ಮಳೆಯ ನೆನಪು

ಚಿಂತಾಮಣಿ ಕೊಡ್ಲೆಕೆರೆ, ಬೆಂಗಳೂರು
ಹಿರೇಗುತ್ತಿಯ ಮನೆ. ಎಳವೆಯಲ್ಲಿ ನನಗಾಗ
ಅದು ಇಡೀ ಜಗತ್ತಿನ ಕೊನೆ. ಕಂಬಳಿಯ ಹೊದ್ದು
ನೇಗಿಲಿಗೆ ಎತ್ತುಗಳ ಹೂಡಿ ಸೆಳೆಯನು ಹಿಡಿದು
ಹೇರೇರೆ ಎಂದು ರಾಗವಾಗಿ ತುಳಸು ಅಪ್ಪ
ಗದ್ದೆ ಹೂಡುವನು. ಗದ್ದೆ ಈ ಬದಿಯಲಿ ತುಳಸು
ಆಡುವನು. ಮಳೆಯೂ- ಬಿಡದೆ ಸುರಿಯುತಲೆ ಇರುವುದು

ಮುಂಜಾನೆ ಶಾಲೆ ಮುಗಿಸಿದ ನಮಗೆ ನಮ್ಮಮ್ಮ
ಹಾಲು ಕೊಡುವಳು. ತಿನಲು ಗೋಧಿ ಹಪ್ಪಳ ಉಂಟು
ಮನೆ ಇದಿರ ಇಳುಕಲಲಿ ಸಿಹಿನೀರ ಝರಿಯಾಂದು
ಮುದ್ದಾಗಿ ಉಕ್ಕುತಿದೆ. ಹೊಸಹಸಿರು ಪಾಗಾರ
ಕಲ್ಲುಗಳ ನಡುವೆಯೂ. ‘ಮಳೆಯಲ್ಲಿ ನೆನೆಯಬೇ-
ಡಿರೊ’- ಅಮ್ಮ ಗದರುವಳು ಅಡಿಗೆ ಮನೆ ಒಳಗಿಂದ.

‘ಮಳೆಯಲ್ಲಿ ನಾವು ನೆನೆದವೆ?’ ‘ಮಳೆಯೆ ನೆನೆಯಿಸಿತು’ !
ಈ ಮಳೆಯೆ ನಮಗಿಂಥ ಮಾತುಗಳನು ಕಲಿಸಿತು.

ಮುಖಪುಟ / ಮೇಘ ಮಲ್ಹಾರ