ಈಜಲು ಬಂದ ಹುಡುಗರ ಕೈಗೆ ಸಿಕ್ಕ ಗೌತಮ ಬುದ್ಧ

ಬೆಂಗಳೂರು, ಮೇ 9: ಆ ಹುಡುಗರು ಭಾನುವಾರದ ರಜೆಯ ಮೋಜನ್ನು ಬೇಗೂರು ಕೆರೆಯಲ್ಲಿ ಈಜುತ್ತ ಕಳೆಯುತ್ತಿದ್ದರು. ಅದರಲ್ಲಿ ಒಬ್ಬ ಹುಡುಗ ಈಜುತ್ತಿದ್ದಾಗ ಕೈಗೆ ಏನೋ ಎಡತಾಡಕಿದಂತಾಯಿತು. ಕೈಗೆತ್ತಿ ನೋಡಿದಾಗ ಕೈಯಲ್ಲಿ ಬುದ್ಧನ ವಿಗ್ರಹವಿತ್ತು. ಆಸೆಯೇ ದುಃಖಕ್ಕೆ ಮೂಲ ಎಂದರಿತಂತೆ ಆ ಹುಡುಗರು ಪೋಲಿಸರಿಗೆ ಮಾಹಿತಿ ನೀಡಿದ್ದಾರೆ.

ಭಾನುವಾರ ಬಾಗೂರು ಕೆರೆಯಲ್ಲಿ ಈಜಾಡುತ್ತಿದ್ದ ಕೆಲವು ಹುಡುಗರಿಗೆ ಬಾಗೂರು ಕೆರೆಯಲ್ಲಿ ಪಂಚಲೋಹದ ಪುತ್ತಳಿಯೊಂದು ದೊರಕಿದೆ ಎಂದು ಎಲೆಕ್ಟ್ರಾನಿಕ್ ಸಿಟಿ ಪೋಲಿಸರು ತಿಳಿಸಿದ್ದಾರೆ.

"ಇದರ ಕೆಲವು ಲಕ್ಷಣಗಳು ಬುದ್ಧನ ವಿಗ್ರಹದಂತಿದೆ. 45 ಕೆ.ಜಿ. ತೂಕ ಮತ್ತು 6 ಅಡಿ ಎತ್ತರದ ಈ ಪಂಚಲೋಹ ವಿಗ್ರಹವು ಹಲವು ಶತಮಾನಗಳಷ್ಟು ಹಳೆಯದಾಗಿರಬಹುದು" ಎಂದು ಹಿರಿಯ ಪೋಲಿಸ್ ಅಧಿಕಾರಿಯೊಬ್ಬರು ಅಂದಾಜಿಸಿದ್ದಾರೆ.

"ಮುಖದ ಹೋಲಿಕೆಗಳು ಸಾಂಪ್ರದಾಯಿಕ ಬುದ್ಧನ ವಿಗ್ರಹದಂತಿದೆ. ಆದರೆ ಉಳಿದ ಭಾಗಗಳು ಬುದ್ಧನ ಪುತ್ತಳಿಗಿಂತ ವಿಭಿನ್ನವಾಗಿದೆ. ಈ ಪುತ್ತಳಿಯನ್ನು ಎಲ್ಲಿಂದ ಕದ್ದಿರಬಹುದೆಂದು ತನಿಖೆ ಮಾಡಲಾಗುವುದು" ಎಂದು ಅವರು ಹೇಳಿದ್ದಾರೆ. ಪುರಾತತ್ವ ವಿಭಾಗದ ಅಧಿಕಾರಿಗಳಲ್ಲಿ ಈ ವಿಗ್ರಹದ ಅಧ್ಯಯನಮಾಡಿ ತಿಳಿಸುವಂತೆ ಪೋಲಿಸರು ವಿನಂತಿಸಿದ್ದಾರೆ.

English summary

A group of boys found 45-kg 6 ft panchaloha idol at Begur Lake. Some features of this resemble that of the Buddha.