಾಲ ರಸ್ತೆಗಳನ್ನು ಕಾಣೋಣ.

English summary

BBMP has demolished all the flower markets, fruit stalls and vegetable stalls in Gandhi Bazaar, Bangalore on Jan 23 midnight. Interestingly local police say that to smoothen the traffic here big trees on the both sides of the road should also be razed. Point to be taken BBMP.