ಕೇಂದ್ರದಿಂದಲೇ ಟೆಲಿಫೋನ್ ಕದ್ದಾಲಿಕೆ : ಶ್ರೀರಾಮುಲು

ಬಳ್ಳಾರಿ, ಜು. 23 : ಬಿಎಸ್ ಯಡಿಯೂರಪ್ಪ ಅವರು ಮುಖ್ಯಮಂತ್ರಿ ಆದ ಮೇಲೆ ಗಣಿಗಾರಿಕೆಯ ಹೊಸ ಲೀಸ್‌ಗಳನ್ನು ನೀಡಿಲ್ಲ ಎಂದು ಸರ್ಟಿಫಿಕೇಟ್ ನೀಡಿರುವ ಶ್ರೀರಾಮುಲು, ತಮ್ಮ ಮತ್ತು ಕೆಲ ಸಚಿವರ ಹೆಸರು ಸೋರಿಕೆಯಾದ ಅಕ್ರಮ ಗಣಿಗಾರಿಕೆ ವರದಿಯಲ್ಲಿ ಪ್ರಸ್ತಾಪವಾಗಿದ್ದರೂ ಯಾರೂ ರಾಜೀನಾಮೆ ನೀಡುವ ಆಗತ್ಯವಿಲ್ಲ ಎಂದು ಹೇಳಿದ್ದಾರೆ.

ಅಕ್ರಮ ಗಣಿಗಾರಿಕೆ ಕುರಿತು ಲೋಕಾಯುಕ್ತ ನ್ಯಾಯಮೂರ್ತಿ ಸಂತೋಷ ಹೆಗಡೆ ಅವರು ಸರ್ಕಾರಕ್ಕೆ ಸಲ್ಲಿಸಲಿರುವ ವರದಿಯನ್ನು ಶೇ. 100ರಷ್ಟು ಒಪ್ಪಲೇಬೇಕು ಎಂದು ಗಣಿ ಹಗರಣದ ಆರೋಪಿ, ಆರೋಗ್ಯ ಸಚಿವ ಬಿ. ಶ್ರೀರಾಮುಲು ಅವರು ತಿಳಿಸಿದ್ದಾರೆ.

ನಗರದಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಶನಿವಾರ ಮಾತನಾಡಿದ ಅವರು, ಕಾನೂನಿಗಿಂತ ಯಾರೂ ದೊಡ್ಡವರಿಲ್ಲ. ಗಣಿ ಹಗರಣ ಕುರಿತು ಲೋಕಾಯುಕ್ತರು ಸಲ್ಲಿಸಲಿರುವ ವರದಿಯಲ್ಲಿ ಎಲ್ಲರ ಬಗ್ಗೆಯೂ ಪ್ರಸ್ತಾಪವಾಗಲಿದೆ, ಬಿಡಿ. ರಾಜಕಾರಣಿಗಳಿಗೆ ಅವಮಾನ - ಗೌರವ - ಸನ್ಮಾನಗಳು ಸಹಜ. ನಾನು ಓಡಿ ಹೋಗುವುದಿಲ್ಲ. ಎಲ್ಲವುದನ್ನೂ ಎದುರಿಸುತ್ತೇನೆ ಎಂದರು.

ಕದ್ದಾಲಿಕೆ ತನಿಖೆಯಾಗಲಿ : ಲೋಕಾಯುಕ್ತರ ಟೆಲಿಫೋನ್ ಕದ್ದಾಲಿಕೆ ಪ್ರಕರಣದಲ್ಲಿ ಕೇಂದ್ರ ಸರ್ಕಾರ ಪಾಲ್ಗೊಂಡಿದೆ. ರಾಜ್ಯ ಸರ್ಕಾರವನ್ನು ಇಕ್ಕಟ್ಟಿಗೆ ಸಿಲುಕಿಸುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರವೇ ಟೆಲಿಫೋನ್ ಕದ್ದಾಲಿಕೆ ನಡೆಸಿದೆ. ಈ ಕುರಿತು ಸಮಗ್ರ ತನಿಖೆ ನಡೆಯಬೇಕು ಎಂದು ಆಗ್ರಹಿಸಿದರು.

ಸಂತೋಷ ಹೆಗಡೆ ಅವರು ದಕ್ಷರು, ಪ್ರಾಮಾಣಿಕರು. ಇವರು ಸರ್ಕಾರಕ್ಕೆ ಸಲ್ಲಿಸಬೇಕಾಗಿರುವ ವರದಿಯನ್ನೇ ಟೆಲಿಫೋನ್‌ನಲ್ಲಿ ಕದ್ದಾಲಿಕೆ ಮಾಡಿರುವುದು ತನಿಖೆ ಆಗಬೇಕು. ಈ ಪ್ರಕರಣದಲ್ಲಿ ಪಾಲ್ಗೊಂಡಿರುವವರ ಹೆಸರುಗಳು ಬಯಲಾಗಬೇಕು ಎಂದು ಅವರು ಆಗ್ರಹಿಸಿದರು.

English summary

Health minister Sriramulu has alleged that, central govt only leaked the names in illegal mining report by telephone tapping. He also says, there is no need for anyone to resign and everyone should accept Hegde's report.