ಉಗ್ರ ಕಸಬ್ ಗೆ 20 ವರ್ಷ : ವೈದ್ಯಕೀಯ ವರದಿ

ಮುಂಬೈ, ಏ. 28 : ಮುಂಬೈ ಭಯೋತ್ಪಾದನೆಯಲ್ಲಿ ಸಿಕ್ಕಿಬಿದ್ದಿರುವ ಏಕೈಕ ಉಗ್ರ ಅಜ್ಮಲ್ ಅಮೀರ್ ಕಸಬ್ 20 ವರ್ಷದ ಯುವಕ ಎಂದು ಜೆಜೆ ಆಸ್ಪತ್ರೆಯ ನುರಿತ ವೈದ್ಯರ ತಂಡ ಮುಂಬೈ ವಿಶೇಷ ನ್ಯಾಯಾಲಯಕ್ಕೆ ಸಮಗ್ರ ವರದಿ ನೀಡಿದೆ. ಈ ಹಿನ್ನೆಲೆಯಲ್ಲಿ ಕಸಬ್ 17 ವರ್ಷ ವಯಸ್ಸಾಗಿದ್ದು, ಆತನನ್ನು ಬಾಲಾಪರಾಧಿ ನ್ಯಾಯಾಲಯದಲ್ಲಿ ವಿಚಾರಣೆ ನಡೆಸಬೇಕು ಎಂದು ಕಸಬ್ ಪರ ವಕೀಲರ ವಾದಕ್ಕೆ ಆರಂಭದಲ್ಲೇ ಹಿನ್ನೆಡೆಯುಂಟಾದಂತಾಗಿದೆ.

ಅರ್ಥರ್ ರಸ್ತೆಯ ಜೈಲಿನಲ್ಲಿ ಇಂದು ಮುಂಬೈ ವಿಶೇಷ ನ್ಯಾಯಾಲಯದ ನ್ಯಾಯಾಧೀಶ ಎಂ ಎಲ್ ತೆಹಿಲಿಯಾನಿ ಅವರು ವೈದ್ಯರು ನೀಡಿರುವ ವರದಿಯನ್ನು ಸ್ಪಷ್ಟಪಡಿಸಿದರು. ಕಸಬ್ ಪರ ವಕೀಲ ಅಬ್ಬಾಸ್ ಕಜ್ಮಿ ಅವರು ನಮ್ಮ ಕಕ್ಷಿದಾರ 17 ವರ್ಷದವನಾಗಿದ್ದು, ಆತನನ್ನು ಬಾಲಾಪರಾಧಿ ನ್ಯಾಯಾಲಯದಡಿಯಲ್ಲಿ ವಿಚಾರಣೆ ನಡೆಸಬೇಕು ಎಂದು ನ್ಯಾಯಾಲಯಕ್ಕೆ ಮನವಿ ಮಾಡಿಕೊಂಡಿದ್ದರು. ಈ ಹಿನ್ನೆಲೆಯಲ್ಲಿ ನ್ಯಾಯಾಲಯ ಕಸಬ್ ನ ದಂತ, ರಕ್ತ, ಮೊಳೆಗಳನ್ನು ಪರೀಕ್ಷಿಸಿ ವರದಿ ನೀಡುವಂತೆ ವೈದ್ಯರಿಗೆ ಆದೇಶಿಸಿದ್ದರು. ನಗರದ ಜೆಜೆ ಆಸ್ಪತ್ರೆಯ ನಾಲ್ಕು ನುರಿತ ವೈದ್ಯರು ಕಸಬ್ ನ ಪರೀಕ್ಷೆ ನಡೆಸಿದ್ದಾರೆ.

ಕಜ್ಮಿ ವಾದವನ್ನು ಸ್ಪಷ್ಯವಾಗಿ ತಳ್ಳಿಹಾಕಿರುವ ನಿಕ್ಕಮ್, ವಿಚಾರಣೆ ವೇಳೆಯಲ್ಲಿ ಆತನ ಹೇಳಿದ ಪ್ರಕಾರ ಡಿಸೆಂಬರ್ 30 1987 ಆತನ ಜನ್ಮದಿನವಾಗಿದೆ. ಅಲ್ಲದೇ ಪಾಕಿಸ್ತಾನದ ಸೇನಾಡಳಿತವೂ ಮುಂಬೈ ದಾಳಿಯಲ್ಲಿ ಸ್ಪಷ್ಟವಾದ ಕೈವಾಡವಿದೆ. ಎಕೆ 47 ಉಪಯೋಗಿಸಲು ಕಲಿಸಿರುವುದು ಪಾಕ್ ಸೇನೆ ಎಂದು ನಿಕ್ಕಮ್ ಹೇಳಿದರು.

(ದಟ್ಸ್ ಕನ್ನಡ ವಾರ್ತೆ)