ಯೂರೋ ಪಾರ್ಲಿಮೆಂಟ್‌ ಉಡಾಯಿಸಲು ಸಂಚು ರೂಪಿಸಿದ್ದ ಲ್ಯಾಡೆನ್‌

ಲಂಡನ್‌ : ಕಳೆದ ಫೆಬ್ರವರಿಯಲ್ಲಿ ಸ್ಟ್ರಾಸ್‌ಬರ್ಗ್‌ನಲ್ಲಿರುವ ಯುರೋಪಿಯನ್‌ ಪಾರ್ಲಿಮೆಂಟ್‌ ಭವನದೊಳಗೆ ಮಾರಣಾಂತಿಕ ಸರಿನ್‌ ನರ್ವ್‌ ಅನಿಲವನ್ನು ಹಾಯಿಸಲು ಬಿನ್‌ ಲ್ಯಾಡೆನ್‌ ಯೋಜಿಸಿದ್ದ ಸಂಚು ಇದೀಗ ಬೆಳಕಿಗೆ ಬಂದಿದೆ. ಆದರೆ, ಈ ಸಂಚನ್ನು ಜರ್ಮನ್‌ ಪೊಲೀಸರು ವಿಫಲಗೊಳಿಸಿದ್ದಾಗಿ ಬ್ರಿಟೀಷ್‌ ಪತ್ರಿಕೆ ಸಂಡೆ ಟೆಲಿಗ್ರಾಫ್‌ ವರದಿ ಮಾಡಿದೆ.

ಮಾರಣಾಂತಿಕ ಅನಿಲ ಹಾಯಿಸುವ ಮೂಲಕ ಯೂರೋ ಪಾರ್ಲಿಮೆಂಟ್‌ನ ಎಲ್ಲ 625 ಸಂಸದರನ್ನು ಕೊಲ್ಲಲು ಲ್ಯಾಡೆನ್‌ ಉದ್ದೇಶಿಸಿದ್ದ. ಇದಕ್ಕಾಗಿ 6 ಬಲಿಷ್ಠ ಭಯೋತ್ಪಾದಕ ಸಂಘಟನೆಗಳಿಗೆ ಹಣಕಾಸನ್ನು ಪೂರೈಸಿದ್ದ ಎಂದು ಬ್ರಿಟೀಷ್‌ ಭಯೋತ್ಪಾದಕ ವಿರೋಧಿ ಮೂಲಗಳನ್ನುದ್ದೇಶಿಸಿ ಟೆಲಿಗ್ರಾಫ್‌ ವರದಿ ಮಾಡಿದೆ.

ಯೂರೋ ಪಾರ್ಲಿಮೆಂಟ್‌ ಮೇಲಿನ ಉದ್ದೇಶಿತ ದಾಳಿಯನ್ನು ಫೆಬ್ರವರಿ 11 ರಿಂದ 14 ರೊಳಗೆ ನಡೆಸಲು ಉದ್ದೇಶಿಸಲಾಗಿತ್ತು . ಇದು ಯುರೋಪಿನ ಪ್ರಮುಖ ಕಟ್ಟಡಗಳನ್ನು ನಾಶ ಮಾಡುವ ಲ್ಯಾಡೆನ್‌ ಯೋಜನೆಯ ಮೊದಲ ನಡೆಯಾಗಿತ್ತು . ಇದಕ್ಕಾಗಿ ಲಂಡನ್‌ ಮೂಲದ ಅಲ್ಜೀರಿಯನ್‌ ಭಯೋತ್ಪಾದಕರಿಗೆ ನೇರವಾಗಿ ಹಣಕಾಸು ಪೂರೈಕೆಯಾಗಿತ್ತು . ಆದರೆ, ಜರ್ಮನ್‌ ಪೊಲೀಸರ ಫ್ರಾಂಕ್‌ಫರ್ಟ್‌ ಆಪರೇಷನ್‌ನಿಂದಾಗಿ ಈ ಯೋಜನೆ ವಿಫಲವಾಯಿತು.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರು ಮಂದಿ ಭಯೋತ್ಪಾದಕರನ್ನು ಪೊಲೀಸರು ಬಂಧಿಸಿ ಆರೋಪಗಳನ್ನು ಹೊರಿಸಿದ್ದರೂ, ಆನಂತರ ಅವರ ಮೇಲಿನ ಮೊಕದ್ದಮೆಗಳನ್ನು ವಾಪಸ್ಸು ಪಡೆಯಲಾಯಿತು ಹಾಗೂ ಆರೋಪಿಗಳನ್ನು ಬಿಡುಗಡೆ ಮಾಡಲಾಯಿತು ಎಂದು ಟೆಲಿಗ್ರಾಫ್‌ ವರದಿ ಮಾಡಿದೆ.

(ಪಿಟಿಐ)

ಮುಖಪುಟ / ಭಯೋತ್ಪಾದನೆ