28ಎಂಪಿಗಳನ್ನು ಆಯ್ಕೆಗೆ 80 ಕೋಟಿ ಖರ್ಚು !!

ಬೆಂಗಳೂರು, ಮೇ. 19 : ರಾಜ್ಯದ 28 ಸಂಸದರನ್ನು ಆಯ್ಕೆ ಮಾಡಲು ರಾಜ್ಯ ಚುನಾವಣಾ ಆಯೋಗ 80 ಕೋಟಿ ರುಪಾಯಿ ಖರ್ಚು ಮಾಡಿದೆ. ಕಳೆದ ಲೋಕಸಭಾ ಚುನಾವಣೆಗೆ ಹೋಲಿಸಿದರೆ, ಈ ಬಾರಿ ತಗುಲಿರುವ ಖರ್ಚು ಸುಮಾರು ಎರಡು ಪಟ್ಟು ಜಾಸ್ತಿಯೆಂದು ಚುನಾವಣಾ ಅಧಿಕಾರಿ ಬಿ ವಿ ಕುಲಕರ್ಣಿ ತಿಳಿಸಿದ್ದಾರೆ.

ಚುನಾವಣಾ ಸಿಬ್ಬಂದಿಗಳಿಗೆ ನೀಡಬೇಕಾದ ದೈನಂದಿನ ಭತ್ಯೆ ಮತ್ತು ಇತರ ಖರ್ಚುಗಳ ಹೆಚ್ಚಳದಿಂದಾಗಿ ಆಯೋಗ ಇಷ್ಟು ಹಣ ವ್ಯಯಿಸಬೇಕಾಯಿತು ಎಂದು ಕುಲಕರ್ಣಿ ತಿಳಿಸಿದ್ದಾರೆ. ಪ್ರತಿ ಕ್ಷೇತ್ರದ ಚುನಾವಣಾ ಚಟುವಟಿಕೆಗಳಿಗೆ ಸುಮಾರು ಮೂರು ಕೋಟಿ ರುಪಾಯಿ ಆಯೋಗ ಖರ್ಚು ಮಾಡಿದೆ. ಇಲೆಕ್ಟ್ರಾನಿಕ್ ವೋಟಿಂಗ್ ಮಶೀನ್ (ಇವಿಎಂ) ಸೌಲಭ್ಯದಿಂದಾಗಿ ಆಯೋಗಕ್ಕೆ ಸ್ವಲ್ಪ ಉಳಿತಾಯವಾಗಿದೆ. ಇಲ್ಲದಿದ್ದರೆ ಪ್ರತಿಬಾರಿ ಸುಮಾರು 8500 ಸಾವಿರ ಟನ್ ನಷ್ಟು ಬ್ಯಾಲೆಟ್ ಪೇಪರ್ ಗಾಗಿ ಖರ್ಚು ಮಾಡಬೇಕಾಗಿತ್ತು. ಕಳೆದ ರಾಜ್ಯದ ವಿಧಾನಸಭಾ ಚುನಾವಣೆಗೆ ಆಯೋಗ 65 ಕೋಟಿ ರುಪಾಯಿ ಖರ್ಚು ಮಾಡಿತ್ತು ಎಂದು ಕುಲಕರ್ಣಿ ಹೇಳಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)