ಕಾಚಾಪುರ್‌, ಸಿಂಪಿ ಸೇರಿದಂತೆ 5 ಕಲಾವಿದರಿಗೆ ಚಿತ್ರಕಲೆ ಪ್ರಶಸ್ತಿ

ಕಾಚಾಪುರ್‌, ಸಿಂಪಿ ಸೇರಿದಂತೆ 5 ಕಲಾವಿದರಿಗೆ ಚಿತ್ರಕಲೆ ಪ್ರಶಸ್ತಿ
ಕರ್ನಾಟಕದ ಇನ್ನೂ ಐವರು ಕಲಾವಿದರಿಗೆ ನವದೆಹಲಿಯ ಐಫೆಕ್ಸ್‌ ಬಹುಮಾನ

ಚಿತ್ರಕಲಾ ಕ್ಷೇತ್ರದಲ್ಲಿ ಸಾಧನೆ ಮಾಡಿರುವ ಬಿಜಾಪುರದ ಸಿ.ಬಿ.ಕಾಚಾಪುರ್‌, ಗುಲ್ಬರ್ಗಾದ ಎಸ್‌.ಎಸ್‌.ಸಿಂಪಿ, ಬೆಂಗಳೂರಿನ ಲಲಿತಾ ಹೊಯ್ಸಳ, ನಂಜನಗೂಡಿನ ಬಿ.ಎಲ್‌.ಎನ್‌.ಸಿಂಹ ಹಾಗೂ ಡಾ. ಅ.ಲ.ನರಸಿಂಹನ್‌ ಅವರಿಗೆ ಲಲಿತ ಕಲಾ ಅಕಾಡೆಮಿಯ 2003ನೇ ಇಸವಿಯ ಗೌರವ ಪ್ರಶಸ್ತಿ ಸಂದಿದೆ.

ಗೌರವ ಪ್ರಸ್ತಿಯು 10 ಸಾವಿರ ರುಪಾಯಿ ನಗದು ಹಾಗೂ ನೆನಪಿನ ಕಾಣಿಕೆ ಒಳಗೊಂಡಿದೆ. ಇದೇ ವರ್ಷದ ಗೌರವ ಪುರಸ್ಕಾರಕ್ಕೆ ಬೆಂಗಳೂರಿನ ಕ.ರಾ.ಕೃಷ್ಣಸ್ವಾಮಿ ಅವರನ್ನು ಆಯ್ಕೆ ಮಾಡಲಾಗಿದ್ದು, ಈ ಪುರಸ್ಕಾರಕ್ಕೆ ನಗದು ಬಹುಮಾನ ಇರುವುದಿಲ್ಲ. 2004ರ ಫೆಬ್ರವರಿಯಲ್ಲಿ ನಡೆಯಲಿರುವ ಸಮಾರಂಭದಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಗುವುದು ಎಂದು ಅಕಾಡೆಮಿಯ ಪ್ರಕಟಣೆ ತಿಳಿಸಿದೆ.

ಐಫೆಕ್ಸ್‌ ಪ್ರಶಸ್ತಿ : ನವದೆಹಲಿಯ ಐಫೆಕ್ಸ್‌ ಸಂಸ್ಥೆ ರಾಜ್ಯದ ಏಳು ಕಲಾವಿದರನ್ನು ತಾನು ಕೊಡುವ ಪ್ರಶಸ್ತಿಗೆ ಆರಿಸಿದೆ. ಡಿಸೆಂಬರ್‌ 16ನೇ ತಾರೀಕು ಬೆಂಗಳೂರಿನ ನಯನಾ ಸಭಾಂಗಣದಲ್ಲಿ ನಡೆಯಲಿರುವ ಕಾರ್ಯಕ್ರಮದಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಗುವುದು. ತಲಾ 10 ಸಾವಿರ ರುಪಾಯಿ ಬಹುಮಾನವನ್ನು ಈ ಪ್ರಶಸ್ತಿ ಒಳಗೊಂಡಿದೆ.

ಐಫೆಕ್ಸ್‌ ಪ್ರಶಸ್ತಿಗೆ ಆಯ್ಕೆಯಾದವರು- ಗುಲ್ಬರ್ಗಾದ ಅಮೃತ ಎಂ. ಸಾಹು, ಮೈಸೂರಿನ ಸಿ. ಚಿಕ್ಕಣ್ಣ (ಚಿತ್ರಕಲೆ); ತುಮಕೂರಿನ ಕೆ.ಎಸ್‌.ಬಸವರಾಜು, ಬಿಜಾಪುರದ ಸಿ.ಕೆ.ಲಿಂಗರಾಜು (ಗ್ರಾಫಿಕ್‌ ಕಲೆ); ಮೈಸೂರಿನ ಶ್ರೀನಾಥ್‌ ಜಾದವ್‌, ಉಡುಪಿಯ ವಿಶ್ವೇಶ ಪರ್ಕಳ (ಸಮಕಾಲೀನ ಶಿಲ್ಪಕಲೆ); ಬೆಂಗಳೂರಿನ ಯು.ಅಶೋಕ್‌ (ಡ್ರಾಯಿಂಗ್‌).

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು