ಸರಬ್ ಜಿತ್ ಮನೆಯಲ್ಲಿ ಸಿಬಿಐ ಶೋಧ; ಪಿಸ್ತೂಲ್ ಪತ್ತೆ

ನವದೆಹಲಿ, ಆ.1: ರಾಷ್ಟ್ರೀಯ ಪರಿಶಿಷ್ಟ ಆಯೋಗದ ಮುಖ್ಯಸ್ಥ ಬೂಟಾಸಿಂಗ್ ಅವರ ಮಗ ಸರಬ್ ಜೋತ್ ಸಿಂಗ್(ಸ್ವೀಟಿ ಸಿಂಗ್) ಮನೆಗೆ ಸಿಬಿಐ ಅಧಿಕಾರಿಗಳು ಇಂದು ದಾಳಿ ನಡೆಸಿದರು. ದಾಳಿಯಲ್ಲಿ ಲೈಸೆನ್ಸ್ ಇಲ್ಲದ ಮೂರು ರಿವಾಲ್ವರ್ ಗಳು ಹಾಗೂ 38 ಕಾಡತೂಸುಗಳು ಪತ್ತ್ತೆಯಾಗಿದ್ದು ಸಿಬಿಐ ಅವನ್ನುವರು ವಶಪಡಿಸಿಕೊಂಡಿದೆ.

ರಿವಾಲ್ವರ್ ಗಳನ್ನು ವಶಪಡಿಸಿಕೊಂಡ ಸಿಬಿಐ ಶಸ್ತ್ರಾಸ್ತ್ರ ಕಾಯಿದೆಯಡಿ ದಕ್ಷಿಣ ದೆಹಲಿಯ ನಿಜಾಮುದ್ದೀನ್ ಪೊಲೀಸ್ ಠಾಣೆಯಲ್ಲಿ ಸ್ವೀಟಿ ಸಿಂಗ್ ವಿರುದ್ಧ ಕೇಸು ದಾಖಲಿಸಿದೆ. ವಿಚಾರಣೆ ನಿಮಿತ್ತ ದಕ್ಷಿಣ ದೆಹಲಿಯಲ್ಲಿನ ಸರಬ್ ಜೋತ್ ಸಿಂಗ್ ಮನೆಗೆ ಇಂದು ಬೆಳಗ್ಗೆ ಸಿಬಿಐ ದಾಳಿ ಮಾಡಿತು. ಮನೆಯಲ್ಲಿ ತಪಾಸಣೆ ನಡೆಸಿದಾಗ ರಿವಾಲ್ವರ್ ಗಳು ಪತ್ತೆಯಾಗಿವೆ.

ಶುಕ್ರವಾರ ಬಂಧಿಸಲಾದ ಸ್ವೀಟ್ ಸಿಂಗ್ ಅವರನ್ನು ಆಗಸ್ಟ್ 5ರವರೆಗೂ ಪೊಲೀಸ್ ಬಂಧನಕ್ಕೆ ಮುಂಬೈ ನ್ಯಾಯಾಲಯ ಆದೇಶಿಸಿದೆ. ಪರಿಶಿಷ್ಟ ಜಾತಿ ಜನಾಂಗದ ರಾಷ್ಟ್ರೀಯ ಆಯೋಗದಲ್ಲಿ ದಾಖಲಾಗಿದ್ದ ಪ್ರಕರಣವನ್ನು ಮುಚ್ಚಿಹಾಕಲು ನಾಸಿಕ್ ಮೂಲದ ರಾಮರಾಜ್ ಎಂಬ ಗುತ್ತಿಗೆದಾರರಿಂದ ಒಂದು ಕೋಟಿ ರುಪಾಯಿ ಲಂಚ ಪಡೆದಿದ್ದ ಆರೋಪದಡಿ ಸ್ವೀಟಿ ಸಿಂಗ್ ಅವರನ್ನು ಶುಕ್ರವಾರ ಸಿಬಿಐ ಬಂಧಿಸಿತ್ತು.

(ಏಜೆನ್ಸೀಸ್)