ಮಂಗಳವಾರದೊಳಗೇ ರಾಜ್‌ ಬಿಡುಗಡೆ - ಕರುಣಾನಿಧಿ ಭರವಸೆ

ಚೆನ್ನೈ : ಸಂಧಾನಕಾರ ಗೋಪಾಲ್‌ಗೆ ರಾಜ್‌ ಹಾಗೂ ಇತರೆ ಇಬ್ಬರು ಒತ್ತೆಯಾಳುಗಳನ್ನು ಮಂಗಳವಾರದೊಳಗೆ ಬಿಡಿಸಿಕೊಂಡು ಬರುವ ವಿಶ್ವಾಸ ಈಗಲೂ ಇದೆ. ಆದರೆ ಅವರ 5ನೇ ಯಾತ್ರೆಗೆ ವೀರಪ್ಪನ್‌ ಗ್ರೀನ್‌ ಸಿಗ್ನಲ್‌ ಕೊಡಬೇಕಷ್ಟೆ.

ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ತಮಿಳುನಾಡು ಮುಖ್ಯಮಂತ್ರಿ ಎಂ. ಕರುಣಾನಿಧಿ ಹೇಳಿರುವ ಮಾತಿದು. ಗೋಪಾಲ್‌, ವೀರಪ್ಪನ್‌ ಮನವೊಲಿಸಲು ಹೆಚ್ಚೂಕಮ್ಮಿ ಯಶಸ್ವಿಯಾಗಿದ್ದರು. ಆದರೆ ಬುಧವಾರ ರಾತ್ರಿ ನಾಗಪ್ಪ ತಪ್ಪಿಸಿಕೊಂಡು ಬಂದಿದ್ದರಿಂದ ವೀರಪ್ಪನ್‌ ತನ್ನ ಅಡಗುತಾಣ ಬದಲಿಸುವ ಕಾರ್ಯದಲ್ಲಿ ನಿರತನಾದ. ಹೀಗಾಗಿ ಮಾತುಕತೆಗೆ ಅಡಚಣೆಯುಂಟಾಯಿತು. ಈಗಲೂ ವೀರಪ್ಪನ್‌ ಯಾವುದೇ ಗಳಿಗೆಯಲ್ಲಿ ಬೇಕಾದರೂ ಗೋಪಾಲ್‌ಗೆ ಕರೆ ಕೊಡಬಹುದು. ಕರೆ ಕೊಟ್ಟ ತಕ್ಷಣ ಗೋಪಾಲ್‌ ಕಾಡಿಗೆ ಹೋಗಿ, ಮಂಗಳವಾರದೊಳಗೆ ಒತ್ತೆಯಾಳುಗಳನ್ನು ಬಿಡಿಸಿಕೊಂಡು ಬರುತ್ತಾರೆ ಎಂಬ ಭರವಸೆಯ ಮಾತುಗಳನ್ನಾಡಿದರು.

ವೀರಪ್ಪನ್‌ಗೆ ಒತ್ತೆಯಾಳು ತಪ್ಪಿಸಿಕೊಂಡು ಬಂದದ್ದು ಕೋಪ ತರಿಸಿತ್ತು. ಆತ ತಣ್ಣಗಾಗುವವರೆಗೆ ಮಾತುಕತೆ ನಡೆಸುವುದರಲ್ಲಿ ಅರ್ಥವಿಲ್ಲ ಎನಿಸಿದ ಕಾರಣ ನಾನು ವಾಪಸ್ಸಾದೆ. ಉಭಯ ಸರ್ಕಾರಗಳೂ ವೀರಪ್ಪನ್‌ ಬೇಡಿಕೆಗಳಿಗೆ ಸ್ಪಂದಿಸಿರುವುದು ಆತನಿಗೆ ತೃಪ್ತಿ ತಂದಿದೆ. ಟಾಡಾ ಬಂದಿಗಳ ಬಿಡುಗಡೆ ತಕರಾರಿಗೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರ ಸುಪ್ರಿಂಕೋರ್ಟ್‌ಗೆ ಸಲ್ಲಿಸಿರುವ ಮನವಿ ಪತ್ರದ ಬಗೆಗೂ ವೀರಪ್ಪನ್‌ ತೃಪ್ತಿ ವ್ಯಕ್ತಪಡಿಸಿದ್ದಾನೆ. ಅವನ ಕರೆಗೆ ಕಾಯುತ್ತಿದ್ದೇನೆ. ಕರೆದೊಡನೆಯೇ 5ನೇ ಬಾರಿಗೆ ಕಾಡಿಗೆ ಹೋಗಿ ಒತ್ತೆಯಾಳುಗಳನ್ನು ಕರೆ ತರಲು ನಾನು ಸಿದ್ಧ ಎಂದು ಗೋಪಾಲ್‌ ಹೇಳಿದ್ದಾರೆ.

English summary

Nakkeran gopal fails to convince veerappan for the fourt time