ನಿವೇಶನ, ಮನೆ ಕಂದಾಯ ಕೂಡಲೇ ಪಾವತಿಸಿ:ಮುಡಾ

ಮೈಸೂರು, ಫೆ. 18: ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರದಿಂದ ಮಂಜೂರು ಮಾಡಲಾಗಿರುವ ನಿವೇಶನಗಳಲ್ಲಿ ಮನೆಗಳನ್ನು ನಿರ್ಮಿಸದೆ ಹಾಗೇ ಖಾಲಿ ನಿವೇಶನಗಳನ್ನು ಹೊಂದಿದವರು ಪ್ರಾಧಿಕಾರವು ಕಾಲಕಾಲಕ್ಕೆ ನಿಗದಿಪಡಿಸಲಾದ ಕಂದಾಯವನ್ನು ಪಾವತಿ ಮಾಡದಿರುವುದು ಕಂಡುಬಂದಿದೆ.

ಇದೇ ರೀತಿ ಪ್ರಾಧಿಕಾರದಿಂದ ಮನೆಗಳನ್ನು ನಿರ್ಮಿಸಿ ಮಂಜೂರಾತಿ ನೀಡಿರುವ ಬಾಬ್ತು ಪ್ರಾಧಿಕಾರದಿಂದ ನಿಗದಿಪಡಿಸಲಾಗಿರುವ ಕಂತಿನ ಮೊಬಲಗನ್ನು ಪಾವತಿಸದೆ ಬಾಕಿ ಉಳಿಸಿಕೊಂಡಿರುವುದೂ ಸಹ ಕಂಡಬಂದಿರುತ್ತದೆ. ಹಾಗೂ ಪ್ರಾಧಿಕಾರದಿಂದ ಪಡೆದ ನಿವೇಶನಗಳಲ್ಲಿ ಮನೆಗಳನ್ನು ನಿರ್ಮಿಸಿಕೊಂಡಿರುವವರು ಮನೆ ಕಂದಾಯ ನಿಗದಿಪಡಿಸಿಕೊಂಡು ಮತ್ತು ಮನೆ ಕಂದಾಯ ನಿಗದಿಪಡಿಸಿಕೊಂಡವರು ಕಂದಾಯವನ್ನೂ ಸಹ ಪ್ರಾಧಿಕಾರಕ್ಕೆ ಪಾವತಿಸದಿರುವುದು ಕಂಡುಬಂದಿದೆ.

ಖಾಸಗಿ ಭೂ ಮಾಲೀಕರು ತಮ್ಮ ಜಮೀನುಗಳಿಗೆ ಭೂ ಪರಿವರ್ತನೆ ಮಾಡಿಸಿಕೊಂಡು ಪ್ರಾಧಿಕಾರದಿಂದ ನಿಯಮಾನುಸಾರ ನಕ್ಷೆ ಅನುಮೋದಿಸಿಕೊಂಡು ನಿವೇಶನಗಳನ್ನು ರಚಿಸಿದ್ದು , ಈ ನಿವೇಶನಗಳ ಖಾತೆ ಕಂದಾಯವನ್ನು ಮಾಡುವ ಅಧಿಕಾರವೂ ಸಹ ಪ್ರಾಧಿಕಾರದ ವ್ಯಾಪ್ತಿಗೆ ಒಳಪಡುತ್ತದೆ. ಈ ರೀತಿ ಖಾಸಗಿ ಭೂ ಮಾಲೀಕರಿಂದ ನಿವೇಶನಗಳನ್ನು ಪಡೆದವರೂ ಸಹ ನಿವೇಶನ ಕಂದಾಯ ಹಾಗೂ ಈ ನಿವೇಶನಗಳಲ್ಲಿ ಮನೆಗಳನ್ನು ನಿರ್ಮಿಸಿರುವವರು ಮನೆ ಕಂದಾಯವನ್ನು ನಿಗದಿಪಡಿಸಿಕೊಂಡು ಮತ್ತು ಮನೆ ಕಂದಾಯ ನಿಗದಿಪಡಿಸಿಕೊಂಡಿರುವವರು ಕಂದಾಯವನ್ನು ಪ್ರಾಧಿಕಾರಕ್ಕೆ ಪಾವತಿಸದಿರುವುದು ಕಂಡುಬಂದಿರುತ್ತದೆ.

ಪ್ರಾಧಿಕಾರ ಕೈಗೊಳ್ಳುವ ಅಭಿವೃದ್ಧಿ ಕಾರ್ಯಕ್ಕೆ ತೊಡಕು ಉಂಟಾಗುತ್ತದೆ. ನಿಗಧಿತ ಅವಧಿಯೊಳಗೆ ಕಂದಾಯ ಪಾವತಿಸದಿದ್ದಲ್ಲಿ ಬಡ್ಡಿಯನ್ನು ಪಾವತಿಸಬೇಕಾಗಿರುತ್ತದೆ. ಆದ್ದರಿಂದ ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರದಿಂದ ಮಂಜೂರಾತಿ ಪಡೆದ ಹಾಗೂ ಖಾಸಗಿ ಭೂ ಮಾಲೀಕರಿಂದ ಪಡೆದ ನಿವೇಶನ ಮನೆಗಳು ನಿವೇಶನದಲ್ಲಿ ನಿರ್ಮಿಸಿರುವ ಮನೆಗಳಿಗೆ ಸಂಬಂಧಿಸಿದಂತೆ ಪ್ರಾಧಿಕಾರದಿಂದ ನಿಗದಿಪಡಿಸಿರುವ ಕಂದಾಯವನ್ನು ದಿನಾಂಕ 31.03.2009ರೊಳಗಾಗಿ ಪ್ರಾಧಿಕಾರಕ್ಕೆ ಪಾವತಿಸಬೇಕು.ತಪ್ಪಿದಲ್ಲಿ ನಿಯಮಾನುಸಾರ ಮುಂದಿನ ಕ್ರಮ ಅನುಸರಿಸಲಾಗುವುದೆಂದು ತಿಳಿಯುವುದು ಎಂದು ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರದ ಸಾರ್ವಜನಿಕ ಪ್ರಕಟಣೆ ತಿಳಿಸಿದೆ.
(ದಟ್ಸ್ ಕನ್ನಡ ವಾರ್ತೆ)
ಮೈಸೂರು ನಗರಾಭಿವೃದ್ಧಿಗೆ ವಿವಿಧ ಯೋಜನೆಗಳು
ಮೈಸೂರು ಜಿಲ್ಲಾ ಪಂಚಾಯತ್ ಬಜೆಟ್ ಮಂಡನೆ