ಫೈನಲ್ ಸೋತಿಲ್ಲ, ಗಿಫ್ಟ್ ಮಾಡಿದ್ದೇವೆ : ಮಲ್ಯ

ಜೋಹಾನ್ಸ್ ಬರ್ಗ್, ಮೇ 25 : ಸೆಮಿಫೈನಲ್ ನಲ್ಲಿ ಚೆನ್ನೈ ತಂಡವನ್ನು ಸದೆಬಡಿದ ನಂತರ ರಾಯಲ್ ಚಾಲೇಂಜರ್ಸ್ ಐಪಿಎಲ್ 2 ಟ್ರೋಫಿ ಗೆದ್ದೇ ಬಿಡುವುದೆಂಬ ಕನಸಿನ ಹೊಳೆಯಲ್ಲಿ ತೇಲಾಡುತ್ತಿದ್ದ ರಾಯಲ್ ಮಾಲಿಕ ಡಾ. ವಿಜಯ್ ಮಲ್ಯ ಅವರಿಗೆ ಫೈನಲ್ ನಲ್ಲಿ ಆದ ಸೋಲನ್ನು ಅರಗಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ.

ಡೆಕ್ಕನ್ ಚಾರ್ಜರ್ಸ್ ತಂಡವನ್ನು 143 ರನ್ ಗಳಿಗೆ ಕಟ್ಟಿಹಾಕಿದ ನಂತರ ಟ್ರೋಫಿ ತಮ್ಮದಾಗಲಿದೆ ಎಂಬ ಆತ್ಮವಿಶ್ವಾಸದಿಂದ ಬೀಗುತ್ತಿದ್ದ ಮಲ್ಯರಿಗೆ ಸೋಲು ಭಾರೀ ಭ್ರಮನಿರಸನ ತಂದಿದೆ. ಕೇವಲ ಆರೇ ರನ್ನುಗಳಿಂದ ಡೆಕ್ಕನ್ ಚಾರ್ಜರ್ಸ್ ತಂಡಕ್ಕೆ ಸೋತು ರಾಯಲ್ ಚಾಲೇಂಜರ್ಸ್ ಐಪಿಎಲ್ ಟ್ರೋಫಿಯನ್ನು ಅರ್ಪಿಸಿದರು.

"ನಾವು ಕೇವಲ ಆರು ರನ್ನುಗಳಿಂದ ಫೈನಲ್ ಟ್ವೆಂಟಿ20 ಪಂದ್ಯವನ್ನು ಸೋತಿಲ್ಲ. ಆರು ರನ್ನುಗಳಿಂದ ಪಂದ್ಯವನ್ನು ಅವರಿಗೇ ಬಿಟ್ಟುಕೊಟ್ಟೆವು" ಎಂದು ವಿಷಾದದಿಂದ ನುಡಿದಿದ್ದಾರೆ.

"ಏನೇ ಆಗಲಿ. ನಾವು ಐಪಿಎಲ್ ಫೈನಲ್ ತಲುಪಿದ್ದಕ್ಕೆ ಹೆಮ್ಮೆಯಿದೆ. ಹದಿನೈದನೇ ಓವರಿನತನಕ ನಾವು ಗೆಲ್ಲುವ ಸ್ಥಿತಿಯಲ್ಲಿದ್ದೆವು. ಆದರೆ, ಕೊನೆಯ ಐದು ಓವರುಗಳಲ್ಲಿ ಪಂದ್ಯವನ್ನು ಕೈಬಿಟ್ಟೆವು" ಎಂದು ಮಲ್ಯ ಹೇಳಿದ್ದಾರೆ.

(ಏಜೆನ್ಸೀಸ್)