ಕಿವೀಸ್ ವಿರುದ್ಧ ಭರ್ಜರಿ ಜಯ, ಭಾರತಕ್ಕೆ ಸರಣಿ

ಹ್ಯಾಮಿಲ್ಟನ್, ಮಾ. 11 : ಸೆಹ್ವಾಗ್ ಬ್ಯಾಟ್ ಮಾಡುತ್ತಿದ್ದರೆ ನಮ್ಮ ಬೌಲರ್ ಗಳಿಗೆ ಯಾವ ರೀತಿ ಬೌಲ್ ಮಾಡಬೇಕೆಂದೇ ತೋಚುವುದಿಲ್ಲ ಎಂದು ಎರಡು ದಿನಗಳ ಹಿಂದೆಯಷ್ಟೇ ನ್ಯೂಜಿಲೆಂಡ್ ನಾಯಕ ವೆಟ್ಟೋರಿ ಹೇಳಿದ್ದರು. ಅದನ್ನು ಮತ್ತೊಮ್ಮೆ ಸಾಬೀತು ಮಾಡಿದ ಸೆಹ್ವಾಗ್, ನಾಲ್ಕನೇ ಏಕದಿನ ಪಂದ್ಯದಲ್ಲಿ ಕಿವೀಸ್ ದಾಳಿಯನ್ನು ಛಿದ್ರಗೊಳಿಸಿದರು.

ಇಂದು ನಡೆದ ಸರಣಿಯ ನಾಲ್ಕನೇ ಏಕದಿನ ಪಂದ್ಯದಲ್ಲಿ ಭಾರತ ತಂಡ ನ್ಯೂಜಿಲೆಂಡ್ ತಂಡವನ್ನು 84 ರನ್ ಗಳಿಂದ ಸೋಲಿಸಿ (ಡಕ್ವರ್ತ ಲೂಯಿಸ್ ನಿಯಮ) ಅವರ ನೆಲದಲ್ಲಿಯೇ ಚೊಚ್ಚಲ ಸರಣಿ ಜಯ ಸಂಪಾದಿಸಿತು.

ಟಾಸ್ ಗೆದ್ದು ಮೊದಲು ಬ್ಯಾಟ್ ಆಯ್ದುಕೊಂಡ ನ್ಯೂಜಿಲೆಂಡ್ 47 ಒವರ್ ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 270 ರನ್ ಮಾಡಿತ್ತು. ತಂಡದ ಪರವಾಗಿ ರೈಡರ್ 46, ಮೆಕಲಮ್ 77, ಮೆಕ್ ಗ್ಲಾಶನ್ 56 ಮತ್ತು ಎಲಿಯಟ್ 35 ರನ್ ಹೊಡೆದರು. ಭಾರತದ ಪರವಾಗಿ ಇಶಾಂತ್ ಶರ್ಮ 2, ಜಹೀರ್, ಯೂಸುಫ್ ಮತ್ತು ಯುವರಾಜ್ ತಲಾ ಒಂದೊಂದು ವಿಕೆಟ್ ಪಡೆದರು.

ಇದಕ್ಕೆ ಉತ್ತರವಾಗಿ ಸೆಹ್ವಾಗ್ ಮತ್ತು ಗಂಭೀರ್ ಅವರ ಮುರಿಯದ ಮೊದಲ ವಿಕೆಟ್ ಜೊತೆಯಾಟದಲ್ಲಿ ಕೇವಲ 23.3 ಓವರ್ ಗಳಲ್ಲಿ 201 ರನ್ ಗಳಿಸಿತ್ತು. ಸೆಹ್ವಾಗ್ 125 ಮತ್ತು ಗಂಭೀರ್ 63 ರನ್ ನಲ್ಲಿ ಬ್ಯಾಟ್ ಮಾಡುತ್ತಿದ್ದಾಗ ಮಳೆಯ ಅಡಚಣೆಯಿಂದಾಗಿ ಪಂದ್ಯವನ್ನು ರದ್ದು ಗೊಳಿಸಿ ಡಕ್ವರ್ತ ಲೂಯಿಸ್ ನಿಯಮದ ಅನ್ವಯ ಭಾರತ ಜಯಗಳಿಸಿತು. ಸೆಹ್ವಾಗ್ 74 ಎಸೆತಗಳಲ್ಲಿ 125 ರನ್ ( 6 ಸಿಕ್ಸರ್, 14 ಬೌಂಡರಿ) ಮತ್ತು ಗಂಭೀರ್ 67 ಎಸೆತಗಳಲ್ಲಿ 63 ರನ್ ಗಳಿಸಿದರು.

ಸೆಹ್ವಾಗ್ ಅವರ ಇಂದಿನ ಶತಕ ಭಾರತದ ಕ್ರಿಕೆಟ್ ಆಟಗಾರನೊಬ್ಬ ಅತಿ ಕಡಿಮೆ (60) ಎಸೆತದಲ್ಲಿ ಗಳಿಸಿದ ಶತಕ ಎನ್ನುವ ಹೆಗ್ಗಳಿಕೆಗೂ ಪಾತ್ರವಾಯಿತು. ಈ ಹಿಂದೆ ಅಜರುದ್ದೀನ್ 63 ಎಸೆತಗಳಲ್ಲಿ ಶತಕ ಸಿಡಿಸಿದ್ದು ಈ ವರೆಗಿನ ದಾಖಲೆಯಾಗಿತ್ತು.

ಪಂದ್ಯಶ್ರೇಷ್ಠ - ವೀರೇಂದ್ರ ಸೆಹ್ವಾಗ್
ಸರಣಿಯ ಕೊನೆಯ ಏಕದಿನ ಪಂದ್ಯ - ಶನಿವಾರ ಮಾರ್ಚ್ 14

(ದಟ್ಸ್ ಕನ್ನಡ ಕ್ರಿಕೆಟ್ ವಾರ್ತೆ)
ಕ್ರೈಸ್ಟ್ ಚರ್ಚ್, ಭಾರತಕ್ಕೆ ಗೆಲುವು, 2-0 ರಿಂದ ಮೇಲುಗೈ