ಫೈಬರ್ ನಿಂದ ಸಮೃದ್ಧವಾಗಿರುವ ರುಚಿಕರ ಇನ್ಸ್ಟೆಂಟ್ ಗರಿಗರಿ ಜೋಳದ ದೋಸೆ ಮಾಡುವ ಸರಳ ವಿಧಾನ
ಜೋಳವನ್ನು ಆರೋಗ್ಯದ ಗಣಿ ಎಂದರೆ ತಪ್ಪಲ್ಲ. ಇದು ಅಧಿಕ ಪ್ರಮಾಣದ ಫೈಬರ್ ಅನ್ನು ಒಳಗೊಂಡಿದೆ. ಜೋಳದ ಸೇವನೆಯಿಂದ ದೇಹಕ್ಕೆ ಅಗತ್ಯವಿರುವ ಫೈಬರ್ ಅಂಶ ಸಿಗುವುದರ ಜೊತೆಗೆ ಕರುಳಿನ ಆರೋಗ್ಯವನ್ನು ಕೂಡಾ ಇದು ಸುಧಾರಿಸುತ್ತದೆ. ಈಗಂತೂ ಆರೋಗ್ಯಕರ ಆಹಾರ ಸೇವನೆಯ ಟ್ರೆಂಡ್ ಬೆಳೆಯುತ್ತಿದೆ. ಒಂದು ಕಾಲದಲ್ಲಿ ವಿದೇಶಿಯರಂತೆ ಬ್ರೆಡ್ ಬಟರ್, ಟೋಸ್ಟ್ ಅನ್ನು ಉಪಹಾರವಾಗಿ ಅಳವಡಿಸಿಕೊಂಡಿದ್ದ ನಾವು, ಇದೀಗ ಸಿರಿ ಧಾನ್ಯಗಳತ್ತ ಮುಖ ಮಾಡುತ್ತಿದ್ದೇವೆ. ಪೌಷ್ಠಿಕಾಂಶದ ಆಗರವಾಗಿರುವ ಜೋಳ ಇದೀಗ ಬಹುತೇಕ ಅಡುಗೆ ಮನೆಗಳಲ್ಲಿ ಪ್ರಾಮುಖ್ಯತೆ ಪಡೆದುಕೊಂಡಿದೆ.
ಖ್ಯಾತ ಬಾಣಸಿಗ ಸಂಜೀವ್ ಕಪೂರ್ ಇನ್ಸ್ಟೆಂಟ್ ಜೋಳದ ದೋಸೆ ರೆಸೆಪಿಯನ್ನು ಹಂಚಿಕೊಂಡಿದ್ದಾರೆ. ಇದನ್ನು ಮಾಡುವ ವಿಧಾನವೂ ಸುಲಭ, ಜೊತೆಗೆ ದೇಹಕ್ಕೆ ಅಗತ್ಯವಿರುವ ಪೌಷ್ಟಿಕಾಂಶಗಳನ್ನು ಕೂಡಾ ಇದು ಒದಗಿಸುತ್ತದೆ.ಕೆಲಸದ ಒತ್ತಡ, ಬ್ಯುಸಿ ಲೈಫ್ಸ್ಟೈಲ್ ಇರುವವರು ಕೂಡಾ ಇದನ್ನು ಬಹಳ ಬೇಗನೇ ಮಾಡಿ ಸವಿಯಬಹುದು.
ದೋಸೆ ತಿನ್ನಲು ರುಚಿಯಾಗಿರುತ್ತದೆ. ಆದರೆ ತವಾದ ಮೇಲೆ ಅದನ್ನು ಹರಡುವ ಮುನ್ನ ಮಾಡಬೇಕಾಗಿರುವ ದೀರ್ಘ ಪ್ರಕ್ರಿಯೆಯ ಕಾರಣ ಅದೇಷ್ಟೋ ಜನ ದೋಸೆ ಮಾಡುವ ಗೋಜಿಗೇ ಹೋಗುವುದಿಲ್ಲ. ಆದರೆ ಜೋಳದ ದೋಸೆ ಹಾಗಲ್ಲ, ನೆನ ಹಾಕು, ರುಬ್ಬು, ೮-೯ ಗಂಟೆಗಳ ಕಾಲ ಫರ್ಮಂಟೇಶನ್ಗಾಗಿ ಇಡುವ ಅನಿವಾರ್ಯತೆ ಇಲ್ಲ. ದೋಸೆ ತಿನ್ನಬೇಕು ಎನ್ನುವ ಮನಸ್ಸಾದಾಗ ತಕ್ಷಣವೆ ಗರಿಗರಿ ಜೋಳದ ದೋಸೆ ಮಾಡಿ ಸವಿಯಬಹುದು.
ಜೋಳದ ದೋಸೆ ಮಾಡಲು ಬೇಕಾಗಿರುವ ಪದಾರ್ಥಗಳು:
1.½ ಕಪ್ ಜೋಳದ ಹಿಟ್ಟು
2.¼ ಕಪ್ ರವೆ
3.¼ ಕಪ್ ಮೊಸರು
4.¼ ಟೀಸ್ಪೂನ್ ಅಡಿಗೆ ಸೋಡಾ
5.ರುಚಿಗೆ ತಕ್ಕಷ್ಟು ಉಪ್ಪು
6.ತುಪ್ಪ
ಜೋಳದ ದೋಸೆ ಮಾಡುವ ವಿಧಾನ:
1. ಜೋಳದ ಹಿಟ್ಟನ್ನು ಮಿಕ್ಸಿ ಜಾರ್ನಲ್ಲಿ ತೆಗೆದುಕೊಂಡು, ರವೆ, ಮೊಸರು ಮತ್ತು ¾ ಕಪ್ ನೀರು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ.
2. ಹೀಗೆ ರುಬ್ಬಿದ ಹಿಟ್ಟನ್ನು ಒಂದು ಪಾತ್ರೆಗೆ ಹಾಕಿ, ಅದಕ್ಕೆ ಅಡಿಗೆ ಸೋಡಾ ಮತ್ತು ಉಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.
3. ಪ್ಯಾನ್ ಅನ್ನು ಬಿಸಿ ಮಾಡಿ ಸ್ವಲ್ಪ ನೀರು ಸಿಂಪಡಿಸಿ.
4. ಒಂದು ಲೋಟ ಹಿಟ್ಟು ತೆಗೆದುಕೊಂಡು ಪ್ಯಾನ್ ಮೇಲೆ ಸಮವಾಗಿ ಹರಡಿ. ಮೇಲೆ ತುಪ್ಪವನ್ನು ಸವರಿ. ಮಧ್ಯಮ ಉರಿಯಲ್ಲಿ 2 ನಿಮಿಷ ಬೇಯಿಸಿ.
5. ತೆಂಗಿನಕಾಯಿ ಚಟ್ನಿಯೊಂದಿಗೆ ಬಿಸಿಯಾಗಿ ಬಡಿಸಿ.
ಜೋಳದ ಪ್ರಯೋಜನಗಳು:
ಜೋಳವು ನೈಸರ್ಗಿಕವಾಗಿ ಆಹಾರದ ನಾರಿನಂಶದಿಂದ ಸಮೃದ್ಧವಾಗಿದೆ. ಇದು ಜೀರ್ಣಕ್ರಿಯೆಯನ್ನು ಉತ್ತಮವಾಗಿಸುತ್ತದೆ. ಇದನ್ನು ತಿಂದರೆ ಪದೇ ಪದೇ ಏನನ್ನಾದರೂ ತಿನ್ನಬೇಕು ಎನ್ನುವ ಮನಸ್ಸಾಗುವುದಿಲ್ಲ.ಇದು ಕಬ್ಬಿಣ, ಮೆಗ್ನೀಸಿಯಮ್ ಮತ್ತು ರಂಜಕದಂತಹ ಅಗತ್ಯ ಖನಿಜಗಳನ್ನು ಮತ್ತು ಒಟ್ಟಾರೆ ಆರೋಗ್ಯವನ್ನು ಬೆಂಬಲಿಸುವ ಉತ್ಕರ್ಷಣ ನಿರೋಧಕಗಳನ್ನು ಸಹ ಒಳಗೊಂಡಿದೆ. ನೈಸರ್ಗಿಕವಾಗಿ ಗ್ಲುಟನ್ ಫ್ರೀಯಾಗಿರುವ ಜೋಳ ಲೈಟ್ ಆಹಾರ ಎಂದರೆ ತಪ್ಪಲ್ಲ. ಜೋಳವು ಸಮತೋಲಿತ ಊಟಕ್ಕೆ ಆರೋಗ್ಯಕರ ಸೇರ್ಪಡೆಯಾಗಿದೆ.
ದಿನನಿತ್ಯದ ಅಡುಗೆಯಲ್ಲಿ ಜೋಳವನ್ನು ಬಳಸುವುದು ಹೇಗೆ?:
ಜೋಳವು ಬಹುಮುಖ ಆಹಾರ ಧಾನ್ಯವಾಗಿದ್ದು, ಇದನ್ನು ದೈನಂದಿನ ಊಟದಲ್ಲಿ ಸುಲಭವಾಗಿ ಸೇರಿಸಿಕೊಳ್ಳಬಹುದು. ಇದರ ಹಿಟ್ಟನ್ನು ರೊಟ್ಟಿ, ದೋಸೆ, ಪ್ಯಾನ್ಕೇಕ್ಗಳನ್ನು ತಯಾರಿಸಲು ಬಳಸಬಹುದು. ಆದರೆ ಸಂಪೂರ್ಣ ಜೋಳವನ್ನು ಸಲಾಡ್ಗಳು, ಸೂಪ್ಗಳಲ್ಲಿ ಕೂಡಾ ಸೇರಿಸಬಹುದು. ಮಫಿನ್ಗಳು ಮತ್ತು ಬ್ರೆಡ್ಗಳಂತಹ ಬೇಕ್ ಮಾಡಿದ ತಿಂಡಿಗಳಲ್ಲಿ ಕೂಡಾ ಜೋಳ ಹಿಟ್ಟನ್ನು ಬಳಸಬಹುದು. ಅಥವಾ ದೈನಂದಿನ ಅಡುಗೆಯಲ್ಲಿ ಫೈಬರ್ ಅಂಶವನ್ನು ಹೆಚ್ಚಿಸಲು ಗೋಧಿ ಹಿಟ್ಟಿನೊಂದಿಗೆ ಬೆರೆಸಬಹುದು. ಇದರ ಸೌಮ್ಯ ಪರಿಮಳದಿಂದಾಗಿ ಇದನ್ನು ಬೇರೆ ಬೇರೆ ಪದಾರ್ಥಗಳು ಮತ್ತು ಪಾಕಪದ್ಧತಿಗಳೊಂದಿಗೆ ಬೆರೆಸಲು ಸುಲಭವಾಗುತ್ತದೆ.
(ಬರಹ: ರಂಜಿತಾ ಆರ್.ಕೆ.)
Click it and Unblock the Notifications
Sign in with Google