ಹನಿ ಹನಿ ಇಬ್ಬನಿ ನಿನ್ನ ಬಾಚಿ ಕುಡಿಯೋ ಆಸೆ!

ಚಿಲಿಪಿಲಿ ಹಕ್ಕಿ ನಿನ್ನ ಭಾಷೆ ಕಲಿಯೋ ಆಸೆ. . . . .ಹಾರಾಡುವ ಅರಗಿಳಿಗಳ ಮಾತಾಡಿಸಿ ಮುದ್ದಾಡುವ; ಕಾಮನಾಬಿಲ್ಲೇರುವ ಜಾರುತಾ ನಾವಾಡುವ. . . .ಹೀಗೆ ಪ್ರತೀ ರಾಗಕ್ಕೂ ಹಾಡಿನ ಹೊರತಾಗಿಯೂ ಒಂದು ಮಾಧುರ್ಯವಿದೆ. ಪ್ರತಿ ಮಾತಿಗೂ ಶಬ್ದದ ಹೊರತಾಗಿಯೂ ಒಂದು ಭಾವವಿದೆ. ಪ್ರತಿ ಅಂಗಕ್ಕೂ ಸ್ಪರ್ಶದ ಹೊರತಾಗಿಯೂ ಒಂದು ಸ್ಪಂದನವಿದೆ. ಪ್ರತಿ ಬರಹಕ್ಕೂ ವಾಕ್ಯದ ಹೊರತಾದ ಒಂದು ಅರ್ಥವಿದೆ, ಆಳವಿದೆ ಅಗಲವಿದೆ. ಏನಂತೀರ?

• ಗಗನಸಖಿ

ಬೇಡವೆಂದರೂ ಅರಳಲಿದೆ ಹೂವು

ಬೇಕೆಂದರೂ ಬಾಡಲೇಬೇಕು ಹೂವು,

ವಾಸ್ತವ-ಕಾಲ್ಪನಿಕ; ಅಷ್ಟೇ ಎಲ್ಲವೂ ಕ್ಷಣಿಕ,

ಕಾಲನ ಗೀತೆಗೆ ನಾನು ಅರ್ಜುನ;

ಅವನಲ್ಲಿ ಸ್ಥಾಯಿಯಾಗಲಿ ನನ್ನ ಮನ.

***
ನಾನು ಹೊಳೆಯಬೇಕಿತ್ತು ಹೊಳೆಯಾಗಿಬಿಟ್ಟೆ;
ನಾನು ಬದುಕಬೇಕಿತ್ತು ಬಯಲಾಗಿಬಿಟ್ಟೆ;
ನಾನು ನಾನಾಗ ಬೇಕಿತ್ತು ನಗ್ನಳಾಗಿಬಿಟ್ಟೆ;
ನಾನು ಹೂವಾಗಿ ಅರಳಬೇಕಿತ್ತು ಹರಳಾಗಿಬಿಟ್ಟೆ;
ನನಗೆ ನೋವೇ ಇಲ್ಲ; ಆವಿಯಾಗಲು ಕಾವು ಇಲ್ಲ!

***

ಜನ್ಮಗಳ ಬೆನ್ನಲ್ಲೇ ಇಳಿಸಲು ಹಾತೊರೆದಿದ್ದೆ ಈ ಹೊರೆ
ನಿನ್ನ ಅಲೆಗಳಬ್ಬರದೊಡನೆ ಒಂದಾಯ್ತು ಸಿಹಿ ನೀರಿನಾ ತೊರೆ
ಕಾಮನ ಬಿಲ್ಲಿನ ತುದಿಯಲ್ಲಿ ನೀ ತೆರೆದ ಹೆರಳು.....
ಕಾದ ಮರಳಿನಲ್ಲಿ ಹುಟ್ಟಿತಾಗ ಸುಣ್ಣದ ಹರಳು

***

ದೂರದಲ್ಲೇ ನಕ್ಕು ಕಿರುಣದ ಬಸಿರು ಬಿತ್ತುವವ ನೀನು
ನೀನಿತ್ತ ಉಸಿರನ್ನೆ ಹೊತ್ತು ತಿರುಗುವವಳು ನಾನು
ಭಾನು ನಿನಗೆಲ್ಲಿದೆ ಉದಯ-ಅಸ್ತಮಾನ
ಕಲ್ಪನೆಗಷ್ಟೇ ಸೀಮಿತ ಈ ನನ್ನ ಮನ!

***

ಅಪ್ಪ ಯಾರು? ಕ್ರೋಮೋಸೋಂ ಕೊಟ್ಟವನು. . .
ಪ್ರೇಮಿ ಯಾರು? ದೇಹಕ್ಕೆ ಭಾರದ ಭ್ರಮೆ ಕೊಟ್ಟವನು.
ಮಗ ಯಾರು? ಬದುಕು ಅನುಭವವೆಂಬ ಕಲ್ಪನೆ ಕೊಟ್ಟವನು...
ನಾನು ಯಾರು? ಅದನ್ನೇ ಹುಡುಕುತ್ತಿದ್ದೇನೆ ಈವರೆಗೂ. . .

***

ನಾನು ಒಂಟಿ. . . .ನನ್ನ ಕನಸು ಒಂಟಿ. . . .
ನಾವಿಬ್ಬರೂ ಕೂಡಿದಾಗ ಏಕಾಂತ;
ಅಲ್ಲೊಂದು ಮೌನ,
ಅದೇ ನಮ್ಮ ಮಾತು!

***

ವಿಶಾಲ ಶರಧಿಯ ಕಿರುದೋಣಿಯ
ಪಯಣಿಗರು ನಾನು ನೀವು. . . .
ಜಾಡುಹಿಡಿಯದೆ ಈ ದೋಣಿಯ
ಬೇರೆಲ್ಲಿತಾನೆ ಹೋಗಬಲ್ಲೆವು. . . .
ನಿರಾಶೆ ಹತಾಶೆಬೇಡದ ಈ ಪಯಣ
ಕನಸೊಂದೇ ಕಟ್ಟುತ್ತ ದಾರಿಗುಂಟ ಸಾಗೋಣ!
ಬಾ ಗೆಳತಿ ಸಾಗೋಣ, ಸಾಗುತ್ತಲೇ ಇರೋಣ
ಎಷ್ಟೇ ಆದರೂ ಇದು ದೋಣಿ ಪಯಣ!