ಪಾಕ್ ಪ್ರಧಾನಿಗೆ ಪ್ರೀತಿಯಿಂದ 'ಮಾವಿನಹಣ್ಣು'

ನವದೆಹಲಿ, ಮೇ 27 : 'ಪ್ರೀತಿ ವಿಶ್ವಾಸಪೂರ್ವಕವಾಗಿ ಕಳುಹಿಸುತ್ತಿರುವ ಈ ಮಾವಿನಹಣ್ಣನ್ನು ಗಿಲಾನಿ ಇಷ್ಟ ಪಡಬಹುದು' ಎನ್ನುವ ಪತ್ರದ ಜೊತೆಗೆ ಪ್ರಧಾನಿ ಮನಮೋಹನ್ ಸಿಂಗ್ ಪಾಕಿಸ್ತಾನದ ಪ್ರಧಾನಿ ಯೂಸುಫ್ ರಾಜಾ ಗಿಲಾನಿಗೆ ಅಲ್ಫೋನ್ಸಾ ಮಾವಿನಹಣ್ಣನ್ನು ಉಡುಗೊರೆಯಾಗಿ ಕಳುಹಿಸಿ ಕೊಟ್ಟಿದ್ದಾರೆ.

ಸುಮಾರು 20 ಕೆ.ಜಿ ಮಾವಿನಹಣ್ಣುಗಳನ್ನು ಪಾಕಿಸ್ತಾನದಲ್ಲಿರುವ ಭಾರತೀಯ ರಾಯಭಾರ ಕಚೇರಿಗೆ ರವಾನಿಸಲಾಗಿದೆ. ಅಲ್ಲಿಂದ ಇವುಗಳನ್ನು ಪಾಕ್ ಪ್ರಧಾನಿ ಕಚೇರಿಗೆ ತಲುಪಿಸಲಾಗುವುದು ಎಂದು ಮೂಲಗಳಿಂದ ತಿಳಿದುಬಂದಿದೆ. ಭಾರತ ಮತ್ತು ಪಾಕಿಸ್ತಾನದ ನಡುವಿನ ಭಿನ್ನಾಭಿಪ್ರಾಯ ಶಮನಗೊಳಿಸುವ ನಿಟ್ಟಿನಲ್ಲಿ ಪ್ರಧಾನಿ ಈ ಉಡುಗೊರೆಯನ್ನುಕಳುಹಿಸಿದ್ದರೆನ್ನಲಾಗಿದೆ.

ಇತ್ತಿಚೆಗೆ ಥಿಂಪುವಿನಲ್ಲಿ ನಡೆದ ಶೃಂಗ ಸಭೆಯಲ್ಲಿ ಉಭಯ ನಾಯಕರು ಸ್ನೇಹಪರತೆ ಪ್ರದರ್ಶಿಸಿದ್ದರು. 1980ರಲ್ಲಿ ಅಂದಿನ ಪ್ರಧಾನಿ ಇಂದಿರಾಗಾಂಧಿ ಮತ್ತು ಪಾಕ್ ಅಧ್ಯಕ್ಷರಾಗಿದ್ದ ಜಿಯಾ-ಉಲ್-ಹಕ್ ಮಾವಿನಹಣ್ಣುಗಳನ್ನು ವಿನಿಮಯ ಮಾಡಿಕೊಂಡಿದ್ದರು. ಹಾಗೆಯೇ 2001ರಲ್ಲಿ ಪಾಕ್ ಸರ್ವಾಧಿಕಾರಿಯಾಗಿದ್ದ ಜನರಲ್ ಪರ್ವೇಜ್ ಮುಷರಫ್ ಭಾರತದ ಪ್ರಧಾನಿಯಾಗಿದ್ದ ಅಟಲ್ ಬಿಹಾರಿ ವಾಜಪೇಯಿಗೆ ಮಾವಿನಹಣ್ಣುಗಳನ್ನು ಉಡುಗೊರೆಯಾಗಿ ಕಳುಹಿಸಿ ಕೊಟ್ಟಿದ್ದರು.