ಪೆಟ್ರೋಲ್ ಡೀಸೆಲ್ ದರಹೊರೆ ಇಳಿಸಿದ ಕೇಂದ್ರ

ನವದೆಹಲಿ, ಡಿ. 5 : ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯನ್ನು ಇಳಿಸಿ ಕೇಂದ್ರ ಸರ್ಕಾರ ಶುಕ್ರವಾರವೇ ಆಜ್ಞೆ ಹೊರಡಿಸಿದೆ. 22 ತಿಂಗಳಲ್ಲಿ ಪ್ರಥಮ ಬಾರಿಗೆ ಪೆಟ್ರೋಲ್ ಮತ್ತು ಡೀಸೆಲ್ ದರದಲ್ಲಿ ಇಳಿಕೆಯಾಗಿದೆ. ಆದರೆ, ಎಲ್ ಪಿಜಿ ಮತ್ತು ಸೀಮೆಎಣ್ಣೆ ಬೆಲೆಯಲ್ಲಿ ಇಳಿಕೆ ಮಾಡಿಲ್ಲ.

ಪೆಟ್ರೋಲ್ ರು. 5 ಮತ್ತು ಡೀಸೆಲ್ ರು. 2 ಕಡಿಮೆಯಾಗಲಿದೆ. ನೂತನ ದರಗಳು ಶುಕ್ರವಾರ ಮಧ್ಯರಾತ್ರಿಯಿಂದಲೇ ಜಾರಿಗೆ ಬರಲಿವೆ. ಈ ಮೊದಲು ಪೆಟ್ರೋಲ್ 10 ರು., ಡೀಸೆಲ್ 5 ರು. ಮತ್ತು ಎಲ್ ಪಿಜಿ 20 ರು. ಇಳಿಸುವುದಾಗಿ ಕೇಂದ್ರ ಹೇಳಿತ್ತು. ಬೆಂಗಳೂರಿನಲ್ಲಿ ಪ್ರಸ್ತುತ ಪೆಟ್ರೋಲ್ ಬೆಲೆ 57.17 ರು. ಮತ್ತು ಡೀಸೆಲ್ 39.16 ರು. ಇದೆ.

ಪ್ರಧಾನ ಮಂತ್ರಿ ಮನಮೋಹನ ಸಿಂಗ್ ಅವರೊಂದಿಗೆ ಮಾತುಕತೆ ನಡೆಸಿದ ನಂತರ ಈ ಮಧ್ಯಂತರ ನಿರ್ಣಯವನ್ನು ಕೇಂದ್ರ ಪ್ರಕಟಿಸಿದೆ ಎಂದು ಕೇಂದ್ರ ಪೆಟ್ರೋಲಿಯಂ ಸಚಿವ ಮುರಳಿ ದೇವೋರಾ ಪತ್ರಕರ್ತರಿಗೆ ತಿಳಿಸಿದರು.

ಜೂನ್ ತಿಂಗಳಲ್ಲಿ ಕಚ್ಚಾ ತೈಲದ ದರದಲ್ಲಿ ತೀವ್ರ ಏರಿಕೆ ಕಂಡಬಂದಿದ್ದರಿಂದ ಪೆಟ್ರೋಲ್ ಬೆಲೆಯನ್ನು 5 ರು. ಮತ್ತು ಡೀಸೆಲ್ ಬೆಲೆಯನ್ನು 3 ರು. ಹೆಚ್ಚಿಸಿತ್ತು. ಎಲ್ ಪಿಜಿ ದರವನ್ನು ಕೂಡ 50 ರು. ಏರಿಸಿತ್ತು. ಜುಲೈ ತಿಂಗಳಲ್ಲಿ ಪ್ರತಿ ಬ್ಯಾರೆಲ್ ಗೆ 147 ಡಾಲರ್ ಇದ್ದ ಬೆಲೆ ಈಗ 43 ಡಾಲರ್ ಗೆ ಇಳಿದಿದೆ.

(ದಟ್ಸ್ ಕನ್ನಡ ವಾರ್ತೆ)