ಏರ್ ಇಂಡಿಯಾ ಟಿಕೇಟ್ ಪ್ರಯಾಣಿಕರೇ, ಗಮನಿಸಿ

ನವದೆಹಲಿ, ಜ.10: ಆರ್ಥಿಕ ಸಂಕಷ್ಟ ಎದುರಿಸುತ್ತಿರುವ ಏರ್ ಇಂಡಿಯಾ ವಿಮಾನಗಳು ಮತ್ತೆ ಮೇಲಕ್ಕೇರುವಂತೆ ಮಾಡಲು ಸರ್ಕಾರ ಸಹಾಯ ಹಸ್ತ ಚಾಚುತ್ತಿದೆ.

ಆದರೆ, ಏರ್ ಇಂಡಿಯಾ ಸಿಬ್ಬಂದಿ ವಿಮಾನ ಏರುವುದಿಲ್ಲ ಎಂದು ಮುಷ್ಕರ ಹೂಡಿದ್ದಾರೆ. ಹೀಗಾಗಿ ಏರ್ ಇಂಡಿಯಾ ಟಿಕೆಟ್ ಬುಕ್ ಮಾಡುವ ಮುನ್ನ ಪ್ರಯಾಣಿಕರು ಯೋಚಿಸುವುದು ಒಳಿತು.

ಏರ್ ಇಂಡಿಯಾ ಬ್ಯಾಂಕ್ ಖಾತೆ ಮುಟ್ಟು ಗೋಲು ಹಾಕಿಕೊಳ್ಳುವುದಿಲ್ಲ ಎಂದು ಕೇಂದ್ರ ತೆರಿಗೆ ಮತ್ತು ಸುಂಕ ಇಲಾಖೆ ಆಶ್ವಾಸನೆ ನೀಡಿತ್ತು. ಅದರಂತೆ, ನವೆಂಬರ್ ತಿಂಗಳ ತೆರಿಗೆ ಬಾಕಿ ಮೊತ್ತ ನೀಡಿದ್ದ ಏರ್ ಇಂಡಿಯಾ ಎಲ್ಲವೂ ಸುಸೂತ್ರವಾಗಿದೆ ಎಂದು ಕೊಂಡಿತ್ತು. ಸರ್ಕಾರ ಕೂಡಾ 30,000 ಕೋಟಿ ರು ಬಂಡವಾಳ ಹೂಡಿಕೆ ಬಗ್ಗೆ ಪ್ರಕಟಿಸಿತ್ತು.

ಆದರೆ, ಕಿಂಗ್ ಫಿಷರ್ ಸಂಸ್ಥೆಯ ರೀತಿಯಲ್ಲೇ ತನ್ನ ಸಿಬ್ಬಂದಿಗಳಿಗೆ ಸಂಬಳ ನೀಡುವಲ್ಲಿ ವಿಫಲವಾದ ಕಾರಣ ಮತ್ತೆ ಏರ್ ಇಂಡಿಯಾ ಸಂಕಷ್ಟಕ್ಕೆ ಸಿಲುಕಿದೆ.

ಮೊದಲು ಸಂಬಳ ಕೊಡಿ : ಎರಡು ತಿಂಗಳ ಸಂಬಳ ಹಾಗೂ ಐದಾರು ತಿಂಗಳ ಭತ್ಯೆ ಬಾಕಿ ಮೊದಲು ನೀಡಲಿ ನಂತರ ವಿಮಾನ ಹತ್ತುತ್ತೇವೆ ಎಂದು ಸೋಮವಾರ ಏರ್ ಇಂಡಿಯಾ ಸಿಬ್ಬಂದಿ ದಿಢೀರ್ ಎಂದು ಮುಷ್ಕರ ಹೂಡಿದ ಘಟನೆ ನಡೆದಿದೆ.

ದೇಶಿ ವಿಮಾನಯಾನವಾದರೆ ಪರವಾಗಿಲ್ಲ. ಆದರೆ, ವಿದೇಶಕ್ಕೆ ಹೋದಾಗ ಊಟ ಮಾಡಲು ನಮ್ಮ ಬಳಿ ಹಣ ಇರುವುದಿಲ್ಲ. ಸಂಬಳ ಇಲ್ಲದೆ ಕೆಲಸ ಅಸಾಧ್ಯ ಎಂದು ಏರ್ ಇಂಡಿಯಾ ಸಿಬ್ಬಂದಿ ತಮ್ಮ ಅಳಲು ತೋಡಿಕೊಂಡಿದ್ದಾರೆ.

English summary

Air India may face a Kingfisher-like crisis as many of its crew members refused to fly on Monday, Jan 10. Experts feared that if the similar kind of situation prevails, then flight operations of the national carrier will definitely be hit soon.