ಬಸವರಾಜ ರಾಜಗುರು ಸ್ಮರಣಾರ್ಥ ಎರಡು ದಿನಗಳಸಂಗೀತೋತ್ಸವ

ಬೆಂಗಳೂರು : ಪಂಡಿತ್‌ ಬಸವರಾಜ ರಾಜಗುರು ಸ್ಮರಣಾರ್ಥ ಹಿಂದೂಸ್ತಾನಿ ಸಂಗೀತ ಕಾರ್ಯಕ್ರಮವು ನಗರದ ಗುರುನಾನಕ ಭವನದಲ್ಲಿ ಶನಿವಾರ ಮತ್ತು ಭಾನುವಾರ ನಡೆಯಲಿದೆ.

ರಾಜಗುರು ಸ್ಮೃತಿ ಸಂಸ್ಥೆ ಏರ್ಪಡಿಸಿರುವ ಈ ಕಾರ್ಯಕ್ರಮದಲ್ಲಿ ಪ್ರಸಿದ್ಧ ಗಾಯಕರಾದ ಕೈವಲ್ಯಕುಮಾರ್‌ ಗುರವ್‌ ಹಾಗೂ ಡಿ. ಕುಮಾರ್‌ದಾಸ್‌ ಕಾರ್ಯಕ್ರಮ ನೀಡುವರು. ಶುಕ್ರವಾರ ಸಂಜೆ 6 ಗಂಟೆಯಿಂದ ಪ್ರಾರಂಭವಾಗುವ ಗಾಯನೋತ್ಸವದಲ್ಲಿ ರಾಜ್ಯದ 6 ಮಂದಿ ಗಾಯಕರು ಹಾಡುತ್ತಿರುವುದು ವಿಶೇಷ.

ಭಾನುವಾರ ಬೆಳಿಗ್ಗೆ 9.45 ರಿಂದ ಮಧ್ಯಾಹ್ನದವರೆಗೆ ನಡೆಯುವ ಕಾರ್ಯಕ್ರಮದಲ್ಲಿ ಜಯತೀರ್ಥ ಮೇವುಂಡಿ ಹಾಗೂ ಎಂ. ವೆಂಕಟೇಶ ಕುಮಾರ್‌ ಅವರು ಹಿಂದೂಸ್ತಾನಿ ಸಂಗೀತ ಪ್ರಸ್ತುತಪಡಿಸಿದರೆ, ಸಂಜೆಯ ಕಾರ್ಯಕ್ರಮದಲ್ಲಿ ಬಾಲಚಂದ್ರ ನಾಕೋಡ್‌ ಹಾಗೂ ಬಸವರಾಜ್‌ ಗೋನ್ಹಾಳ ಅವರ ಗಾಯನ ನಡೆಯುವುದು.

ರವೀಂದ್ರ ಕಾಟೋಟಿ ಹಾಗೂ ವ್ಯಾಸಮೂರ್ತಿ ಕಟ್ಟಿ ಹಾರ್ಮೋನಿಯಂ ಸಾಥ್‌ ನೀಡುವರು. ರಾಜೇಂದ್ರ ನಾಕೋಡ್‌, ಉದಯರಾಜ್‌ ಕರ್ಪೂರ್‌ ಹಾಗೂ ಗೋಪಾಲಕೃಷ್ಣ ಹೆಗಡೆ ಅವರು ತಬಲಾ ಸಾಥ್‌ ನೀಡುವ ಹೊಣೆ ಹೊತ್ತಿದ್ದಾರೆ.

(ಇನ್ಫೋ ವಾರ್ತೆ)