ಮಂಗಳೂರು; ಕಬ್ಬಿಣ ಅದಿರು ಲಾರಿ ಸಂಚಾರಕ್ಕೆ ಬ್ರೇಕ್

ಮಂಗಳೂರು, ಜೂ.19: ರಾಷ್ಟ್ರೀಯ ಹೆದ್ದಾರಿ 17 ಹಾಗೂ 48ರಲ್ಲಿ ಕಬ್ಬಿಣ ಅದಿರು ಸಾಗಿಸುವ ಭಾರಿ ಗಾತ್ರದ ಲಾರಿಗಳ ಸಂಚಾರಕ್ಕೆ ಬ್ರೇಕ್ ಹಾಕಲಾಗಿದೆ.

ಜೂನ್ 20ರಿಂದ ನವೆಂಬರ್ 15ರವರೆಗೂ ಐದು ತಿಂಗಳ ಕಾಲ ಈ ಹೆದ್ದಾರಿಗಳಲ್ಲಿ ಲಾರಿಗಳ ಸಂಚಾರವನ್ನು ನಿಷೇಧಿಸಲಾಗಿದೆ. ಮಳೆಗಾಲವಾದ ಕಾರಣ ರಸ್ತೆ ಹಾಳಾಗುತ್ತದೆ ಎಂಬ ಕಾರಣಕ್ಕೆ ಭಾರಿ ಲಾರಿಗಳ ಸಂಚಾರವನ್ನು ನಿಷೇಧಿಸಿರುವುದಾಗಿ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಪೊನ್ನುರಾಜ್ ತಿಳಿಸಿದ್ದಾರೆ.

ಜಿಲ್ಲೆಯನ್ನು ಪ್ರವೇಶಿಸಲು ಕಬ್ಬಿಣ ಅದಿರು ಸಾಗಿಸುವ ಲಾರಿಗಳು ಈ ರಾಷ್ಟ್ರೀಯ ಹೆದ್ದಾರಿಗಳನ್ನು ಬಳಸುತ್ತಿವೆ. ಅದಿರು ತುಂಬಿಸಿಕೊಂಡು ಈ ಲಾರಿ ಚಾಲಕರು ಸರಿಯಾಗಿ ರಸ್ತೆ ನಿಯಮಗಳನ್ನು ಪಾಲಿಸುವುದಿಲ್ಲ. ಶಿರಾಡಿ ಘಾಟ್ ರಸ್ತೆಯವರೆಗೂ ಈ ಹೆದ್ದಾರಿ ವಿಸ್ತರಿಸಿದ್ದು ಉಳಿದ ವಾಹನಗಳ ಸಂಚಾರಕ್ಕೆ ಅಡಚಣೆ ಉಂಟಾಗುತ್ತಿದೆ ಎಂದು ಜಿಲ್ಲಾಧಿಕಾರಿಗಳು ವಿವರ ನೀಡಿದ್ದಾರೆ.

ಮಳೆಗಾಲದ ಕಾರಣ ಭೂಕುಸಿದಂತಹ ಅವಘಡಗಳು ಸಂಭವಿಸುತ್ತಿವೆ. ಇದರಿಂದ ರಸ್ತೆ ಅಪಘಾತಗಳು ಅಧಿಕವಾಗುತ್ತವೆ. ಓವರ್ ಲೋಡ್ ಮಾಡಿದ ಲಾರಿಗಳು ರಸ್ತೆಯಲ್ಲಿ ಸಂಚರಿಸುವುದು ಅಪಾಯಕಾರಿ ಎಂಬ ಉದ್ದೇಶದಿಂದಲೂ ಈ ಕ್ರಮವನ್ನು ಕೈಗೊಂಡಿದ್ದೇವೆ ಎಂದು ಜಿಲ್ಲಾಧಿಕಾರಿಗಳು ತಿಳಿಸಿದ್ದಾರೆ.