ಬಿಗ್ 'ಬಿ' ಗೆ ಸುಪ್ರೀಂಕೋರ್ಟ್ ನೋಟಿಸ್

ನವದೆಹಲಿ, ಮೇ. 4 : ಕೇಂದ್ರ ಆದಾಯ ತೆರಿಗೆ ಇಲಾಖೆ ಹಿಂದಿ ಚಿತ್ರರಂಗದ ಅನಭಿಷಕ್ತ ದೊರೆ ಅಮಿತಾಬ್ ಬಚ್ಚನ್ ಅವರ ವಿರುದ್ದ ತೆರಿಗೆ ಸರಿಯಾಗಿ ಪಾವತಿಸದ ಬಗ್ಗೆ ನೀಡಿರುವ ಅರ್ಜಿಯ ವಿಚಾರಣೆ ಕೈಗೆತ್ತಿಕೊಂಡ ನ್ಯಾಯಮೂರ್ತಿ ಎಸ್ ಎಸ್ ಕಪಾಡಿಯಾ ನ್ಯಾಯಪೀಠ ಅಕ್ಟೋಬರ್ 28 ರಂದು ಅಂತಿಮ ವಿಚಾರಣೆಗೆ ಹಾಜರಾಗುವಂತೆ ಅಮಿತಾಬ್ ಗೆ ನೋಟಿಸ್ ಜಾರಿ ಮಾಡಿದೆ.

ಕಿರುತೆರೆಯಲ್ಲಿ ಭಾರಿ ಜನಪ್ರಿಯಗೊಂಡಿದ್ದ 'ಕೌನ ಬನೇಗಾ ಕರೋಡಪತಿ' ಕಾರ್ಯಕ್ರಮದಲ್ಲಿ ಅಮಿತಾಬ್ ಮುಖ್ಯ ನಿರೂಪಕನಾಗಿದ್ದರು. ತಾನೊಬ್ಬ ಕಲಾವಿದನಾಗಿದ್ದು, ಈ ಕಾರ್ಯಕ್ರಮದ ಮೂಲಕ ತಾನು ಗಳಿಸಿದ ಒಟ್ಟು ಆದಾಯವಾದ 50.92 ಕೋಟಿ ರೂಪಾಯಿಗಳಲ್ಲಿ ಶೇಕಡಾ 30 ರಷ್ಟು ವಿನಾಯಿತಿ ನೀಡಬೇಕೆಂದು ಮುಂಬೈ ಹೈಕೋರ್ಟ್ ನಲ್ಲಿ ಅಮಿತಾಬ್ ದಾವೆ ಸಲ್ಲಿಸಿದ್ದರು. ಇವರ ಅರ್ಜಿಯನ್ನು ಪುರಸ್ಕರಿಸಿದ್ದ ಹೈಕೋರ್ಟ್ ಆದಾಯ ತೆರಿಗೆ ನಿಯಮ 80 ಆರ್ ಆರ್ ಅಡಿಯಲ್ಲಿ ವಿನಾಯಿತಿ ನೀಡುವಂತೆ ಇಲಾಖೆಗೆ ಸೂಚಿಸಿತ್ತು.

ತೀರ್ಪಿನ ಬಗ್ಗೆ ಸುಪ್ರೀಂಕೋರ್ಟ್ ನಲ್ಲಿ ಮೇಲ್ಮನವಿ ಸಲ್ಲಿಸಿದ್ದ ಇಲಾಖೆ, ದೇಶದ ಹೊರಗಡೆ ಗಳಿಸಿದ ಆದಾಯ ಅಥವಾ ವಿದೇಶಿ ಕಂಪನಿಯಿಂದ ಅಮಿತಾಬ್ ಈ ಮೊತ್ತ ಪಡೆದಿದ್ದರೆ ಮಾತ್ರ ವಿನಾಯಿತಿ ಅನ್ವಯವಾಗುತ್ತದೆ, ಆದರೆ ಅವರು ಸ್ಟಾರ್ ಇಂಡಿಯಾ ಲಿಮಿಟೆಡ್ ನಿಂದ ಹಣ ಪಡೆದಿರುವುದರಿಂದ ಈ ವಿನಾಯಿತಿ ಕೊಡಬಾರದೆಂದು ಮನವಿ ಸಲ್ಲಿಸಿತ್ತು.

(ದಟ್ಸ್ ಕನ್ನಡ ವಾರ್ತೆ)