ತಿರಸ್ಕರಿಸಿದ ಪ್ರೇಮಿಯ ಮೇಲೆ ಹುಡುಗಿ ಆಸಿಡ್ ದಾಳಿ

ನವದೆಹಲಿ, ಸೆ. 05 : ಪ್ರೇಮವನ್ನು ತಿರಸ್ಕರಿಸಿದ ಹುಡುಗಿಯರ ಮುಖದ ಮೇಲೆ ಆಸಿಡ್ ದಾಳಿ ನಡೆಸಿದ ಪ್ರಕರಣಗಳು ದಿನದಲ್ಲಿ ಊರಿಗೊಂದು ಸಿಗುತ್ತವೆ. ಆದರೆ, ಫಾರ್ ಅ ಚೇಂಜ್, ಹುಡುಗನಿಂದ ತಿರಸ್ಕೃತಳಾದ ಹುಡುಗಿಯೇ ಆಸಿಡ್ ದಾಳಿ ನಡೆಸಿ ಪ್ರತೀಕಾರ ತೀರಿಸಿಕೊಂಡ ಘಟನೆ ರಾಷ್ಟ್ರದ ರಾಜಧಾನಿಯಲ್ಲಿ ನಡೆದಿದೆ.

ಆಸಿಡ್ ಎರಚಿ ಪೊಲೀಸರಿಂದ ಬಂಧಿತಳಾಗಿರುವ ಹುಡುಗಿ ಆರತಿ (24). ಆಕೆ ಕಳೆದ ಐದು ವರ್ಷಗಳಿಂದ ವಿನೀತ್ (27) ಎಂಬಾತನೊಂದಿಗೆ ಪ್ರೇಮದ ಮಡುವಿನಲ್ಲಿ ಬಿದ್ದಿದ್ದಳು. ಮದುವೆಯ ಪ್ರಸ್ತಾಪವನ್ನೂ ಆರತಿ ಪ್ರಿಯಕರನ ಮುಂದೆ ಇಟ್ಟಿದ್ದಳು. ಪ್ರಸ್ತಾವನೆಯನ್ನು ಆತ ಮುಂದೂಡತ್ತಲೇ ಬಂದಿದ್ದ.

ಸಹನೆ ಕಳೆದುಕೊಂಡ ಆರತಿ, ಒಂದು ದಿನ ನಿನ್ನ ಜೊತೆ ಮಾತನಾಡಬೇಕೆಂದು ವಿನೀತ್ ನನ್ನು ಕ್ರಾಸ್ ರಿವರ್ ಮಾಲ್ ಬಳಿ ಬರಲು ಹೇಳಿದ್ದಾಳೆ. ಆತ ಬರುತ್ತಲೇ, ಮಾತನಾಡುವ ನೆಪದಲ್ಲಿ ಬ್ಯಾಗಿನಿಂದ ಆಸಿಡ್ ತೆಗೆದು ಮುಖಕ್ಕೆ ಎರಚಿದ್ದಾಳೆ. ನಂತರ ಆರತಿ ತಾನಾಗಿಯೇ ಪೊಲೀಸರೆದಿರು ಶರಣಾಗಿದ್ದಾಳೆ.

ವಿನೀತ್ ನನ್ನು ಗುರು ತೇಗ್ ಬಹಾದ್ದೂರ್ (ಜಿಟಿಬಿ) ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಶೇ.40ರಷ್ಟು ಸುಟ್ಟ ಗಾಯಗಳಾಗಿವೆ. ಆತನ ಸ್ಥಿತಿ ಇನ್ನೂ ಚಿಂತಾಜನಕವಾಗಿಯೇ ಇದೆ ಎಂದು ವೈದ್ಯರು ತಿಳಿಸಿದ್ದಾರೆ. ಆತನ ಹೇಳಿಕೆಯನ್ನು ಪಡೆದಿರುವ ಪೊಲೀಸರು ಆರತಿ ವಿರುದ್ಧ ಎಫ್ಐಆರ್ ದಾಖಲಿಸಿದ್ದಾರೆ.

English summary

A girl has been arrested by police in New Delhi for throwing acid on her boyfriend who rejected her love and refused to marry her. Now-a-days we hear stories where boys throwing acid on girls. Here is different love story.