ಕಾಶ್ಮೀರ ವಿಷಯದಲ್ಲಿ ಸಕ್ರಿಯ ಪಾತ್ರ: ಅಮೆರಿಕಕ್ಕೆ ಪಾಕ್‌ ಷರತ್ತು

ವಾಷಿಂಗ್ಟನ್‌ : ಒಸಮಾ ಬಿನ್‌ ಲಾಡೆನ್‌ ವಿರುದ್ಧ ಸಮರ ಸಾರಿರುವ ಅಮೆರಿಕೆಗೆ ಸಂಪೂರ್ಣ ಸಹಕಾರ ನೀಡುವುದಾಗಿ ಘೋಷಿಸಿರುವ ಪಾಕಿಸ್ತಾನ, ಅದಕ್ಕೆ ಪ್ರತಿಫಲವಾಗಿ ಕಾಶ್ಮೀರ ವಿಷಯದಲ್ಲಿ ಅಮೆರಿಕ ಸಕ್ರಿಯ ಪಾತ್ರ ವಹಿಸಬೇಕು ಎಂಬ ಇಂಗಿತ ವ್ಯಕ್ತಪಡಿಸಿದೆ ಎಂದು ಸಿಎನ್‌ಎನ್‌ ವರದಿ ಮಾಡಿದೆ.

ಆಫ್ಘಾನಿಸ್ತಾನದ ವಿರುದ್ಧದ ಅಮೆರಿಕದ ಹೋರಾಟಕ್ಕೆ ವಾಯುನೆಲೆ ನೀಡುವುದೂ ಸೇರಿದಂತೆ, ತಾನು ನೀಡುತ್ತಿರುವ ಎಲ್ಲ ಸಹಕಾರಕ್ಕೆ ಪ್ರತಿಫಲವಾಗಿ ಅಮೆರಿಕವು ಪಾಕ್‌ ಮೇಲೆ ಹೇರಿರುವ ದಿಗ್ಭಂಧನ ತೆರವುಗೊಳಿಸಬೇಕು ಮತ್ತು ಕಾಶ್ಮೀರ ವಿಷಯದಲ್ಲಿ ಸಕ್ರಿಯ ಪಾತ್ರ ವಹಿಸಬೇಕು ಎಂದು ಪಾಕಿಸ್ತಾನದ ಅಧ್ಯಕ್ಷ ಮುಷರ್ರಫ್‌ ಅವರು ಅಮೆರಿಕ ಅಧ್ಯಕ್ಷ ಬುಷ್‌ರಿಗೆ ತಾಕೀತು ಮಾಡಿದ್ದಾರೆ.

ಅಮೆರಿಕದ ಅಧ್ಯಕ್ಷ ಬುಷ್‌ರೊಂದಿಗೆ ನಡೆದ 15 ನಿಮಿಷಗಳ ಮಾತುಕತೆಯ ಸಂದರ್ಭದಲ್ಲಿ ಈ ಬಗ್ಗೆ ಪ್ರಸ್ತಾಪವಾಗಿದೆ ಎನ್ನಲಾಗಿದೆ. ಅಮೆರಿಕ ಅಧ್ಯಕ್ಷ ಬುಷ್‌ ಅವರು ವಾಷಿಂಗ್ಟನ್‌ನಲ್ಲಿ ನೀಡಿರುವ ಹೇಳಿಕೆಯಲ್ಲಿ ಭಯೋತ್ಪಾದನೆಯ ವಿರುದ್ಧದ ತಮ್ಮ ಹೋರಾಟಕ್ಕೆ ಪಾಕಿಸ್ತಾನ ಮತ್ತು ಭಾರತದಿಂದ ಸಕಾರಾತ್ಮಕ ಬೆಂಬಲ ದೊರೆತಿದೆ ಎಂದು ತಿಳಿಸಿದ್ದಾರೆ.

ಬೇಷರತ್‌ ಬೆಂಬಲ ಅಲ್ಲ : ಪಾಕ್‌ ಅಮೆರಿಕಕ್ಕೆ ನೀಡುತ್ತಿರುವುದು ಬೇಷರತ್‌ ಬೆಂಬಲ ಅಲ್ಲ ಎಂಬ ಅಂಶಗಳು ಗರಿಬಿಚ್ಚಿಕೊಳ್ಳುತ್ತಿವೆ. ಪಾಕ್‌ ಕಾಶ್ಮೀರ ವಿಷಯವನ್ನು ಇದರೊಂದಿಗೆ ಥಳಕು ಹಾಕುತ್ತಿದೆ. ಮಿಗಿಲಾಗಿ ಅಮೆರಿಕದ ಉದ್ದೇಶಿತ ಹೋರಾಟದಲ್ಲಿ ಭಾರತ ಮತ್ತು ಇಸ್ರೇಲ್‌ಗಳನ್ನು ಸೇರಿಸಿಕೊಳ್ಳಬಾರದು ಎಂದೂ ಷರತ್ತು ವಿಧಿಸಿದೆ.

ಈ ಸಮರದಲ್ಲಿ ಭಾರತ ಮತ್ತು ಇಸ್ರೇಲ್‌ಗಳನ್ನು ಸೇರಿಸಿಕೊಳ್ಳಬಾರದು ಎಂಬ ಪಾಕ್‌ ಷರತ್ತಿನ ಬಗ್ಗೆ ಅಮೆರಿಕ ಪರಿಶೀಲಿಸುತ್ತಿದೆ ಎಂದು ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಕಾಲಿನ್‌ ಪೋವೆಲ್‌ ತಿಳಿಸಿದ್ದಾರೆ. ಈ ನಡುವೆ ಅಮೆರಿಕಕ್ಕೆ ಬೆಂಬಲ ನೀಡುವ ಮುಷರ್ರಫ್‌ ಕ್ರಮವನ್ನು ಸೌದಿಯ ಯುವರಾಜ ಅಬ್ದುಲ್ಲಾ ಬಿನ್‌ ಅಬ್ದುಲ್ಲಾ ಅಜೀಜ್‌ ಅಭಿನಂದಿಸಿದ್ದಾರೆ ಎಂದು ಇಸ್ಲಾಮಾಬಾದ್‌ ವರದಿಗಳು ಹೇಳಿವೆ.(ಪಿ.ಟಿ.ಐ./ಇನ್‌ಫೋ ವಾರ್ತೆ)

English summary

Pakistan President Pervez Musharraf has asked his US counterpart George W Bush to play a more active role in settling the Kashmir issue and to lift sanctions against it, CNN reported on September 16.