ಗ್ರಾಹಕರಿಗೆ ದೇಹಸುಖ ಕೊಟ್ರೆ ಕೆಲ್ಸ !: ಬಿದ್ದಪ್ಪ ಸಂಸ್ಥೆ

ಬೆಂಗಳೂರು ಜೂ 1: ನಮ್ಮ ಸಂಸ್ಥೆಯ ಗ್ರಾಹಕರೊಬ್ಬರಿಗೆ ದೈಹಿಕ ಸುಖ ನೀಡವುದಕ್ಕೆ ಒಪ್ಪುವುದಾದರೆ ಈ ಸಂಸ್ಥೆಯಲ್ಲಿ ಮಾಡೆಲಿಂಗ್ ಉದ್ಯೋಗ ಕೊಡುತ್ತೇವೆ ಈ ಷರತ್ತಿಗೆ ಒಪ್ಪಿಗೆ ಇಲ್ಲದಿದ್ದರೆ ಕೆಲಸ ಇಲ್ಲ ಎನ್ನುವ ಎಸ್ಎಂಎಸ್ ಸಂದೇಶವನ್ನು ಬೆಂಗಳೂರಿನ ಹೆಸರಾಂತ ಮಾಡೆಲಿಂಗ್ ಸಂಸ್ಥೆ 'ಪ್ರಸಾದ್ ಬಿದ್ದಪ್ಪ ಅಸೋಸಿಯೇಟ್ಸ್ ' ಮಾಡೆಲಿಂಗ್ ಉದ್ಯೋಗಾಂಕ್ಷಿಯೊಬ್ಬಳಿಗೆ ಕಳುಹಿಸಿದೆ ಎಂದು 'ಮಿಡ್ ಡೇ' ತನ್ನ ಅಂತರ್ಜಾಲದಲ್ಲಿ ವರದಿಮಾಡಿದೆ.

24ವರ್ಷದ ರಿಯಾ (ಹೆಸರು ಬದಲಾಯಿಸಲಾಗಿದೆ) ಎನ್ನುವವರು ಮಹದೇವಪುರ ಪೋಲಿಸ್ ಠಾಣೆಯಲ್ಲಿ ಆ ಸಂಸ್ಥೆಯ ವಿರುದ್ದ ಕೇಸು ದಾಖಲಿಸಿದ್ದಾರೆ. ಉದ್ಯೋಗ ಅರಸಿಕೊಂಡು ಒಂದು ವರ್ಷದ ಹಿಂದೆ ಬೆಂಗಳೂರಿಗೆ ಆಗಮಿಸಿದ ರಿಯಾ, ಕೆಲಸದ ಬಹಳ ಹುಡುಕಾಟದ ನಂತರ ಬಿದ್ದಪ್ಪ ಸಂಸ್ಥೆಯಲ್ಲಿ ಮಾಡೆಲಿಂಗ್ ಕೆಲಸಕ್ಕೆ ಅರ್ಜಿ ಹಾಕಿದರು. ಏಪ್ರಿಲ್ 30ನೇ ತಾರೀಕಿಗೆ ಸಂಸ್ಥೆಯಿಂದ ಪ್ರತ್ಯುತ್ತರ ಬಂದು ಮೇ 6ನೇ ತಾರೀಕಿಗೆ ಕಚೇರಿಗೆ ಬರುವಂತೆ ಸೂಚಿಸಿತು. ಆ ದಿನಾಂಕದಂದು ಕಚೇರಿಗೆ ಹೋದ ರಿಯಾಗೆ ಮೇ 10ನೇ ತಾರೀಕು ಸಂದರ್ಶನಕ್ಕೆ ಬರುವಂತೆ ಸೂಚಿಸಿತು ಆದರೆ ಈ ಸಂದರ್ಶನದಲ್ಲಿ ರಿಯಾ ಆಯ್ಕೆಯಾಗಲಿಲ್ಲ.

ಈಕೆ ನೀಡಿದ ದೂರಿನ ಪ್ರಕಾರ ಸಂದರ್ಶನ ನಡೆದ ಎರಡು ವಾರದ ನಂತರ ಬಿದ್ದಪ್ಪ ಸಂಸ್ಥೆಯ ಅಮಿತ್ ಎನ್ನುವ ಉದ್ಯೋಗಿ ಈಕೆಗೆ ಎಸ್ಎಂಎಸ್ ಸಂದೇಶವೊಂದನ್ನು ರವಾನಿಸಿದ. ಅದರಲ್ಲಿ ' ಸಂಸ್ಥೆಯ ಗ್ರಾಹಕರೊಬ್ಬರನ್ನು ನಿಭಾಯಿಸಬೇಕು, ಅವರಿಗೆ ದೈಹಿಕ ಸುಖ ನೀಡಬೇಕು, ಇದಕ್ಕೆ ಒಪ್ಪುವುದಾದರೆ ನಮ್ಮ ಸಂಸ್ಥೆಯಲ್ಲಿ ಉದ್ಯೋಗ ಸಿಗುತ್ತದೆ ಇಲ್ಲವಾದಲ್ಲಿ ಇಲ್ಲಿ ಸಾಧ್ಯವಿಲ್ಲ' ಎಂದು ಬರೆದಿತ್ತು ಎಂದು ರಿಯಾ ದೂರಿನಲ್ಲಿ ಹೇಳಿದ್ದಾರೆ.

ಘಟನೆಯ ಬಗ್ಗೆ ಮಿಡ್ ಡೇ ಪತ್ರಿಕೆ ಪ್ರಸಾದ್ ಬಿದ್ದಪ್ಪ ಅವರನ್ನು ಸಂದರ್ಶಿಸಿದಾಗ ಈ ಘಟನೆ ಬಗ್ಗೆ ನನ್ನ ಬಳಿ ಹೆಚ್ಚಿನ ಮಾಹಿತಿ ಇಲ್ಲ. ನಮ್ಮ ಸಂಸ್ಥೆಯಿಂದ ಏನಾದರೂ ತೊಂದರೆಯಾಗಿದ್ದರೆ ಕ್ಷಮೆಯಾಚಿಸುತ್ತೇನೆ, ಅಮಿತ್ ನನ್ನು ಈ ಕೂಡಲೇ ಕೆಲಸದಿಂದ ವಜಾಗೊಳಿಸಿದ್ದೇನೆ ಎಂದು ಉತ್ತರ ನೀಡಿದ್ದಾರೆ.

(ದಟ್ಸ್ ಕನ್ನಡವಾರ್ತೆ)