ಬೆಸ್ಕಾಂ ಭೂತಕ್ಕೆ ಸರಿಯಾಗಿ ಜಾಡಿಸಿದ ಎಚ್ ಡಿ ರೇವಣ್ಣ

ಹಾಸನ, ನ.4: ಬೆಸ್ಕಾಂ ಅವ್ಯವಹಾರಕ್ಕೂ ನನಗೂ ಯಾವುದೇ ಸಂಬಂಧವಿಲ್ಲ. ನನ್ನ ಆಡಳಿತಾವಧಿಯಲ್ಲಿ ಅವ್ಯವಹಾರ ನಡೆದರೆ ನಾನು ಭಾಗಿ ಆಗಿದ್ದೇನೆ ಎಂದು ಹೇಗೆ ನಿರ್ಣಯಿಸುತ್ತಾರೆ? ರಾಜಕೀಯ ದುರುದ್ದೇಶದಿಂದ ಈ ಆರೋಪ ಮಾಡುವುದು ಬಿಜೆಪಿ ಜಾಯಮಾನ ಎಂದು ಜೆಡಿಎಲ್‌ಪಿ ನಾಯಕ ಎಚ್‌.ಡಿ.ರೇವಣ್ಣ ಬಿಜೆಪಿ ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.

ರೇವಣ್ಣ ಅವರು ಇಂಧನ ಸಚಿವರಾಗಿದ್ದ ಕಾಲದಲ್ಲಿ ಬೆಸ್ಕಾಂಗಾಗಿ ಕಯೋಟ್ ವಿದ್ಯುತ್‌ ವಾಹಕಗಳ ಖರೀದಿಯಲ್ಲಿ 6 ಕೋಟಿ ರೂ. ಅವ್ಯವಹಾರ ನಡೆದಿದೆ ಎಂದು ಡಿವಿ ಸದಾನಂದ ಗೌಡರ ಸರ್ಕಾರ ಲೋಕಾಯುಕ್ತ ತನಿಖೆಗೆ ವಹಿಸಿದೆ.

ಇದಕ್ಕೆ ಉತ್ತರವಾಗಿ ಪ್ರತಿಕ್ರಿಯಿಸಿದ ರೇವಣ್ನ ಅವರು ಅವ್ಯವಹಾರ ನಡೆದಿದ್ದರೆ ಸಂಬಂಧಪಟ್ಟ ಅಧಿಕಾರಿಗಳು ಹೊಣೆಗಾರರಾಗುತ್ತಾರೆ. ನಾನು ಹೇಗೆ ಆರೋಪಿಯಾಗುತ್ತೇನೆ ಎಂದು ಪ್ರಶ್ನಿಸಿದ್ದಾರೆ.

ಸಿಬಿಐ ತನಿಖೆಗೂ ಸಿದ್ಧ: ನನ್ನ ಮೇಲೆ ಲೋಕಾಯುಕ್ತ ತನಿಖೆಗೆ ಸರ್ಕಾರ ಆದೇಶ ಹೊರಡಿಸಿರುವುದು ಮಾಧ್ಯಮಗಳ ಮೂಲಕ ತಿಳಿದು ಬಂದಿದೆ. ಸಿಬಿಐ ತನಿಖೆಗೆ ವಹಿಸಿದರೂ ನನಗೆ ಭಯವಿಲ್ಲ. ಆಧಾರರಹಿತ ಆರೋಪಗಳ ಬಗ್ಗೆ ಪ್ರಚಾರ ಕೊಡುವುದನ್ನು ಮಾಧ್ಯಮಗಳು ಬಿಟ್ಟರೆ ಒಳ್ಳೆಯದು ಎಂದು ರೇವಣ್ಣ ಹೇಳಿದ್ದಾರೆ.

ನಮ್ಮ ಕುಟುಂಬದವರ ಮೇಲೆ ಬೇಕೆಂತಲೇ ಆರೋಪಗಳು ಮಾಡುತ್ತಿದ್ದಾರೆ. ಯಾರು ಯಾರು ಏನು ಅವ್ಯವಹಾರ ನಡೆಸಿದ್ದಾರೆ ಎಂಬುದನ್ನು ದಾಖಲೆಯ ಸಮೇತ ಸದ್ಯದಲ್ಲೇ ಬಹಿರಂಗಪಡಿಸುತ್ತೇನೆ ಎಂದು ರೇವಣ್ಣ ಹೇಳಿದರು.

English summary

JDS leader HD Revanna reacted strongly to the allegation made by CM DV Sadananda Gowda's BJP government and Lokayukta probe on purchase of coyote conductors for Bescom during his tenure as Energy Minister. Revanna denied all allegations.